កាល​ពី​ថ្ងៃ​ទី២១ ខែ​មករា​កន្លង​មក​នេះ អតីត​ព្រះ​រាជ​អាជ្ញា​សាលា​ដំបូង​ខេត្ត​ពោធិ៍សាត់ លោក តុប ច័ន្ទសិរីវុធ ត្រូវ​បាន​អង្គ​ប្រជុំ​ឧត្តម​ក្រុម​ប្រឹក្សា​នៃ​អង្គ​ចៅ​ក្រម បាន​ពិនិត្យ និង​ពិភាក្សា​ក្នុង​ការ​ផ្តាច់​ចេញ ពី​មុខ​នាទី​ជា​ព្រះ​រាជ​អាជ្ញា តាម​រយៈ​ការ​កាត់​ទោស​ពាក់​ព័ន្ធ​នឹង​សំណុំ​រឿង​ពុក​រលួយ កាល​ពី​ខែ​វិច្ឆិកា ឆ្នាំ​២០១០​កន្លង​មក​នេះ។ នេះ​បើ​យោង​តាម​សេចក្តី​ប្រកាស​ព័ត៌មាន របស់​ឧត្តម​ក្រុម​ប្រឹក្សា នៃ​អង្គ​ចៅក្រម​ចុះ​ថ្ងៃ​ទី​២១ ខែ​មករា ឆ្នាំ​២០១៥​ម្សិល​ម៉ិញ។

ប៉ុន្តែ​ការ​សម្រេច​របស់​ឧត្ដម​ក្រុម​ប្រឹក្សា​នៃ​អង្គ​ចៅក្រម បាន​ធ្លាក់​មក​យឺត​ដល់​ទៅ​រយៈ​ពេល​ជិត​៣ឆ្នាំ ព្រោះ​កាល​ពី​ថ្ងៃ​ទី​១៤ ខែ​មីនា ឆ្នាំ​២០១២ អតីត​ព្រះ​រាជ​អាជ្ញា​អម​សាលា​ដំបូង​ខេត្ត​ពោធិ៍សាត់ លោក តុប ច័ន្ទសិរីវុធ ត្រូវ​បាន​សាលា​ឧទ្ធរណ៍​ប្រកាស​សាល​ដីកា ដែល​មាន​លោក ប៉ុល សំអឿន ប្រធាន​ក្រុម​ប្រឹក្សា​ជំនុំ​ជម្រះ សំរេច​តម្កល់​សាល​ក្រម របស់​សាលា​ដំបូង​ខេត្ត​ពោធិ៍សាត់ ក្នុង​ការ​ផ្តន្ទា​ទោស​ក្នុង​ពន្ធនាគារ​១៩​ឆ្នាំ និង​សង​ប្រាក់​សំណង​ចំនួន​៤លាន​រៀល។

ហើយសំណុំរឿងរបស់ លោក តុប ច័ន្ទសិរីវុធ  ក៏ត្រូវបានលោក ឌុច ចន្ថា ប្រធានក្រុមប្រឹក្សាជំនុំជម្រះ សាលា​ដំបូងខេត្តពោធិ៍សាត់ ចោទប្រកាន់ពីបទចាប់ជំរិត បង្ខាំងមនុស្សខុសច្បាប់ និងស៊ីសំណូកនិងអំពើពុករលួយ តាមច្បាប់ស្ថានទម្ងន់ទោសនៃបទឧក្រិដ្ឋ រាប់ចាប់តាំងពីថ្ងៃទី១២ ខែឧសភា ឆ្នាំ២០១១  មកនោះដែរ។

គួរបញ្ជាក់ថា លោកតុប ច័ន្ទសិរីវុធ អតីតព្រះរាជអាជ្ញា ខេត្តពោធិ៍សាត់ រួមទាំងគូកនបីនាក់ផ្សេងទៀតរួមមាន ពេជ្រ គង់យូ ម្ចាស់ហាងរាត្រីរីករាយពោធិ៍សាត់ជាប្អូនថ្លៃ រស់ សំណាង ហៅវិត អង្គរក្សជាប្អូនថ្លៃ និងឈិត វុទ្ធី អ្នកបើករថយន្ត បានរួមគ្នាចាប់ជំរិតទារប្រាក់ និងបង្ខាំងមនុស្សខុសច្បាប់។

នេះជាសំណុំរឿងពុករលួយដំបូងគេមួយ ដែលបានស្រាវជ្រាវស៊ើបអង្កេត និងឈានដល់ការចាប់ខ្លួន តុប ច័ន្ទសិរីវុធ ដោយអង្គភាពប្រឆាំងអំពើពុករលួយ កាលពីថ្ងៃទី២៧ ខែវិច្ឆិកា ២០១០។ ការឈានទៅដល់ការ​ចាប់​ខ្លួន លោក តុប ច័ន្ទសិរីវុធ និងបក្ខពួកនេះ ដោយសារមានករណីបង្ក្រាបឈើខុសច្បាប់មួយ ក្នុងស្រុក​ក្រគរ ខេត្តពោធិ៍សាត់ កាលពីខែមិថុនា ឆ្នាំ២០១០។ អ្នកដឹកឈើពីរនាក់ ត្រូវបានគេ (តុប ច័ន្ទសិរីវុធ និង​បក្ខពួក) ចាប់ជំរិតទារប្រាក់ចំនួយ៨ពាន់ដុល្លារ នឹងការតថ្លៃចុះមកត្រឹម៣ពាន់ដុល្លារ ជាថ្នូរនឹងការដោះ​លែង​ពួកគេ (អ្នករកស៊ីដឹកឈើ) នោះ៕