ជំនួបតំណាងកម្មករ និងអគ្គិសនីកម្ពុជា រំពឹងជួយកម្មករបន្ថែម
- ដោយ: ក. សោភណ្ឌ អត្ថបទនិងយកការណ៍៖ ក.សោភ័ណ្ឌ( [email protected]) - ភ្នំពេញថ្ងៃទី១៦ មករា ឆ្នាំ២០១៥
- កែប្រែចុងក្រោយ: January 16, 2015
- ប្រធានបទ: ថាមពល
- អត្ថបទ: មានបញ្ហា?
- មតិ-យោបល់
-
ទោះបីជាតំណាងសហជីពកម្មករទាំងអស់ សាទរជាមួយនឹងគម្រោង ក៏ដូចជាអនុសាសន៍របស់ប្រមុខរដ្ឋាភិបាលក្នុងការបញ្ចុះតម្លៃភ្លើងសម្រាប់កម្មករក៏ដោយ ក៏នៅមានបញ្ហាខ្លះដែលត្រូវដោះស្រាយ ដូចជាករណីប្រាក់កក់កម្មករ និងករណីម្ចាស់ផ្ទះជួលជាដើម។ ទាំងនេះជាចំណុចសំខាន់ដែលត្រូវលើកយកមកជជែកពិភាក្សាគ្នា នៅក្នុងជំនួបកាលពីថ្ងៃទី១៥ ខែមករា ឆ្នាំ២០១៥នេះ រវាងអគ្គនាយកអគ្គិសនីកម្ពុជា លោក កែវ រតនៈ និងតំណាងសហជីពកម្មករចំនួន៦រូប ដើម្បីស្វែងរកដំណោះស្រាយ និងយកមកអនុវត្តឲ្យបានសម្រេប ក្នុងពេលឆាប់ៗនេះ។
លោក ហ្វា សាលី ប្រធានសហព័ន្ធសហជីពជាតិ ដែលជាភាគីមួយ នៅក្នុងជំនួបនោះ បានថ្លែងឲ្យដឹងនៅព្រឹកថ្ងៃទី១៦ ខែមករានេះថា អគ្គនាយកអគ្គិសនីកម្ពុជា បានផ្តល់ដំណោះស្រាយ និងភាពងាយស្រួលបន្ថែមទៀតដល់កម្មករ ដែលក្នុងនោះមានដូចជា៖
១. ដាក់កុងទ័រ, ឌីស្យុងទ័រ, ខ្សែ និងឧបករណ៍រណបចាំបាច់ឯទៀត ឲ្យដល់ចំណុចដាក់តម្លើងកុងទ័រដោយមិនគិតប្រាក់។
២. លើកលែងមិនយកប្រាក់តភ្ជាប់ចរន្ត ដែលធម្មតាតាមគោលការណ៍ស្មើនឹង ៣១,០០០រៀល។
៣. បន្ធូរបន្ថយប្រាក់កក់ពីគោលការណ៍ ៦១,៥០០ រៀល មកត្រឹម ៣០,៥០០រៀល (ប្រាក់កក់នេះអាចដកវិញបានរហ័ស នៅពេលកម្មករឈប់ប្រើចរន្តអគ្គិសនី)។
៤. បុគ្គលិកអគ្គិសនីកម្ពុជា ទៅទទួលពាក្យស្នើសុំបន្តចរន្តអគ្គិសនី ដល់កន្លែងកម្មករស្នាក់នៅ។
ប្រធានសហព័ន្ធសហជីពជាតិរូបនេះ បានបញ្ជាក់បន្ថែមទៀតថា ចំពោះបញ្ហាម្ចាស់ផ្ទះជួល ខាងអគ្គិសនីកម្ពុជា (EDC) និងសហកាជាមួយ សាលារាជធានីភ្នំពេញ ចេញចររាចរណ៍ណែនាំដល់គ្រប់ម្ចាស់ផ្ទះទាំងអស់ ដែលមានបន្ទប់ជួលឲ្យកម្មករ ដើម្បីសហការនឹងអនុវត្តន៍។ លោកថា ចំពោះថ្លៃប្រាក់កក់របស់កម្មករមិនជាបញ្ហាទេ ដោយសាតែអគ្គិសនីនឹងប្រគល់ជូនកម្មករវិញ នៅពេលណាដែលកម្មករទាំងនោះ ឈប់ប្រើប្រាស់ភ្លើង ដោយគ្រាន់តែបញ្ជូនលិខិត ទៅបុគ្គលិកអគ្គិសនីប៉ុណ្ណោះ។
លើកឡើងប្រហែលគ្នានេះដែរ លោក សៀង សម្បត្តិ ប្រធានសហព័ន្ធសហជីពមិត្តភាពកម្មករ ភាគីមួយទៀតក្នុងជំនួប បានបន្ថែមថា ប្រាក់កក់ ៣០៥០០រៀលក្នុងមួយបន្ទប់សម្រាប់កម្មរករ «គេមានសិទ្ធទទួលបានវិញគ្រប់ចំនួនទាំងអស់» បន្ទាប់ពីបញ្ជូនលិខិតស្នើសុំឈប់ប្រើប្រាស់ទៅ(EDC)។
សូមបញ្ជាក់ថាអគ្គិសនីកម្ពុជា បានបញ្ចុះតម្លៃអគ្គិសនីមកត្រឹម ៦១០រៀល ក្នុង១គីឡូវ៉ាត់ម៉ោង នៅក្នុងរាជធានីភ្នំពេញ សម្រាប់ការប្រើប្រាស់ក្រោម ៥០ គីឡូវ៉ាត់ម៉ោងក្នុង១ខែ។ ចំពោះការប្រើប្រាស់ពី ៥១ ដល់ ២០០ គីឡូវ៉ាត់ម៉ោងក្នុង១ខែ បញ្ចុះថ្លៃមកត្រឹម ៧២០រៀល ក្នុង១គីឡូវ៉ាត់ម៉ោង និងការប្រើប្រាស់លើសពី ២០០ គីឡូវ៉ាត់ម៉ោងក្នុង១ខែ នឹងមានតម្លៃថ្លៃ ៨២០រៀលក្នុង១គីឡូវ៉ាត់ម៉ោង៕
