មន្ត្រីសង្គមស៊ីវិល ថាពលរដ្ឋពឹងទូតបរទេស ព្រោះអស់ជំនឿលើតុលាការ (vdo)
- ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី១៥ មករា ២០១៤
- កែប្រែចុងក្រោយ: January 15, 2015
- ប្រធានបទ: យុត្តិុធម៌
- អត្ថបទ: មានបញ្ហា?
- មតិ-យោបល់
-
បន្ទាប់ពីគ្មានជំនឿចិត្តលើតុលាការ និងទំនុកចិត្តពីរដ្ឋាភិបាលកម្ពុជានោះ ក្រុមជនរងគ្រោះមានតែងាកមករកបណ្តាស្ថានទូតបរទេសមួយចំនួន ដែលតំណាងឲ្យប្រទេសកាន់លទ្ធិប្រជាធិបតេយ្យ ជាប្រទេសមហាអំណាច និងជាប្រទេសម្ចាស់ជំនួយ និងធ្លាប់ជាម្ចាស់ជំនួយរបស់កម្ពុជា ដើម្បីឲ្យស្ថានទូតទាំងនោះប្រើប្រាស់ឥទ្ធិពលរបស់ខ្លួន ឲ្យតុលាការកាត់ក្ដីដោយយុត្តិធម៌វិញ។ នេះជាការថ្លែងឡើងរបស់ ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្សលីកាដូ លោក អំ សំអាត នៅក្នុងកិច្ចសម្ភាសមួយ ជាមួយអ្នកសារព័ត៌មាន។
លោកបានថ្លែងដូច្នេះ កាលពីព្រឹកថ្ងៃទី១៥ ខែមករា ឆ្នាំ២០១៥នេះ នៅក្នុងឱកាសនៃការប្រមូលគ្នាដាក់ញត្តិរបស់ក្រុមសកម្មជនដីធ្លី ពីសហគមន៍បឹងកក់ បុរីកីឡា និងព្រះសង្ឃប្រមាណជាង១០០នាក់ នៅតាមស្ថានទូតបរទេសចំនួន១០ ប្រចាំនៅកម្ពុជា ដើម្បីស្នើសុំឲ្យតំណាងស្ថានទូតទាំងនោះ ចូលរួមឃ្លាំមើលសវនាការកាត់ក្ដីនៃសាលាឧទ្ទរណ៍ ទៅលើស្រ្តីសកម្មជនដីធ្លីជាប់ឃុំឃាំងទាំង១០នាក់ ដែលនឹងប្រព្រឹត្តិទៅ នៅថ្ងៃទី២២ ខែមករា ឆ្នាំ២០១៥ខាងមុខ។
លោក អំ សំអាត បានលើកឡើងថា ស្រ្តីបឹងកក់ និងបុរីកីឡាទាំង១០នាក់នោះ មិនមានប្រព្រឹត្តិអ្វីដូចការចោទប្រកាន់របស់អាជ្ញាធរ ឬតុលាការឡើយ។ ហើយក៏គ្មានភស្តុតាងណាមួយ សម្រាប់ការចោទប្រកាន់លើពួកគាត់នោះដែរ។ តែផ្ទុយមកវិញ លោកបានចាត់ទុកថា ការចោទប្រកាន់ ការចាប់ខ្លួន ប្រជាពលរដ្ឋទាំងនោះ ដោយអាជ្ញាធរ និងតុលាការ ជាការបំបាក់ស្មារតី ការគម្រាម ការកំហែងដល់ប្រជាពលរដ្ឋទាំងឡាយណា ដែលហ៊ានចេញមុខក្នុងការតវ៉ា ពិសេសក្នុងរឿងដីធ្លី។ មន្រ្តីសិទ្ធិមនុស្សរូបនេះ បានបញ្ជាក់ពាក់ព័ន្ធនឹងការចាប់ខ្លួនថា «នេះមិនមែនជាដំណោះស្រាយទេ។ ទោះមានការចាប់១០ ទៅ២០នាក់ទៀត ក៏នៅតែមានសហគមន៍ចេញមកធ្វើការតវ៉ាជាដដែល។ បញ្ហាសំខាន់ គឺការចេះដោះស្រាយ។ ដូចករណីដីធ្លី ត្រូវធ្វើការដោះស្រាយបញ្ចប់រឿងដីធ្លី នោះទើបអាចបញ្ចប់នូវបញ្ហានៃការតវ៉ារឿងដីធ្លីនេះបានដែរ។»
ហេតុដូច្នេះហើយ ក្តីសង្ឃឹមនឹងកើតមាន ប្រសិនបើមានវត្តមាននៃអង្គទូតនានា ក្នុងការចូលមកឃ្លាំមើលសវនាការ នាពេលខាងមុខ។ មន្ត្រីឯកទេសសិទ្ធិមនុស្សរូបនេះ បានអះអាងទៀតថា ព្រោះអង្គទូតទាំងអស់នេះ ក៏បានតាមដាននូវព្រឹត្តការណ៍ទាំងនោះ និងក៏បានដឹងច្បាស់ដែរថា រាល់ការចាប់ខ្លួនស្រ្តីបឹងកក់ដោយអាជ្ញាធរកម្ពុជា វាមិនត្រឹមត្រូវតាមច្បាប់ឡើយ។ ហើយក៏ជាការរំលោភបំពានទៅលើសិទ្ធិ និងសេរីភាពរបស់ពួកគាត់យ៉ាងធ្ងន់ធ្ងរ។ លោកនិយាយថា៖ «បណ្តាស្ថានទូតទាំងអស់លោក និងមានកិច្ចអន្តរាគមន៍ ជំរុញឲ្យមានការដោះលែងអ្នកទាំងនោះ ឲ្យមានសេរីភាពឡើយវិញ»។
សូមរំលឹកថាស្ត្រីសហគមន៍បឹងកក់ និងបុរីកីឡាទាំង១០នាក់ ត្រូវបានអាជ្ញាធរកម្ពុជាចាប់ខ្លួនកាលពីថ្ងៃទី១០ និងទី១១ ខែវិច្ឆិកា ដោយចោទប្រកាន់ពីបទប្រឆាំងនឹងមន្ត្រីរាជការសាធារណៈ និងបង្កការកកស្ទះចរាចរណ៍សាធារណៈ។ ក្នុងនោះ តុលាការសាលាដំបូងរាជធានីភ្នំពេញ បានធ្វើការពិន័យជាប្រាក់ក្នុងម្នាក់ៗ ពីរលានរៀល និងដាក់ឲ្យជាប់ពន្ធនាគារម្នាក់មួយឆ្នាំ។ ទោសដែលស្រ្តីទាំង១០ បានទទួលនេះ ព្រោះតែពួកគាត់បានទាមទារ ឲ្យមានការដោះស្រាយរឿងទឹកលិចភូមិ និងផ្ទះសំបែងមិនអាចរស់នៅបាន៕
កិច្ចសម្ភាសជាមួយអ្នកសារព័ត៌មាន៖