សម រង្ស៊ី ជិតក្លាយជានាយករដ្ឋមន្ត្រី«សំបក» ខណៈ CPP ថា«គាំទ្រ»
- ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) -យកការណ៍៖ ស្រ៊ុន ទិត្យ- ភ្នំពេញ ថ្ងៃទី១០ មករា ២០១៥
- កែប្រែចុងក្រោយ: January 10, 2015
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
បេក្ខភាពប្រធានក្រុមតំណាងរាស្រ្តភាគតិចក្នុងរដ្ឋសភា ត្រូវបានសម្រេចចេញជារូបរាងហើយ និងកំពុងរង់ចាំការអនុម័ត ក្នុងសម័យប្រជុំរដ្ឋសភាពេញអង្គ បន្ទាប់ពីមានសំណើរ របស់គណបក្សសង្គ្រោះជាតិក្នុងពេលថ្មីៗនេះ។ មិនមានអ្វីគួរឲ្យភ្ញាក់ផ្អើលទេ ព្រោះបេក្ខភាពជាប្រធានក្រុមមតិភាគតិចនៃរដ្ឋសភា នឹងធ្លាក់ទៅលើលោក សម រង្ស៊ី រីឯលោក កឹម សុខា ជាអនុប្រធាន និងមានលោក យឹម សុវណ្ណ ជាលេខាធិការ។ នេះជាការលើកឡើង របស់ប្រធានក្រុមការងារគណបក្សសង្គ្រោះជាតិលោក គួយ ប៊ុនរឿន នាវិមានរដ្ឋសភាជាតិ នាល្ងាចថ្ងៃទី០៩ ខែមករា ឆ្នាំ២០១៥។
ការតែងតាំងលោក សម រង្ស៊ី ដែលនឹងមានថានៈស្មើនឹងនាយករដ្ឋមន្រ្តី និងគណៈកម្មាការក្រុមមតិភាគតិចខាងលើនេះ ត្រូវបានតំណាងក្រុមការងារ នៃគណបក្សប្រជាជនកម្ពុជា លោក ប៊ិន ឈិន ឯកភាពគាំទ្រ។ លោកបានបញ្ជាក់ថា៖ «គាត់ប្រធានគណបក្ស ធម្មតាទេ បើដឹកនាំប្រធានក្រុមមតិភាគតិច (នៃរដ្ឋសភា) វាត្រឹមត្រូវហើយ ជូនគាត់ទៅ! គណបក្សប្រជាជនមិនមានយល់អ្វី! អបអរសាទរទៅ! (…) សិទ្ធិ (ប្រធានក្រុមមតិភាគតិច) ក៏មានបញ្ជាក់ស្រាប់ ក្នុងបទបញ្ជាផ្ទៃក្នុងដែរតើ។»
ក្នុងកិច្ចប្រជុំអនុម័តមាត្រា៤៨ថ្មី (ពីរ) នៃបទបញ្ជាផ្ទៃក្នុងរដ្ឋសភា ប្រធានក្រុមតំណាងរាស្ត្រភាគតិចនៃរដ្ឋសភា ដែលមានឋានៈស្មើនាយករដ្ឋមន្ត្រី ត្រូវបានផ្តួចផ្តើមឡើង ដោយលោក សម រង្ស៊ី និងមានសម្លេងគាំទ្រ ពីសមាជិករដ្ឋសភា១០២រូប។ លោក សម រង្សី ធ្លាប់បញ្ជាក់ថា នេះជាការបើកផ្លូវ សម្រាប់គណបក្សនយោបាយផ្សេងៗទៀត ចូលរួមនាអាណត្តិក្រោយៗទៀត។ ប្រធានក្រុមប្រធានក្រុមតំណាងរាស្ត្រភាគតិចនេះ មានឋានៈស្មើនាយករដ្ឋមន្ត្រី និងជាដៃគូសន្ទនាជាមួយប្រមុខរដ្ឋាភិបាល តែគ្មានអំណាចបញ្ជារដ្ឋាភិបាល និងកងកម្លាំងប្រដាប់អាវុធនោះឡើយ។
ល្បែងរបស់គណបក្សប្រជាជនកម្ពុជា
សម្រាប់អ្នកឃ្លាំមើលស្ថានការនយោបាយ និងអ្នកស្រាវជ្រាវសង្គម លោក កែម ឡី វិញ បានយល់ថា ការបង្កើតឱ្យមានក្រុមមតិភាគតិច នៅក្នុងសភា ជារឿងរឿងឥតប្រយោជន៍ និងខាតពេលវេលា។ លោកបានថ្លែងឡើងថា នេះជាល្បែងរបស់គណបក្សប្រជាជនកម្ពុជា ដែលកាន់អំណាចជាង៣០ឆ្នាំ ហើយគណបក្សសង្រ្គោះជាតិ កំពុងតែដើរចូលអន្ទាក់ របស់គណក្សកាន់អំណាចមួយនេះ ដោយខ្លួនឯង។
លោក កែម ឡី បានពន្យល់ថា បើទោះបីជាប្រធានក្រុមមតិភាគតិច ដែលមានឋានៈស្មើនាយករដ្ឋមន្រ្តីក៏ដោយ ប៉ុន្តែគ្មានសិទ្ធសម្រេចអ្វីទាំងអស់។ អ្នកវិភាគបញ្ហាសង្គមរូបនេះ បានបញ្ជាក់ទៀតថា៖ «ជារួម នៅក្នុងប្រទេសកាន់លិទ្ធិប្រជាធិបតេយ្យសេរីពហុបក្ស សេចក្តីសម្រេចទាំងឡាយ ត្រូវនៅលើរដ្ឋសភា មតិ៥០បូក ឬមតិភាគច្រើនដាច់ខាត អញ្ចឹងបើមានប្រធានក្រុមអ្នកតំណាងរាស្រ្ត ឬប្រធានក្រុមមតិភាគតិចអីក៏ដោយ ក៏មិនមានប្រយោជន៍អ្វីដែរ ព្រោះយើងត្រូវការសម្រេចក្នុងសភាពេញអង្គ ៥០បូក១»៕