តើថ្ងៃ​៧​មករា គួរ​នៅ​ជា​ថ្ងៃ​ឈប់​សម្រាក​បុណ្យ ឬ​គួរ​ត្រូវ​ចាត់​ទុក​គ្រាន់​ជា​ទំព័រ​ប្រវត្តិ​សាស្ត្រ​មួយ? តើ​ថ្ងៃ​៧​មករា មាន​អត្ថន័យ​បែប​ណា ដើម្បី​ឲ្យ​ក្លាយ​​ជា​ថ្ងៃ​បុណ្យ​​ពិត​​ប្រាកដ​​របស់​ជាតិ​នោះ? សូម​តាម​ដាន​ពី​មតិ​​មួយ​ចំនួន ដែល​​លើក​ឡើង​ ពី​ថ្ងៃ​៧​មករា​នេះ ថា​តើ​ពួក​គេ​ឲ្យ​តម្លៃ​វា​ប៉ុណ្ណា និង​យ៉ាង​ដូច​ម្ដេច។

លោកគ្រូ ហង្ស រិទ្ធិរ៉ាវុធ នៅ​សាកល​វិទ្យាល័យ​តូរ​តន្រ្តី​មួយ ​ក្នុងរាជធានី​ភ្នំពេញ បាន​លើក​ឡើង​ប្រាប់​ទស្សនាវដ្តី​មនោរម្យ.អាំងហ្វូថា លោក​មិន​ចង់​ឲ្យ​មាន​ការ​លុប​ចោល ពី​ប្រតិទិន​របស់​រដ្ឋ​នោះ​ទេ មិន​ថា​ពេល​បច្ចុប្បន្ន ឬ​ក៏​នៅ​ពេល​គណៈបក្ស​ណា​មួយ​ ជាប់​ឆ្នោត​ក៏​ដោយ។ លោក​គ្រូ​បញ្ជាក់​ថា ថ្ងៃ​នេះ​ បាន​ដក់​ជាប់​ក្នុង​ចិត្ត​ប្រជាជន​ខ្មែរ​មួយ​ចំនួន ដែល​ធ្លាប់​រង​ទុក្ខ នៅ​សម័យ​៣​ឆ្នាំ​៨​ខែ​២០​ថ្ងៃ ក៏​ជា​ថ្ងៃ​ដែលពួក​គាត់ ​បាន​មាន​សេរីភាព​ឡើង​វិញ។ លោកថា ​បើ​តាម​រដ្ឋធម្មនញ្ញ មិន​មាន​ត្រង់​ចំនុច​មួយ​ណា ​ដែល​ថា​ថ្ងៃ​៧មករា ឬ​ថ្ងៃ​២៣​តុលា មិន​មែន​ជា​បុណ្យ​ជាតិ​នោះ​ទេ។

លោកបានពន្យល់ថា កាលពីរបប៣ឆ្នាំ៨ខែ២០ថ្ងៃ ឲ្យតែមានអ្នកណាម្នាក់ មកជួយសង្គ្រោះមិនថា មកពី​ណា​នោះទេ  គិតតែពីដឹងគុណគេ ទុកអ្នកដែល​ជួយឋានៈស្មើ ទេវតា។ ហើយថែមទាំងមិនជីកឬសគល់ថា ហេតុអ្វី​បានជាគេជួយរំដោះនោះទេ គិតតែពីថាល្អ ថ្ងៃដ៏មានគុណ។

សម្រាប់លោក អ៊ូ វីរៈ ប្រធានអង្គការវេទិកាអនាគត បាននិយាយថា គូតែលុប​ចេញពីថ្ងៃបុណ្យជាតិ ព្រោះ​ថ្ងៃ​បុណ្យ​ជាតិ​នៅប្រទេសកម្ពុជា មានច្រើន​ណាស់។ លោកថា បើនិយាយថា​ថ្ងៃនេះ​ជាថ្ងៃរំដោះ ក៏វាមិនខុសដែរ ប៉ុន្តែ​បើសិន​ជា​គេ​ទុក​ថ្ងៃ៧មករា ជាថ្ងៃរំដោះ ក៏ត្រូវទុកថ្ងៃ ២៣តុលា និងថ្ងៃ៩វិច្ឆិការ ជាថ្ងៃរំដោះសំខាន់​ខ្លាំង​ដូច​គ្នា។

ការលើកឡើងរបស់លោក អ៊ូ វីរៈ ប្រហាក់ប្រហែលនឹង ការថ្លែងរបស់លោកសាស្ត្រាចារ្យ ហង្ស រិទ្ធិរ៉ាវុធ ដែរ។ លោកសាស្ត្រាចារ្យ បានលើកថា ថ្ងៃបុណ្យ​ជាតិ ដូចថ្ងៃ២៣តុលា ម្តងបាត់ម្តងឃើញ ឆ្នាំខ្លះធ្វើ ឆ្នាំខ្លះអត់។ ផ្ទុយ​មកវិញ តែបើថ្ងៃ៧មករាវិញ មានអ្នកគោរពធ្វើជាប្រចាំ មិនដែលខាន លោកថាបុណ្យ​ទាំងពីរនេះ មានតម្លៃ​ស្មើ​គា្ន ដូច្នេះមិនគួរលុបចោល ត្រូវទុកក្នុងប្រតិទិនរដ្ឋទាំងពីរ។

ផ្ទុយទៅវិញនិស្សិតស្រីម្នាក់ នៅសាកលវិទ្យាល័យបញ្ញាជាតិ ឆ្នាំទី២ ផ្នែកអក្សសាស្ត្រ បានថ្លែងក្នុងលក្ខខណ្ឌ​មិន​បញ្ចេញឈ្មោះថា គួតែលុបចេញ ពី​ប្រតិទិន​របស់រដ្ឋ ព្រោះថាថ្ងៃនេះ បើតាមភាពជាក់ស្តែង គឺមានការ​ប្រារព្ធ​តែម្ខាង ហើយចំនែកឯម្ខាងទៀត មិនដែលមានការចូលរួមទេ។ នាងបន្តទៀតថា មាន​ប្រជាជនជាច្រើន ស្ទើ​ពាក់​កណ្តាលមិនបានគិតថា ថ្ងៃ៧មករាជាថ្ងៃ ផ្តល់សេចក្ដីសុខ ឲ្យពលរដ្ឋខ្មែរនោះទេ។

រីឯយុវជនម្នាក់ទៀត ក៏បានឲ្យដឹងដែរថា ថ្ងៃ៧មករា ឆ្នាំ១៩៧៩ របស់គណបក្សប្រជាជនកម្ពុជា ដែលបាននាំ​កងទ័ពយួនកុម្មុយនីស មកវាយផ្តួល​រំលំ​របប​ខ្មែរក្រហមនេះ គួតែលុបបំបាត់ចេញ ព្រោះមិនបានផ្ដល់​វឌ្ឍនភាព​ដល់សង្គមខ្មែរឡើយ។ យុវជនបានថ្លែងឡើងទៀតថា៖ «តាំងពីខ្ញុំបានរួច ពីរបបខ្មែរ​ក្រហម​មក មានការ​អភិវឌ្ឍន៍ តែជានិច្ចជាកាល តែងឃើញតែពលរដ្ឋរងទុក្ខវេទនា ស្ទើតែគ្រប់កន្លែង នៅក្នុងប្រទេស»។

ប៉ុន្តែ លោក អ៊ូ វីរៈ បានបញ្ជាក់វិញថា ដើម្បីកុំឲ្យកូនខ្មែរច្រឡំប្រវតិសាស្រ្ត និងមិនមានសង្គ្រាមស៊ីវិល គួតែ​លុបចោលទាំងពីរ ហើយរួមគ្នា​បង្រួបង្រួម​ជាតិ​ឡើងវិញ ដើម្បីកុំឲ្យប្រទេសជិតខាងមើលងាយ។ លោកថា ចំពោះអ្នកប្រឆាំង ក៏មិនគួរប្រឆាំងដាច់ណាត់ពេកនោះដែរ ហើយចំពោះអ្នកកាន់អំណាច ក៍មិនគួរ​អាង​អំណាច​​ពេកនោះដែរ ដើម្បីឲ្យប្រទេសមានភាពរីកចម្រើន។

ដោយឡែក លោក ណែម ស៊ិនថៃ នាយកវិទ្យាស្ថាន តស៊ូមតិនយោបាយ បានលើកឡើងថា កូនខ្មែរទាំងអស់ គួរតែកុំយកថ្ងៃប្រវត្តិសាស្ត្រមកលាយឡំ ជាមួយរឿងនយោបាយ។ ថ្ងៃប្រវតិសាស្រ្តផ្សេង អ្នកធ្វើនយោបាយ​ផ្សេង។ មានមនុស្សជាច្រើនគិតថា ថ្ងៃប្រវត្តិសាស្រ្ត៧មករាជា ថ្ងៃដែលគេប្រារព្ធ សម្រាប់​នយោបាយតែម្ខាង វាជារឿងមួយដែលយើងបែងចែកមិនច្បាស់លាស់ ។ លោកថាគួតែទុកថ្ងៃនេះ ជាថ្ងៃបុណ្យជាតិបន្តទៅទៀត ព្រោះ​វាជា​ប្រវត្តិសាស្ត្រ ដែលកូនខ្មែរគ្រប់រូប មិនអាចបំភ្លេចបាន៕