កាលពីម្សិលម៉ិញ អ្នកនាង ធី សុវណ្ណថា អតីតតារាហ្វេសប៊ុកដ៏ល្បី បានសរសេរគម្រាម ដោយមិនចេញឈ្មោះ ទៅលើ«លោក»ម្នាក់ ដែលបាន«ជេរ ប្រមាថ និងប្ដឹង» នាង តាំងពី៤ឆ្នាំមកហើយ ដោយលើកឡើងថា៖ «បើលោកឯងជាប់គុក ឬរត់ចោលស្រុក កុំបន្ទោសខ្ញុំ»។

ប្រសិនជាយុវតី សកម្មនារីគណបក្សកាន់អំណាច និងជាមនុស្សស្និត នឹងលោកនាយករដ្ឋមន្ត្រី ហ៊ុន សែន រូបនេះ មិនបញ្ចេញឈ្មោះ ពី«លោក»ម្នាក់នោះ ថា​ជានរណាក្ដី តែភិនភាគ និងរឿងរ៉ាវ អាចធ្វើឲ្យ​អ្នកប្រើប្រាស់​បណ្ដាញ​សង្គម​ទាំង​ឡាយ​យល់​ភ្លាម ថាយុវតីវ័យ២៣ឆ្នាំរូបនេះ កំពុងនិយាយពីលោក សុខ សុវណ្ណ​វឌ្ឍនា​សាប៊ុង ហៅ វីល្លៀម ក័ង (William Guang) ដែលអ្នកនាងកំពុងមានបញ្ហាក្ដីក្ដាំជាមួយ នៅឯតុលាការ។

អ្នកនាង ធី សុវណ្ណថា បានសរសេរឡើងថា៖ «លោកជេរខ្ញុំ៤ឆ្នាំ​ ខ្ញុំអធ្យាស្រ័យឲ្យលោក។ លោកនៅតែតាមប្រមាថជេរខ្ញុំ ដាក់ពាក្យប្តឹងខ្ញុំ ខ្ញុំនៅតែអាណិត​ និងបន្តអធ្យាស្រ័យឲ្យលោក។​ ថ្មីៗនេះ​ លោកជំរុញនិតិវិធីច្បាប់​ ឲ្យកោះហៅខ្ញុំ​។ ការអធ្យាស្រ័យអត់ធ្មត់​ខ្ញុំ ដល់ដែនកំណត់ហើយ បើលោកជាប់គុក​ រឺរត់ចោលស្រុក​ កុំបន្ទោសខ្ញុំ​...។»។

កាលពីដើមខែកុម្ភៈ លោក វីល្លៀម ក័ង បានដាក់ពាក្យបណ្ដឹង ប្ដឹងអតីតតារាហ្វេសប៊ុក ពីបទ«បរិហារកេរ្តិ៍ ជាសាធារណៈ និងញុះញង់ ឲ្យមានការរើសអ៊ើង» ទៅកាន់សាលាដំបូងរាជធានី។ ហើយនៅក្នុងបណ្ដឹងនេះ លោក ខាំ សុផារី ព្រះរាជអាជ្ញារង នៃអយ្យការ អមសាលាដំបូង បានចេញដីកា កាលពីថ្ងៃព្រហស្បត្តិ ទី២២ ខែមីនាសប្ដាហ៍មុន កោះហៅអ្នកនាង ធី សុវណ្ណថា ឲ្យចូលខ្លួន​ទៅកាន់សាលាដំបូង នៅថ្ងៃទី៩ ខែមេសាខាងមុខ ដើម្បីធ្វើការ «សាកសួរ»។

ក្រុមមេធាវី ការពារក្ដីឲ្យអតីតតារាហ្វេសប៊ុក បានថ្លែងប្រាប់សារព័ត៌មានក្នុងស្រុកថា ពួកខ្លួនកំពុងធ្វើនីតិវិធី ដើម្បីសុំពន្លឿនថ្ងៃកោះហៅនោះ ពីថ្ងៃ៩ ខែមេសា មកថ្ងៃទី៥ ខែមេសាវិញ ក្រោមមូលហេតុថា កូនក្ដីរបស់ផងខ្លួន ត្រូវចាកចេញ ទៅប្រទេសកូរ៉េខាងត្បូង នៅថ្ងៃទី៨ ខែមេសា មួយថ្ងៃមុនថ្ងៃកោះ​ហៅ។

នៅចំពោះការគម្រាម ដោយប្រយោលខាងលើ របស់សកម្មនារី​របស់​គណបក្ស​ប្រជាជនកម្ពុជា លោក សុខ សុវណ្ណ​វឌ្ឍនា​សាប៊ុង បានប្រកាសតបវិញ ថា លោកមិន«​ញញើត»​អ្វីឡើយ។ លោកថា៖ «មុនខ្ញុំឈានជេីង មកប្រឡូកនយោបាយ ខ្ញុំមិនដែលញញេីត គុកច្រវ៉ាក់មឈូសទេ សុំជ្រាប ហេីយកុំយក [គុកច្រវ៉ាក់មឈូម] មកគម្រាម ទៅអត់រួចទេ!»។

លោក វីល្លៀម ក័ង បានបន្តទៀតថា៖ «ខ្ញុំបម្រេីផលបយោជន៍ប្រជាជន ប្រជាជាតិ និង[ប្រឆាំង]ការឈ្លានពាន[ពី]បរទេស ដោយមិនខ្លាចរអារ មិនញញេីត មិនរាថយ មិនចុះចាញ់ និងមិនចុះចូល»៕