អ្នកស្រី ឡាក់ សុភា ដែល​ទើប​នឹង​ត្រូវ​បាន បណ្ដេញ​ចេញ​ពី​គណបក្ស​សង្គ្រោះ​ជាតិ កាល​ពី​ពេល​ថ្មីៗ​នេះ ត្រូវ​បាន​តារា​សម្តែង​លោក សុភ័ណ្ឌ ឡារី តាម​បំបាក់​មុខ​យ៉ាង​ជូរ​ចត់​ជា​សាធារណៈ។ តារា​មិន​សូវ​ល្បី​ឈ្មោះ និង​ស្និត​នឹង​គណបក្ស​សង្គ្រោះ​ជាតិ​រូប​នេះ បាន​ទៅ​ទារ​ប្រាក់​បំណុលពី​អ្នកស្រី ឡាក់ សុភាព នៅ​កណ្ដាល​ចំណោម ខណៈ​ពេល​ដែល​អ្នកស្រី កំពុង​ធ្វើ​បាតុកម្ម​នៅ​មុខទី​ស្នាក់ការ​កណ្តាល របស់​គណៈបក្ស​សង្រ្គោះ​ជាតិ​នា​ព្រឹក​នេះ។

ការ​មក​ទារ​បំណុល​នេះ លោក សុភ័ណ្ឌ ឡារី មិន​បាន​បញ្ជាក់​ថា លោក​ស្រី​ជំពាក់​បំណុល​លោក តាំង​ពី​ពេល​ណាមក​នោះ​ទេ ប៉ុន្តែ​លោក​គ្រាន់​តែ​បញ្ជាក់​ថា អ្នក​ស្រី ឡាក់ សុភាព បាន​ខ្ចី​លុយ​បង​ស្រី​របស់​លោក ដូច្នេះ​ថ្ងៃ​នេះ​ជំនួស​ឲ្យ​បង​ស្រី លោក​មក​ទារ​លុយ​នោះ​វិញ។ លោក​បាន​បញ្ជាក់​ទៀត​ថា លុយ​ដែលអ្​នកស្រី ឡាក់ សុភាព ខ្ចី​នោះ មាន​ចំនួន ៣០០​ដុល្លារ​អាមេរិក។

នៅលើចិញ្ចើមថ្នល់ កន្លែងដែលអ្នកស្រី ឡាក់ សុភាព កំពុងធ្វើបាតុកម្ម លោក សុភ័ណ្ឌ ឡារី បានទាញដៃ​អ្នក​ស្រីចេញមកក្រៅ ដើម្បីឲ្យសងប្រាក់។ ប៉ុន្តែផ្ទុយមកវិញ អ្នកស្រី ឡាក់ សុភាព បានដើរចេញពីលោក សុភ័ណ្ឌ ឡារី និងពីក្នុងហ្វូងមនុស្ស ដែលកំពុងស្រែកដៀលត្មិះអ្នកស្រីថា អ្នកស្រីកំពុងត្រូវ​បានគេទិញ​ទឹកចិត្ត។

ភ្លាមៗនោះ ឆ្លើយតបទៅនឹងលោក សុភ័ណ្ឌ ឡារី ដែលមកទារបំណុល នៅមុខមហាជនដូច្នេះ អ្នកស្រី ឡាក់ សុភាព បានបដិសេធទាំងដាច់អហង្ការថា អ្នកស្រីមិនបានជំពាក់បំណុលនរណាឡើយ។

ប៉ុន្តែក្នុងវីដេអូ ដែលទស្សនាវដ្ដីមនោរម្យ.អាំងហ្វូផ្តិតរូបភាពបាន មិនមានតែលោក សុភ័ណ្ឌ ឡារី តែម្នាក់ទេ ដែលមកទារប្រាក់ពីអ្នកស្រី ឡាក់ សុភាព តែនៅមនុស្សជាច្រើននាក់ផ្សេងទៀត ក៏បានមកទារប្រាក់​ពី​អ្នកស្រី​ដែរ ក្នុងនោះរួមមានទាំងអ្នកលក់កាហ្វេ នៅក្បែរទីស្នាក់ការគណបក្សនោះផង។

រូបភាពនេះ បានធ្វើឲ្យមតិមួយចំនួនបានគិតថា ជាការរំខានការមកជួបប្រជុំធ្វើការតវ៉ា របស់អ្នកស្រី ឡាក់ សុភាព ប្រឆាំងទៅនឹងការសម្រេច របស់គណបក្សសង្គ្រោះជាតិកាលពីពេលថ្មីៗនេះ បណ្ដេញអ្នកស្រី​ចេញ​ពី​គណបក្ស។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់បន្ថែមពីលោក សុភ័ណ្ឌ ឡារី ទាក់ទងនឹងបំណុលនេះ​បាន​នៅឡើយ។ រីឯអ្នកស្រី ឡាក់ សុភាព វិញ ក៏មិនអាចសុំការបកស្រាយបាននៅឡើយដែរ នៅពេលនេះ។ ប៉ុន្តែ​នៅលើទំព័រហ្វេសប៊ុករបស់លោក សុភ័ណ្ឌ ឡារី គេឃើញលោកបានយករូបថត ដែលថតព្រឹត្តិការណ៍​ទារ​បំណុល ពីកូនបំណុលមកបង្ហោះផ្សាយ ហើយមានមនុស្សម្នាអ្នកប្រើប្រាស់បណ្ដាញសង្គម យករូបថត​ទាំង​នេះ ទៅចែករំលែកយ៉ាងច្រើន៕