ផ្លាកលេខម៉ូតូចម្លែក «គីគីលូ» អានហើយចង់សើច!
- ដោយ: ក. សោភណ្ឌ អត្ថបទ និងយកការណ៍៖ ក.សោភ័ណ្ឌ ([email protected]) - ភ្នំពេញ៣១ ធ្នូ ឆ្នាំ២០១៤
- កែប្រែចុងក្រោយ: December 31, 2014
- ប្រធានបទ: ពីនេះពីនោះ
- អត្ថបទ: មានបញ្ហា?
- មតិ-យោបល់
-
ពាក្យថា «អាប៉ូយ, គីគីលូ, ចេញក៏ដឹង ចូលក៏ដឹង» ទាំងនេះធ្លាប់តែលឺ នៅក្នុងសាច់រឿងកំប្លែង របស់នាយ ពាក់មី ដែលធ្វើឲ្យអ្នកទស្សនាជាច្រើន បានសើចសប្បាយ មិននឹកស្មានថា ទៅជាមានមនុស្សយកវាមកធ្វើជា ផ្លាកលេខម៉ូតូទៅវិញ។ ប៉ុន្តែការលេងសើចនេះ មិនមានផលចំណេញរបស់វាទេ ព្រោះម្ចាស់ម៉ូតូត្រូវបានឃាត់ខ្លួន រួចក្នុងពេលបន្ទាប់មក សម្ថកិច្ចកំពុងតែស្រាវជ្រាវ រកអ្នកផលិតផ្លាកលេខនេះបន្តទៀត។
ស្រង់សម្តីពីស្ថានីយ៍ទូរទស្សន៍ ស៊ីអិនស៊ី (CNC) ដែលបានចេញផ្សាយក្នុងស្រុកបានឲ្យដឹងថា អក្សរដែល សរសេរចេញនៅលើផ្លាកលេខម៉ូតូនោះ មិនមែនដូចម៉ូតូធម្មតាទេ គឺមានលក្ខណៈក្លែងបន្លំ រួមជាមួយនឹងភាពលេងសើច និងជាពិសេសធ្វើឲ្យពលរដ្ឋទូទៅយល់ច្រឡំ។ ទូរទស្សន៍នេះ បានរាយការណ៍ទៀតថា ពីមុនធ្លាប់មានម្តងដែរ ទាក់ទងទៅនឹងបញ្ហានេះ។ ប៉ុន្តែ បន្ទាប់ពីមានការចុះបង្ក្រាបពីសមត្ថកិច្ចមក ទើបស្ងាត់ រហូតមកដល់ឥឡូវ ស្រាប់តែកើតមាន រឿងនេះ ជាថ្មីម្តងទៀត។
នៅក្នុងរូបភាពរបស់ទូរទស្សន៍ក្នុងស្រុកមួយនេះ គេឃើញបុរសម្ចាស់ម៉ូតូ ដែលមានផ្លាកលេខម៉ូតូខុសពីគេ នៅក្នុងប្រទេសកម្ពុជា ស្ថិតនៅក្នុងវ័យប្រមាណជាជិត២០ឆ្នាំ ហើយមានរចនាម៉ូតសក់ប្លែកផង។
វីដេអូនេះ ត្រូវបានអ្នកប្រើប្រាស់បណ្ដាញសង្គម យកមកផ្សព្វផ្សាយ ហើយទទួលការចូលចិត្តជាង៨០០ និងការចែករំលែកជិត៦០០ដង។ ក្រុមអ្នកទស្សនាវីដេអូ បានបានបញ្ចេញយោបល់ផ្សេងពីគ្នា។ ម្នាក់ពីក្នុងនោះ បានសរសេររិះគន់ថា៖ «វ័យប៉ុណ្ណឹង គួធ្វើអីមួយឲ្យល្អក្នុងសង្គម ជាគំរូដល់យុវជនដ៏ទៃទៀត» ខណៈម្នាក់ទៀត បានសរសេររិះគន់ទៅសមត្ថកិច្ចវិញថា៖ «ចាប់ស្លាកហាងដាក់អក្សរយួនផង នៅមណ្ដលគីរី»។ អ្នកខ្លះបានសរសេរថា មើទៅបុរស់ម្នាក់នោះ ស្រឡាញ់ក្រុមកំប្លែងខ្លាំងពេកហើយ។ ម្នាក់ទៀតបានសរសេរថា៖ «ស្រុកខ្មែរ យូរៗទៅ ឆ្កួតតាមតារាកំប្លែងអស់ហើយ!»៕