នៅក្នុងលិខិត​របស់​គណបក្ស​សង្គ្រោះ​ជាតិ​មួយ​ច្បាប់ ចុះ​ថ្ងៃ​ទី២៣ ខែ​ធ្នូ ឆ្នាំ​២០១៤​នេះ ដែល​ទស្សនាវដ្តី​មនោរម្យ.អាំងហ្វូ បាន​ទទួល​ក្នុង​ព្រឹក​ថ្ងៃ​ទី​២៤ ខែ​ធ្នូ​នេះ បាន​សរសេរ​ប្រកាស​ជា​សាធារណៈ​ថា មិន​ទទួល​ស្គាល់​លើ​«សកម្មភាព» និង​«មតិ»​លើក​ឡើង របស់​លោក សុន ឆ័យ ឡើយ។

លិខិតនេះបានចេញផ្សាយ បន្ទាប់​ពី​លោក សុន ឆ័យ ធ្វើការ​ព្រមាន​ឲ្យ​អាជ្ញាធរ​ជាតិ​អប្សារា ផ្តល់​ឯកសារ​សម្ងាត់​ទាំង​អស់ ដូច​ជា​ការ​ចុះ​កិច្ច​សន្យា ជួល​ប្រាសាទ​អង្គរ​វត្ត​ជា​ដើម។ ក្រុម​ការងារ​របស់​លោក សុន ឆ័យ បាន​រក​ឃើញ​ថា មាន​ការ​«លួច​បំបាត់​ថវិកា​ជាតិ»​យ៉ាង​ធ្ងន់​ធ្ងរ។

ការព្រមានទៅលើអាជ្ញាធរអប្សរានេះ បន្ទាប់ពីក្រុមការងារ នៃគណៈកម្មការហិរញ្ញវត្ថុ ធនាគារ និង សវនកម្ម​នៃរដ្ឋសភា បានចុះការងារជាក់ស្តែង ដល់ទីតាំងរបស់អាជ្ញាធរជាតិអប្សរា ក្នុងខេត្តសៀមរាប រយៈពេលបួនថ្ងៃ ចាប់បីថ្ងៃទី ២១ ដល់ថ្ងៃទី២៤ ខែធ្នូ កន្លងមកនេះ។ ការអង្គេតការងារនេះ រួមដំណើរដោយលោក ប៊ុន ណារិទ្ធ អគ្គនាយកអាជ្ញាធរជាតិអប្សរា ដើម្បីសិក្សាពីចំណូលអង្គរវត្ត និងភាពមិនប្រក្រតីមួយចំនួនក្នុងខេត្ត​សៀមរាប។ លោក សុន ឆ័យ បានបង្ហាញការភ្ញាក់ផ្អើលយ៉ាងខ្លាំង ដោយចំនួនអ្នកទេសចរណ៍ ក្នុងឆ្នាំ២០១៤​នេះ ចូល​ទស្សនាប្រាសាទអង្គវត្ត មានត្រឹមតែមួយលាននាក់ នៃអ្នកទេសចរណ៍សរុបជាងប្រាំលាននាក់នោះ។

តាមលិខិតលេខ២១១/១៤ ខាងលើដដែលបានសរសេរបន្តថា «រាល់សម្មភាព និងមតិរបស់លោក សុន ឆ័យ ពេលកន្លងមក និងដល់បច្ចុប្បន្ននេះ ជាមតិផ្ទាល់របស់លោក ដោយមិនបានឆ្លងការយល់ព្រម ពីថ្នាក់ដឹកនាំ​គណបក្សសង្គ្រោះជាតិឡើយ ដែលនាំឲ្យប៉ះពាល់ដល់កិច្ចព្រមព្រៀង គណបក្សទាំងពីរ។» ក្នុងលិខិតនោះ​បាន​សរសេរទៀតថា ទាំងសកម្មភាព និងមតិរបស់លោក សុន ឆ័យ មិនមែនជាជំហរ​របស់គណបក្ស​សង្គ្រោះ​ជាតិឡើយ។

លោក សុន ឆ័យ អនុប្រធានគណៈកម្មការហិរញ្ញវត្ថុ ធនាគារ និង សវនកម្មនៃរដ្ឋសភា មកពីគណបក្ស​សង្រ្គោះជាតិ បានបញ្ជាក់ប្រាប់ទស្សនាវដ្តីមនោរម្យ.អាំងហ្វូ ថា លោកនៅមិនទាន់បានឃើញ ឬទទួលលិខិត​នោះ​នៅឡើយទេ។ បើយោងតាមអត្ថន័យក្នុងលិខិត លោកក៏បានធ្វើការបដិសេធចោល ដោយបញ្ជាក់ថា​ជាលិខិត«ក្លែង»។ លោក គ្រាន់តែបានបញ្ជាក់យ៉ាងខ្លីថា នោះជាលិខិត«ក្លែង»។

ទស្សនាវដ្តីមនោរម្យ.អាំងហ្វូ មិនអាចនាំការបញ្ជាក់បន្ថែម ពីមន្រ្តីនាំពាក្យគណបក្សសង្គ្រោះជាតិ​បានទេ​ក្នុង​ថ្ងៃនេះ ដោយលោកមិនទទួលទូរស័ព្ទ។ តែតាមការបញ្ជាក់របស់មន្រ្តីច្បាប់ជាន់ខ្ពស់មួយរូប ដែលសុំមិន​បញ្ចេញ​ឈ្មោះបានលើកឡើងថា ពេលនេះគណបក្សសង្គ្រោះជាតិ នៅមិនទាន់មានវិធានការណា​មួយនៅ​ឡើយទេ ព្រោះរង់ចាំការពិភាក្សាជាមួយប្រធានក្រុមប្រឹក្សាវិន័យសិន។

មន្រ្តីរូបនេះបានបន្តថា នេះជាលិខិតក្លែង នៃជនអនាមិក ដែលយកទម្រប់ដើម នៃលិខិតរបស់គណបក្ស មកធ្វើការក្លែង ដោយបង្ខូចកេរ្តិ៍ឈ្មោះ គណបក្សសង្គ្រោះជាតិ កេរ្តិ៍ឈ្មោះបុគ្គល (សុន ឆ័យ) និងកេរ្តិ៍ឈ្នោះ​របស់ស្ថាប័នរដ្ឋសភា ដែលលោក សុន ឆ័យ កំពុងបំពេញការងារនេះ។

មន្ត្រីច្បាប់គណបក្សសង្គ្រោះជាតិ បាននិយាយពន្យល់ថា៖ «លិខិតក្លែងនេះ បានធ្វើឲ្យប៉ះពាល់ទៅ​លើចំណុច​បីយ៉ាង មួយគណបក្សដែលជានីតិបុគ្គល ទីពីរប៉ះពាល់ផ្ទាល់ដល់បុគ្គលដែលខិតខំបំពេញការងារ និងទីបី​ប៉ះពាល់ដល់ស្ថាប័នរដ្ឋសភា ដែលត្រូវធ្វើក្នុងនាមជាតិ និងប្រជា។ (...) យើងនឹងឆ្លងយោបល់ ពីប្រធាន​គណៈ​កម្មការនាយក ទៅលើបុគ្គល និងលិខិតក្លែងនេះ។ (...) ការក្លែងមិនចាំថាលើកទីមួយ ឬទីពីរទេ បុគ្គលដែល​បានក្លែង ត្រូវតែអនុវត្តទោសទៅតាមច្បាប់ទាំងអស់។»៕