ពលរដ្ឋ​ឆ្លង​អេដស៍​ឃុំ​រកា កើន​ជិត​១៥០​នាក់ ខណៈ​នាយក​រដ្ឋ​មន្រ្តី​«មិន»​ជឿ​៩៩%

ចំនួននៃអ្នកឆ្លងជំងឺអេដស៍ ក្នុងឃុំរការ ស្រុកសង្កែ ខេត្តបាត់ដំបង មកទល់ថ្ងៃទី២២ ខែធ្នូ ឆ្នាំ២០១៤នេះ បាន​កើន​ឡើង​ដល់​ជិត​១៥០​នាក់​ហើយ ខណៈលោកនាយករដ្ឋមន្រ្តី ហ៊ុន សែន អាចទទួល របាយការណ៍«ខុសបច្ចេកទេស» ពី​មន្រ្តី​ដែល​រាយការណ៍នោះ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី២២ ធ្នូ ២០១៤
  • កែប្រែចុងក្រោយ: December 22, 2014
  • ប្រធានបទ: សុខភាព
  • អត្ថបទ: មានបញ្ហា?
  • មតិ-យោបល់

ចំនួនប្រជាពលរដ្ឋបាន​ឆ្លង​ជំងឺ​អេដស៍​នេះ កើន​ដល់​១៤០​នាក់​ហើយ នៃ​អ្នក​ភូមិ​ដែល​បាន​ធ្វើ​តេស្ត​ជាង​១០០០​នាក់។ នេះ​បើ​តាម​ការ​បញ្ជាក់​របស់ វិទ្យាស្ថាន​ប៉ាស្ទ័រ ដែល​ត្រូវ​បាន​ថ្លែង​បន្ត​ ដោយ​ប្រធាន​គណៈ​កម្មការ​ទី​៨ នៃ​រដ្ឋសភា លោក​ស្រី កែ សុវណ្ណរតន៍ ក្រោយ​ពី​ជួប​សំណេះ​សំណាល ជា​មួយ​ប្រជា​ពលរដ្ឋ​ទាំង​អស់។ ក្រៅ​ពី​ការ​ពិនិត្យ និង​ស្រាវ​ជ្រាវ​រក​មូលហេតុ​ពិត​ប្រាកដ​នៃ​រឿង​នេះ លោក​ស្រី​បាន​ទម្លាក់​ការ​ទទួល​ខុស​ត្រូវ​នេះ ទៅ​ខាង​ក្រសួង​សុខាភិបាលថា«ត្រូវ​តែ​ទទួល​ខុស​ត្រូវ​ជា​ចម្បង ចំពោះ​ប្រជា​ជាតិ​ខ្មែរ​ទាំង​មូល»។

នៅក្នុងកិច្ចសម្ភាស​ជា​មួយ​អ្នក​សារព័ត៌មាន​ក្នុង​ស្រុក ​លោក ឌីឌីយ៉េ ហ្វុងតេនីល (Didier Fontenille) នាយក​វិទ្យាស្ថាន​ប៉ាស្ទ័រ​កម្ពុជា បាន​ថ្លែង​ឲ្យ​ដឹង​កាល​ពី​រសៀល​ថ្ងៃ​ទី២០ ខែ​ធ្នូ​នេះ​ថា ចំនួន​នោះ នឹង​អាច​បន្ត​ឡើង​ទៀត បន្ទាប់​ពី​មាន​វត្តមាន​ប្រជា​ពលរដ្ឋ កាន់​តែ​ច្រើន​ឡើង​មក​ពិនិត្យ​ជា​បន្ត​បន្ទាប់។ ក្នុង​ថ្ងៃ​ដដែល​នោះ មន្ទីរ​សុខាភិបាល​ខេត្ត​បាត់ដំបង បាន​យក​រថយន្ត​ទៅ​ដឹក​ពលរដ្ឋ​មួយ​ចំនួន មក​ទទួល​ថ្នាំ និង​ពិគ្រោះ​ជំងឺ នៅ​មន្ទីរ​ពេទ្យ​បង្អែក​ខេត្ត។ ក្រុម​ប្រជា​ពលរដ្ឋ​សង្ស័យ​ថា អ្នក​ដែល​ត្រូវ​ដឹក​យក​ទៅ​ខេត្ត​ទាំង​នោះ ជា​អ្នក​ដែល​មាន​ផ្ទុក​មេរោគ​អេដស៍ ហើយ​ពលរដ្ឋ​នៅ​តែ​តក់ស្លុត និង​ព្រួយ​បារម្ភ​ពី​អនាគត​របស់​ពួក​គាត់។

គ្រាន់តែជាការធ្វេសប្រហែស...

ស្របពេលដែលបញ្ហា នៅមិនទាន់ស្វែងរកមូលហេតុពិតឃើញនោះ មន្រ្តីនគរបាលនៃស្នងការដ្ឋាន ខេត្ត​បាត់ដំបង បាននិយាយថា ថា លោកគ្រូពេទ្យ យ៉ែម ជ្រិន ដែលប្រជាពលរដ្ឋបានដាក់ការសង្ស័យលើនោះ ត្រូវ​បានបញ្ជូនខ្លួន ទៅកាន់តុលាការខេត្តបាត់ដំបង ដើម្បីសួរនាំហើយ កាលពីរសៀលទី២១ ខែធ្នូ ឆ្នាំ២០១៤។ មន្រ្តីរូបនោះបន្ថែមថា ការបញ្ជូននេះ ព្រោះយោងតាមការសារភាព របស់លោកគ្រូពេទ្យនោះថា លោកមិន​បាន​ប្តូរម្ជុល និងសឺរ៉ាំង បន្ទាប់ពីចាក់ថ្នាំ ពីអ្នកជំងឺម្នាក់ ទៅអ្នកជំងឺម្នាក់ទៀត។ មន្រ្តីនគរបាលបាន​ស្រង់សំដី​គ្រូ​ពេទ្យ​នោះ មកបញ្ជាក់ថា នេះ«គ្រាន់តែជាការធ្វេសប្រហែស របស់ខ្លួន»ប៉ុណ្ណោះ។

ដោយឡែក លោកនាយករដ្ឋមន្ត្រី ហ៊ុន សែន ធ្លាប់បានថ្លែងជាសាធារណៈ «មិនជឿ» ចំពោះរឿងពលរដ្ឋ​ស្ទើ​ទាំងឃុំរការ ឆ្លងជំងឺអេដស៍នោះ៩៩ ភាគរយ ថាជាការពិតឡើយ។ លោក ហ៊ុន សែន បានដាក់ការសង្ស័យ ទៅលើម៉ាស៊ីនពិនិត្យឈាម ថា«មាន»បញ្ហា។ លោកហាក់ដូចជាបានទទួលស្គាល់ថា ម៉ាស៊ីនដែល​ធ្វើការ​កន្លង​មក ក៏ប្រហែលជាមិនពិតដែរ «ខុសបច្ចេកទេស»។ បន្ទាប់មកអាជ្ញាធររដ្ឋាភិបាល បានព្យាយាមលាក់​បាំង​តួលេខនៃអ្នកឆ្លងថ្មីតែម្តង តែក្រុមអង្គការសង្គមស៊ីវិលស្នើឲ្យបើកចំហព័ត៌មានទាំងអស់ ដើម្បីងាយ​ស្រួល​សិក្សា​ស្រាវជ្រាវ និងរកដំណោះស្រាយបន្ត៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...