បុរសស៊ីសាច់ភរិយាក្មេង និងបងប្អូនស្រីថ្លៃរបស់ខ្លួន ទើបនឹងត្រូវបានដោះលែង
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី១៩ ធ្នូ ២០១៤
- កែប្រែចុងក្រោយ: December 21, 2014
- ប្រធានបទ: ហួសនិស្ស័យ
- អត្ថបទ: មានបញ្ហា?
- មតិ-យោបល់
-
បុរសស៊ីសាច់មនុស្សម្នាក់នេះ កំពុងនៅក្រៅឃុំយ៉ាងមានសេរីភាព ចាប់ពីសប្ដាហ៍មុនមក។ សារព័ត៌មានអង់គ្លេស Daily Mail បានរាយការណ៍ពីរឿងរ៉ាវដ៏ហួសហេតុ រកនឹកស្មានពុំត្រូវ របស់បុរសឈ្មោះ វ៉ាស៊ីល ឡាវរិច (Vasile Lavric) ដែលត្រូវបានចោទប្រកាន់ ពីបទមនុស្សឃាតទៅលើភរិយាវ័យក្មេងរបស់ខ្លួន និងបងប្អូនស្រីរបស់នាងចំនួនពីរនាក់ មុននឹងយកនាងទាំងបីមកបរិភោគ។ ប៉ុន្តែតុលាការរបស់ប្រទេសរ៉ូម៉ានី ទើបនឹងដោះលែងបុរសនេះឲ្យនៅក្រៅឃុំ នៅក្នុងរយៈពេលរង់ចាំថ្ងៃបើកសវនាការ។
វ៉ាស៊ីល ឡាវរិច ត្រូវបានចាប់ខ្លួនកាលពីខែមេសាកន្លងទៅ ដោយអាជ្ញាធរបានសង្ស័យថា បុរសនេះបានសម្លាប់ស្ត្រីបីរូប រួមមាន ភរិយាខ្លួនឯងនាង នីកូឡេតា (Nicoleta) អាយុ១៨ឆ្នាំ បាត់ខ្លួននៅឆ្នាំ២០០៥ នាង រ៉ាម៉ូណា (Ramona) ប្អូនស្រីរបស់ភរិយា ដែលបាត់ខ្លួននៅពីរខែ ក្រោយការបាត់ខ្លួនរបស់នាងនីកូឡេតា និងនាង អ៊ីលីយ៉ាណា (Iuliana) បងស្រីរបស់ភរិយា ដែលបាត់ខ្លួនតាំងពីឆ្នាំ១៩៩៥ នៅក្នុងអំឡុងពេលដែលបុរសនេះ បានទាក់ទងស្នេហាជាមួយ។
ជាច្រើនឆ្នាំកន្លងមក ប្រព័ន្ធយុត្តិធម៌របស់ប្រទេសរ៉ូម៉ានី បានកើតការសង្ស័យទៅលើបុរសរូបនេះដែរ តែដោយសារតែពួកគេរកសាកសពមិនឃើញ និងមិនមានភស្ដុតាងឲ្យបានរឹងមាំ ដូច្នេះពិបាកនឹងធ្វើការចោទប្រកាន់ទៅលើ វ៉ាស៊ីល ឡាវរិច។ ប៉ុន្តែនៅដើមឆ្នាំកន្លងមកនេះ បន្ទាប់ពីការស៊ើបអង្កេតទៅលើសំនុំរឿងនេះ ត្រូវបានពង្រឹកឲ្យស៊ីជម្រៅ ដោយក្រុមអាជ្ញាធរនោះ គេបានរកឃើញកញ្ចប់ឆ្អឹងជាច្រើន ត្រូវបានកប់នៅក្នុងសួនច្បាររបស់ផ្ទះ វ៉ាស៊ីល ឡាវរិច។ ក្រុមអ្នកស៊ើបអង្កេតបានអះអាងថា គេមានភស្ដុតាងច្បាស់លាស់ ថាសំណល់ឆ្អឹងទាំងនោះ ត្រូវបានយកទៅចំអិន ហើយយកមកខាំកកេរ និងជញ្ជក់នោះថែមទៀត។
រូបថតស្ត្រីរងគ្រោះទាំងពីរ និងវ៉ាំស៊ីល ឡាវរិច នៅពីលើរូបថតនៃសួនច្បារមុខផ្ទះរបស់បុរសនេះ ទីកន្លែងដែលគេរកឃើញគំនរឆ្អឺង។
បន្ទាប់ពីនោះមក សារព័ត៌មានក្នុងប្រទេសរ៉ូម៉ានី បានផ្ដល់រហស្សនាមឲ្យ វ៉ាស៊ីល ឡាវរិច ថាជា «បីសាចស៊ីសាច់ស្ត្រី» ជាប់រហូតមក។
ដើម្បីអាចឲ្យខ្លួនមានសេរីភាពបណ្ដោះអាសន្ននោះ បុរសនេះ បានអះអាងប្រាប់ចៅក្រមថា យានដ្ឋានរបស់ខ្លួនអាចនឹងបិទទ្វា ប្រសនណាជាខ្លួននៅតែត្រូវបានជាប់ឃុំ រហូតដល់ថ្ងៃបើកសវនាការ ខណៈរយៈពេលបើកសវនាការនេះ ត្រូវបានអូសបន្លាយពេលជាបន្ត ដោយសារការស៊ើបអង្កេតនៅមិនទាន់ ត្រូវបានអះអាងឲ្យម៉ត់ចត់។
បញ្ហាមួយដែលអាចបង្កឲ្យព្រួយបារម្ភ ដល់មនុស្សពេញមួយផែនដីនោះ នោះគឺបុរសជាជនសង្ស័យរូបនេះ អាចធ្វើដំណើរលួចរត់ទៅណាក៏បានដែរ ព្រោះប្រទេសរ៉ូម៉ានី នៅមិនទាន់មានប្រព័ន្ធត្រួតពិនិត្យ ដោយកងដៃអេឡិចត្រូនិកនៅឡើយ។ កម្លាំងនគរបាលត្រូវធ្វើដំណើរទៅផ្ទះរបស់ វ៉ាស៊ីល ឡាវរិច ជារៀងរាល់ថ្ងៃ ដើម្បីត្រួតពិនិត្យពីវត្តមានរបស់បុរសរូបនេះ នៅក្នុងផ្ទះរបស់ខ្លួន ដែលស្ថិតនៅក្រុង រ៉ាឌូទី (Radauti) ភាគឦសាននៃប្រទេស៕