អ្នកការសែត និងពលរដ្ឋសោកស្តាយចំពោះការស្លាប់របស់ ចាន់ សុវ៉េត
- ដោយ: ប្រាថ្នា អត្ថបទ៖ ប្រាថ្នា ([email protected]) - ភ្នំពេញ ថ្ងៃទី១០ ធ្នូ ២០១៤
- កែប្រែចុងក្រោយ: December 12, 2014
- ប្រធានបទ: វីរភាព
- អត្ថបទ: មានបញ្ហា?
- មតិ-យោបល់
-
ដំណឹងនៃការទទួលមរណៈភាព របស់សកម្មជនការពារសិទ្ធិ លោក ចាន់ សុវ៉េត ពិតជារន្ធត់ខ្លាំងណាស់ ចំពោះប្រជាពលរដ្ឋ អ្នកសារព័ត៌មាន ជាពិសេសប្រជាពលរដ្ឋដែលរងគ្រោះ ពីការរំលោភដីធ្លី។ លោក ចាន់ សុវ៉េត ត្រូវបានគេស្គាល់ថា ជាសកម្មជនសិទ្ធិមនុស្ស មួយរូបដែលហ៊ានរិះគន់រដ្ឋាភិបាលចំៗ អំពីការរំលោភសិទ្ធិមនុស្ស តាមប្រពន្ធផ្សព្វផ្សាយកន្លងទៅនេះ។
លោក ចាន់ សូវ៉េត ដែលធ្លាប់តែចេញមុខការពារសិទ្ធិពលរដ្ឋ អស់រយៈពេលជាច្រើនឆ្នាំនោះ បានទទួលមរណៈភាពចំថ្ងៃ ដែលពិភពលោកប្រារព្ធទិវា សិទ្ធិមនុស្ស អន្តរជាតិខួបលើកទី ៦៦ ។
ស្ត្រីអ្នកសារព័ត៌មានមួយរូប និយាយក្នុងលក្ខខ័ណ្ឌមិនបញ្ចេញឈ្មោះ បានប្រាប់ថា មុនដំបូងពេលដែលលឺដំណឹងនេះ នាងស្ទើតែមិនជឿនោះទេ។ កញ្ញាបន្តថា ដំណឹងនៃការស្លាប់របស់លោក ចាន់ សុវ៉េត ពិតជាដំណឹងគួឱ្យរន្ធត់ និងសោកស្ដាយជាទីបំផុត។ អ្នកកាសែតដដែលនេះបន្ថែមថា៖ «លោក ចាន់ សុវ៉េត បានចំណាយកម្លាំងកាយ កម្លាំងចិត្តក្នុងការការពារសិទ្ធមនុស្សនៅកម្ពុជា និងជួយយុត្តិធម៌ ជូនជនរងគ្រោះ ជាពិសេសអ្នកមានជម្លោះដីធ្លី។ ខ្ញុំពិតជាសោកស្តាយណាស់។»
អមជាមួយនឹងរូបថត នៃការស្លាប់របស់សកម្មជនខាងលើ អ្នកសារព័ត៌មានម្នាក់ទៀត នៅការសែតក្នុងស្រុកមួយ បានសរសេរនៅលើទំព័រហ្វេសប៊ុករបស់ខ្លួនថា៖ «ពិតជាគួរឲ្យសោកស្តាយខ្លាំងណាស់ ដែលបាត់បង់អ្នកការពារសិទ្ធិមនុស្សដ៏ឆ្នើមមួយរូប សូមឲ្យវិញ្ញាណក្ខន្ធលោកពូ ទៅកាន់សុគតិភព»។
ចំណែកវិទ្យុអាស៊ីសេរី បានសម្តែងការសោកស្តាយជាមួយដែរថា៖ «យើងខ្ញុំជាបុគ្គលិក នៃវិទ្យុអាស៊ីសេរីទាំងអស់ សូមចូលរួមមរណទុក្ខ ដ៏ក្រៀមក្រំ ចំពោះមរណភាពរបស់លោក ចាន់ សុវ៉េត។»
រីឯលោក សួន សេរីរដ្ឋា ប្រធានចលនាអំណាចពលរដ្ឋខ្មែរ ដែលរស់នៅសហរដ្ឋអាមេរិក បានបង្ហាញការសោកស្តាយ ចំពោះសកម្មជនការពារសិទ្ធមនុស្ស លោក ចាន់ សុវ៉េត នៅលើទំប័រហ្វេសប៊ុករបស់លោកថា ការបាត់បង់រូបលោក ចាន់ សុវ៉េត គឺជាការបាត់បង់ នូវបង្គោលដ៏រឹងមាំមួយ ដែលជាបង្អែករបស់ជនរងគ្រោះ ដែលត្រូវបានគេរំលោភសិទ្ធិ នៅក្នុងប្រទេសខ្មែរ។
លោក សេរីរដ្ឋា បានសរសេរបន្តថា៖ «ខ្ញុំសូមសំដែងនូវការគោរពវិញ្ញាណក្ខន្ធលោកពីចំងាយ ជាមួយនឹងការសោកស្តាយជាពន់ពេក នូវការបាត់បង់រូបលោក! តាំងពីខ្ញុំស្គាល់គាត់ នាឆ្នាំ ១៩៩៦ មក គាត់គឺជាមនុស្សម្នាក់ដែលខ្ញុំគោរពបំផុត និងចាត់ទុកជារៀមច្បងម្នាក់។ តាមរយ:ចរិតនិងឥរិយាបទធ្វើការ ព្រមទាំងជំហរធ្វើកិច្ចការងាររបស់គាត់ ក្នុងការបម្រើគ្រប់ជនរងគ្រោះ ដែលត្រូវគេរំលោភសិទ្ធិ។ ខ្ញុំពិតជាមានការសោកស្តាយរូបគាត់ខ្លាំងណាស់!»
សូមរំលឹកថា លោក ចាន់ សុវ៉េត បានទទួលមរណភាព ដោយជំងឺគាំងបេះដូង នៅរសៀលម៉ោង២ និង៥៥នាទី ថ្ងៃទី១០ ខែធ្នូ ឆ្នាំ២០១៤ បន្ទាប់ពីលោកបានត្រឡប់ ពីចូលរួមសង្កេតមើលការប្រារព្ធ ទិវាសិទ្ធិមនុស្សអន្តរជាតិ៕