ខ្សែអាត់«សម្លេង»ចំនួនពីរ​ខ្សែ ដែល​អះអាង​ថា​ខ្លួន​ឈ្មោះ ថោង សារ៉ាត់ នោះ ត្រូវ​បាន​បង្ហោះ​ក្នុង​បណ្តាញ​ព័ត៌មាន​សង្គម​ជា​បន្ត​បន្ទាប់។ យ៉ាង​ណា​ក៏​ដោយ មិន​ទាន់​មាន​ការ​បញ្ជាក់ ពី​ជំនាញ​មាន​សមត្ថកិច្ច​ណា​មួយ​ថា ជា​សម្លេង​របស់​បុគ្គល​ណា​មួយ ឲ្យ​ពិត​ប្រាកដ​នៅ​ឡើយ។ ប៉ុន្តែ​ខ្សែ​អាត់​សម្លេង​នោះ ត្រូវ​បាន​អ្នក​ប្រើប្រាស់​បណ្តាញ​សង្គម​ហ្វេសប៊ុក​មួយ​ចំនួន ធ្វើការ​ប្រៀប​ធៀប​ទៅ​នឹង​សម្លេង​របស់​លោក ខ័ណ្ឌ ច័ន្ទសុផល។

ខ្សែអាត់សម្លេង​«ទី​ពីរ» ដែល​បាន​បញ្ជាក់​ជា​«ថ្មី»​ថា​ខ្លួន​ឈ្មោះ ថោង សារ៉ាត់ បាន​ចេញ​ផ្សាយ​ជា​ថ្មី​លើ​បណ្តាញ​សង្គម​ហ្វេសប៊ុក ដោយ​ស្នើ​ដល់​លោក សម រង្សី និង​លោក កឹម សុខា អន្តរាគមន៍​ជួយ​ដល់​ខ្លួន និង​គ្រួសារ ឲ្យ​បាន​រួច​ពី​ការ​ចោទ​ប្រកាន់​របស់​អាជ្ញាធរ និង​តុលាការ។ ខ្សែ​អាត់​សម្លេង​នេះ ក៏​ត្រូវ​បាន​ចេញផ្សាយ​ត​ៗគ្នា ដោយ​បណ្តាញ​ព័ត៌មាន​ក្នុង​ស្រុក មួយ​ចំនួន​នា​ថ្ងៃ​ទី៩ ខែ​ធ្នូ ឆ្នាំ​២០១៤​នេះ​ដែរ។

មួយថ្ងៃបន្ទាប់ពីល្បាញល្បី នៃការបែកធ្លាយសម្លេងខ្សែអាត់«ទីមួយ»កាលពីថ្ងៃទី៨ ខែធ្នូ មក ក្នុងថ្ងៃទី៩ ខែធ្នូ អ្នកនាំពាក្យនគរបាលជាតិលោក គៀត ចន្ទថារិទ្ធ បានបញ្ជាក់ថា មន្រ្តីជំនាញកំពុងធ្វើការផៀងផ្ទាត់សម្លេង បង្ហោះតាមបណ្តាញសង្គមនោះ ថាតើសម្លេងនេះពិតប្រាកដជាសម្លេង របស់លោក ថោង សារ៉ាត់ ឬមិនមែន?

» សូមអានអត្ថបទទាក់ទង ដោយចុចលើទីនេះ។

ផ្ទុយនឹងសម្លេង«ទីមួយ» ដែលស្នើឲ្យលោកនាយករដ្ឋមន្រ្តី ហ៊ុន សែន ជួយអន្តរាគមន៍នោះ ក្នុងសម្លេង​«ទីពីរ»​ត្រឡប់មករកថ្នាក់ដឹកនាំគណបក្សសង្គ្រោះជាតិ លោក សម រង្ស៊ី និងលោក កឹម សុខា ជាអ្នកជួយវិញ ដោយ​បង្ហាញនូវការជឿជាក់ ជាងខ្សែរអាត់សម្លេងទីមួយ។

សូមរំលឹកថា ខ្សែអាត់សំឡេង «ទីមួយ» ដែលផុសក្នុងបណ្តាញព័ត៌មានសង្គមកាលពីថ្ងៃ នោះ បានត្អូញត្អែ យំសោក ជាមួយនឹងបញ្ជាក់ថាខ្លួនឈ្មោះ ថោង សារ៉ាត់។ ការត្អូញត្អែរនេះ ដើម្បីស្នើសុំដល់លោកនាយក​រដ្ឋមន្រ្តី ហ៊ុន សែន ជួយដល់អង្គរក្សទាំងបួន និងឪពុកម្តាយរបស់លោក ថោង សារ៉ាត់ ដែលត្រូវបានចាប់ខ្លួន​ដាក់​ឃុំនោះ។

» សូមអានអត្ថបទទាក់ទង ដោយចុចលើទីនេះ។

ជាមួយនឹងសម្លេងខ្សែអាត់ទីពីនេះ បានលើកឡើងថាខ្លួន (ថោង សារ៉ាត់) បានជួយឧបត្ថមដល់គណបក្ស​សង្គ្រោះ​ជាតិរាប់ម៉ឺនដុល្លា ក្នុងការធ្វើមហាបាតុកម្មក្នុងពេលកន្លងមក និងក្នុងកម្មវិធីផ្សេងៗទៀតជាច្រើន។ សម្លេងនោះ បានលើកឡើងថា «សូមលោក កឹម សុខា យកអំណាចអនុប្រធានទីមួយនៃរដ្ឋសភា​មកជួយខ្ញុំ​ផង។ (...) លោកជួយដោះស្រាយឲ្យខ្ញុំផង ខ្ញុំសន្យាថាបើខ្ញុំ និងគ្រួសារខ្ញុំរួចផុតពីទោស ខ្ញុំនិងជួយផ្គត់ផ្គងជា​លុយ ជាអ្វីៗដែលអាចធ្វើទៅបានដូចមុនៗចឹង។»

ចំពោះការលើកឡើងក្នុងសម្លេង«ទីពីរ» ដោយបានអះអាងថាលោក ថោង សារ៉ាត់ មានទំនាក់ទំនងលុយកាក់​ជាមួយគណបក្សសង្គ្រោះជាតិ នាពេលកន្លងមកនោះ ត្រូវបានអនុប្រធានទីមួយនៃរដ្ឋសភា លោក កឹម សុខា និងជាអនុប្រធាននៃគណបក្សសង្គ្រោះជាតិ បានធ្វើការបដិសេធ និងច្រានចោលថាមិនមានរឿងនេះទេ។ ហើយរូបលោកផ្ទាល់ (កឹម សុខា) ក៏មិនដែលស្គាល់លោក ថោង សារ៉ាត់ នោះដែរ។ ក្នុងទិវាសិទ្ធិមនុស្សកាល​ពីថ្ងៃទី១០ ធ្នូ ម្សិលម៉ិញនេះ លោក (កឹម សុខា) បានបញ្ជាក់ដូច្នេះថា «ខ្ញុំមិនដែលស្គាល់គាត់ (ថោង សារ៉ាត់) ផង ការជួយឧបត្ថម្ភ មកដល់គណបក្សសង្គ្រោះជាតិខ្ញុំអត់ដឹងទេ»។

ដោយឡែកចំពោះខ្សែរអាត់សម្លេងខ្សែ«ទីពីរ» ត្រូវបានសារព័ត៌មានក្នុងស្រុកមួយចំនួន ពិសេសតាម​បណ្តាញ​សង្គមមួយ ដែលមានឈ្មោះជាភាសាអង់គ្លេសថា I Love Cambodia Hot News បានចុះផ្សាយ​ក្នុងថ្ងៃទី១១ ខែធ្នូ នេះ និងបានបញ្ជាក់ថាជាសម្លេងរបស់លោក ខ័ណ្ឌ ច័ន្ទសុផល។ ក្នុងបណ្តាញព័ត៌មាន​សង្គម លោក ខ័ណ្ឌ ច័ន្ទសុផល ត្រូវបានគេស្គាល់ថាជា យុវជនសកម្មម្នាក់គាំទ្រគណបក្សប្រជាជនកម្ពុជា។

ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ មន្រ្តីច្បាប់មកពីគណបក្សសង្គ្រោះជាតិ លោក រស់ សួរ ក៏​បានច្រានចោលសម្លេងនេះ ដោយលោកចាត់ទុកថា ជាសម្លេងដែលគេប្រឌិតឡើង ក្នុងគោលបំណង​«បំភាន់»​ភ្នែកយ៉ាងជាក់លាក់ និងមានទិសដៅទាញភ្ជាប់​បន្តិចម្តងៗទៅ​រកបង្អែក​ណាមួយដែលគេចង់ទម្លាក់កំហុស។

» សូមអានអត្ថបទទាក់ទង ដោយចុចលើទីនេះ។

សូមស្តាប់សម្តីដើមរបស់លោក ខ័ណ្ឌ ច័ន្ទសុផល ដែលបានថតជាខ្សែរវីដេអូកាលពីថ្ងៃទី៧ និងទី៨ ខែធ្នូ ឆ្នាំ​២០១៤នេះ ក្នុងបណ្តាញសង្គមហ្វេសប៊ូករបស់លោកផ្ទាល់។

សូមស្តាប់សម្លេងដើម ជាមួយនិងឃ្លីបវីដេអូ របស់លោក ខ័ណ្ឌ ច័ន្ទសុផល ដែលលបានបញ្ចូលក្នុង​បណ្តាញ​សង្គមហ្វេសប៊ុករបស់ខ្លួន ក្រោយមួយថ្ងៃនៃការប៉ងលេបថ្នាំសម្លាប់ខ្លួន របស់កញ្ញា ប៉ីប៉ី លី កាលពីយប់​ថ្ងៃទី​១៣ ខែតុលា ឆ្នាំ២០១៤កន្លងមក។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ ពីអ្នកនាំពាក្យនគរបាលជាតិលោក គៀត ចន្ទថារិទ្ធ ជុំវិញ​ការវិភាគលើសម្លេងទាំងនេះ បាននៅឡើយទេ។ ឯ លោក ខ័ណ្ឌ ច័ន្ទសុផល ក៏មិនអាចស្វែងរកប្រតិកម្មតប បាននៅឡើយដែរ។ ទស្សនាវដ្តីមនោរម្យ.អាំងហ្វូ នឹងធ្វើការផ្សារជាបន្តនៅពេលមានព័ត៌មានថ្មី ឬប្រតិកម្មតប ចំពោះការលើកឡើងខាងលើនេះ៕