មិនជាពិបាកប៉ុន្មានទេ សំរាប់លោកបារ៉ាក់ អូបាម៉ា នៅលើបញ្ហានយោបាយអន្តរជាតិនោះ។ ជាសេចក្ដីសង្កេត ធ្វើទៅលើ លោក​ប្រធានាធិបតីផុតអាណត្តិ ដែលលោកបានវាយលុកយ៉ាងច្រើន ទៅលើបេក្ខជនគូរប្រជែងរបស់គាត់ មកពីគណបក្ស​សាធារណរដ្ឋ ខណៈការជួបវែកញែកទល់មុខគ្នាមួយ ជាលើកចុងក្រោយ មុនថ្ងៃបោះឆ្នោត តែប៉ុន្មានថ្ងៃខាងមុខប៉ុណ្ណោះ។ រីឯលោក ម៉ាត៍ រ៉ូមណីវិញ បានត្រឹមតែការពារមុខមាត់របស់គាត់ នៅលើប្រធានបទនេះប៉ុណ្ណោះ។

ជារការជជែកតទល់មុខគ្នាជាលើកទី៣ ហើយក៏ជលើកចុងក្រោយបង្អស់ដែរ កាលពីយប់ថ្ងៃច័ន្ទទី២២តុលាកន្លងមកនេះ សំរាប់ការបោះឆ្នោតជ្រើសរើសប្រធានាធិបតី នៅដើមខែវិច្ឆិការខាងមុខនេះ។ លោកប្រធានាធិបតីផុតតំណែង បារ៉ាក់ អូបាម៉ា បានបង្ហាញនូវភាពមោះមុតរបស់ខ្លួន នៅចំពោះមុខគូរប្រជែងរបស់ខ្លួន លោកម៉ាត៍ រ៉ូមណី។ មិនត្រឹមតែប៉ុណ្ណោះ លោកអូបាម៉ា ថែមទាំងបានធ្វើអោយគេឃើញ ពីអសមត្ថភាព ក្នុងកិច្ចការនយោបាយការបរទេស របស់បេក្ខជន​មកពី​គណបក្សសាធារណរដ្ឋអាមេរិករូបនេះថែមទៀតផង។

ជាមួយនឹងបរិយាកាស ពេលខ្លះតឹងតែង លោកអូបាម៉ា បាននិយាយចំមុខ និងបានសំលឹងមិនដាក់ភ្នែក ទៅគូរប្រជែង​របស់​លោកថា «ជារៀងរាល់ពេល ដែលអ្នកឯងនិយាយអោយយោបល់ គឺអ្នកឯងធ្វើខុសរហូត»។  ជាមួយនឹងនយោបាយ​របស់​លោក ដែលថាបានដកកងទ័ពអាមេរិក ចេញពីប្រទេសអ៊ៀរ៉ាក់ នៅឆ្នាំ២០១១កន្លងទៅ លោកអូបាម៉ាបានបន្ថែមថា «អ្នក​​និយាយថា យើង (អាមេរិក) ត្រូវតែទៅអ៊ៀរ៉ាក់ បើទោះជាគ្មានអាវុធប្រល័យលោកក៏ដោយ។ លោកបាននិយាយថា យើង​ត្រូវតែមានជារៀងរហូតទៅ នូវកងទ័ពរបស់យើង នៅប្រទេសអ៊ៀរ៉ាក់។»

យុទ្ធសាស្ដ្រវាយសម្រុក របស់លោកប្រធានាធិបតីផុតតំណែងនេះ មើលទៅទំនងជាបានបញ្ចុះបញ្ចូល ក្រុមប្រជាអ្នកទៅ​បោះ​ឆ្នោត អោយងាកមកបោះឆ្នោតអោយលោកបានច្រើនជាមុន។ នៅក្នុងការស្ទង់មតិធ្វើឡើងភ្លាមៗ ដោយ CBS ៥៣% បោះអោយលោកអូបាម៉ា រីឯលោករ៉ូមណី មានចំនួនតែ ២៣%ប៉ុណ្ណោះ។ វិទ្យាស្ថានស្ទង់មតិ (PPP) មួយទៀត ក៏បានបញ្ជាក់​ពីជ័យជំនះរបស់លោកអូបាម៉ា (៥២%) លើលោកម៉ាត៍ រ៉ូមណី (៤២%) ដែរ។ រីឯការស្ទង់មតិរបស់​ CNN បានអះអាង ពីភាព​នាំមុខតែបន្ដិចបន្តួច របស់លោកប្រធានាធិបតីផុតអាណត្តិ ប្រមាណតែ ៤៨% ទល់នឹងគូរប្រជែងសាធារណរដ្ឋ ៤០%។

ភាពប្រយ័ត្នប្រយែង របស់លោករ៉ូមណី

ដូចជារៀងរាល់ដង លោក គ្រីស្ដូហ្វើ អាធើតុន (Christopher Arterton) ជាជំនាញខាងនយោបាយនៅសកលវិទ្យាល័យ ហ្សក វ៉ាស៊ីនតោន បានបកស្រាយថា «លោក រ៉ូមណី មានលទ្ធភាពបញ្ជាក់ថា លោកមិនមែនជាអ្នកអភិរក្សនិយមមួយរូប ប្រកបដោយភាពគ្រោះថ្នាក់ និងភាពហឹង្សា ដូចអ្វីដែលលោកអូបាម៉ា ព្យាយាមនឹងទាញលោកនោះទេ។ រូបភាពនេះអាច​ជួយគាត់ ជាពិសេសនៅក្នុងបណ្ដារដ្ឋដែល គាត់មានប្រៀបជាង ដូចជា នៅផ្ល័រីដ  (Floride) និងអូហៃយ៉ូ  (Ohio) ជាដើម។»

ជារឿយៗ បេក្ខជនទាំងពីរ បានឈរនៅលើចំនុចរួមគ្នាខ្លះ ដូចជាជំហរជាអ្នកការពារ អ៊ីស្រ្តាអែល និងដាក់អោយមាន​ការឃ្លាំ​មើល ប្រទេសអ៊ៀរ៉ង់ នៅក្នុងគម្រោងការអាវុធនុយក្លេអ៊ែររបស់ប្រទេសនេះ។ តែផ្ទុយទៅវិញ គេមិនសូវបានលឺជជែកគ្នាទេ ប៉ុន្មានពីអ៊ឺរ៉ុប ហើយរឹតតែអត់ទៅទៀត សំរាប់ទ្វីបអាហ្វ្រិក សំរាប់ការជជែកទល់មុខគ្នា មានពេលតែ៩០នាទីប៉ុណ្ណោះនេះ។

លោកសាស្ត្រាចារ្យ ខាងទំនាក់ទំនង របស់សកលវិទ្យាល័យអាមេរិក នៅទីក្រុងវ៉ាស៊ីនតោន ឌឺ ស៊ី  លោក ដូធី លីញឆ៍ (Dotty Lynch) បានរំពឹងគិតថា «នៅពេលដែលលោក រ៉ូមណី បានធ្លាក់ក្នុងការយល់ព្រម ជាមួយលោក អូបាម៉ា នៅចំនុចសំខាន់ៗ​ជាច្រើន ទៅលើនយោបាយក្រៅប្រទេសនោះ លោករ៉ូមណី បានដើរតួយ៉ាងប្រយ័ត្នប្រយែងមួយ នៅយប់ថ្ងៃច័ន្ទនេះ ហើយ​បានសាកល្បង បង្វិលកិច្ចសន្ទនា ទៅរកប្រធានបទ សេដ្ឋកិច្ច ដែលលោកគិតថា លោកបានសមត្ថភាពខ្លាំងជាង។»

អ្នកជំនាញម្នាក់ទៀត បានលើកជាយោបល់ឡើងដែរថា «សហរដ្ឋអាមេរិក បានឃើញពី សមត្ថភាពបញ្ជាការ របស់ពួកគេ និងដឹងថា មាននរណាម្នាក់ ក្នុងចំណោមអ្នកទាំងពីរ មិនទាន់តៀមខ្លួននៅឡើយ ក្នុងកិច្ចបញ្ជាការនេះ។»

តែខាងក្រុមអ្នកសាធារណរដ្ឋវិញ បានបញ្ជាក់ពីភាពជឿជាក់របស់ពួកគេ ហើយថារាត្រីនៃការជជែកទល់មុខគ្នានេះ បាន​ពង្រឹងបុគ្គលិកលក្ខណៈ ជាជើងឯង របស់ប្រធានាធិបតីសហរដ្ឋអាមេរិក។ ព្រឹទ្ធសមាជិកម្នាក់មកពីគណបក្សសាធារណរដ្ឋ​ លោក ម៉ាកូ រ៉ូប៊ីយូ នៃរដ្ឋផ្ល័រីដ បានចោទលោកអូបាម៉ា ថា «តូចទាប និង ខ្សត់ខ្សោយ ជាពិសេសនៅពេលនិយាយដល់ សំនុំរឿងធំៗ»។

----------------------------------------------------
ដោយ ៖ កេសរកូល - ភ្នំពេញ ថ្ងៃទី២៣ ខែតុលា ឆ្នាំ២០១២
ប្រភព ៖ ទីភ្នាក់ងារសារពត៌មានបារាំង អាអេហ្វប៉េ
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ