ម៉ូតូប៉ះរថយន្ដរលាត់ជើងបន្តិច តែទារសំណងពីម្ចាស់រថយន្ដ៣០០ដុល្លារ
- ដោយ: ក. វិច្ចនី អត្ថបទ៖ ក. វិច្ចនី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី ០៧ ធ្នូ ២០១៤
- កែប្រែចុងក្រោយ: December 07, 2014
- ប្រធានបទ: គ្រោះថ្នាក់
- អត្ថបទ: មានបញ្ហា?
- មតិ-យោបល់
-
បុរសពីរនាក់ជិះម៉ូតូម៉ាក ឌ្រីម ២០០៥ ពាក់ស្លាកលេខ 1A7622 ភ្នំពេញ ដែលបើកពីទិសដៅ ខាងកើតឆ្ពោះទៅលិច បានប៉ះជាមួយរថយន្តកាមរីមួយគ្រឿង ពាក់ស្លាកលេខ 2D8983 ភ្នំពេញ ដែលជិះក្នុងទិសស្របគ្នា នៅចំណុចក្រោមស្ពានស្ទឹងមានជ័យ កាលពីយប់ថ្ងៃទី០៦ ខែធ្នូ។ ការប៉ះទង្គិចគ្នានេះ បណ្តាលឲ្យមានរបួសស្រាល។ នេះបើសម្តីរបស់នគរបាលចរាចរណ៍ នៅប្រចាំនៅគោលដៅស្ទឹងមានជ័យ ដែលបានថ្លែងប្រាប់ទស្សនាវដ្ដីមនោរម្យ.អាំងហ្វូ។
ម្ចាស់ម៉ូតូដែលបានបើកប៉ះគ្នា ជាមួយរថយន្ដនេះ បានទាមទារសំណងពីម្ចាស់រថយន្ត ៣០០ដុល្លារ ដោយលើកឡើងថា ការប៉ះទង្គិច បានបណ្តាលឲ្យបុរសម្នាក់ ដែលជិះម៉ូតូជាមួយគ្នានោះបាក់ជើង។
គ្រោះថ្នាក់ចរាចរណ៍នេះ បានបណ្តាលឲ្យបុរសម្នាក់ ដែលជិះម៉ូតូនៅខាងក្រោយ រលាត់ជើងបន្តិចបន្ទួចនៅត្រង់ជង្គង់ និងស្មងជើង ហើយមានការខូចខាតម៉ូតូបន្ដិចបន្តួចដែរ។ ប៉ុន្តែទាំងម្ចាស់ម៉ូតូ ទាំងអ្នករបួសនោះ មិនព្រមនៅនឹងកន្លែងនិយាយគ្នាទេ ដោយប្រញាប់យកអ្នករងរបួសទៅមន្ទីរពេទ្យ ហើយឲ្យសាច់ញាតិមកដោះស្រាយជំនួសវិញ។
សាក្សីនៅនឹងកន្លែងកើតហេតុ បាននិយាយឲ្យដឹងថា លុះឌុបអ្នករងបួសទៅបានចំងាយប្រហែល កន្លះគីឡូដីពីកន្លែងកើតហេតុ ស្រាប់តែបានហៅទូរស័ព្ទ មកប្រាប់សាច់ញាតិដែលកំពុងនៅដោះស្រាយថា ជនរងគ្រោះបានបាក់ជើងទៅហើយ ដែលកំពុងសំរាកព្យាបាលនៅមន្ទីពេទ្យ។ បងស្រីរបស់ជនរបួសជើងនោះ បានទារសំណងពីម្ចាស់រថយន្ត ៣០០ដុល្លា ប៉ុន្តែម្ចាស់រថយន្ដឲ្យត្រឹមតែ ៣០ដុល្លាប៉ុណ្ណោះ បង្កឲ្យមានការមិនស្រុះស្រួលគ្នាផ្ទុះឡើង។
ភាគទាំងសងខាង បាននាំគ្នាមកមើលអ្នករបួសដល់ មន្ទីរពេទ្យមិត្តភាពខ្មែរ-សូវៀត តែត្រូវបានបុរសជាអ្នកជិះម៉ូតូបង្វិលពេញមួយយប់ ព្រោះពួកគាត់មិនបានទៅមន្ទីរពេទ្យ ឲ្យពេទ្យណាម្នាក់ពិនិត្យឡើយ។ ដោយធុញទ្រាន់នឹងការឈ្លោះប្រកែកគ្នាយូរ ម្ចាស់រថយន្ដបានប្រគល់លុយ ទៅភាគីដែលប្រកាសថាខ្លួន មានរបួសនោះចំនួន ១៨០ដុល្លា ដើម្បីបញ្ចប់រឿង។
សាក្សីដដែល បានប្រាប់ទស្សនាវដ្តីថា បុរសទាំងពីរនាក់ ដែលបានជិះម៉ូតូទៅប៉ះរថយន្តខាងលើនេះ ទំនងជាបើកបរទាំងស្ថានភាពស្រវឹងស្រាផង ទើបបណ្តាលឲ្យមានហេតុការណ៍ គ្រោះថ្នាក់ចរាចរណ៍កើតឡើង។
រីឯនគរបាលចរាចរណ៍វិញ មិនអាចបញ្ជាក់ថា អ្នកណាខុសអ្នកណាត្រូវបានទេ នៅពេលទស្សនាវដ្ដីសាកសួរ។ នគរបាលមួយរូប បាននិយាយថាថា គាត់មិនមែនជាតុលាការកាត់ក្តី ឲ្យបុគ្គលណាមួយត្រូវឫខុសឡើយ។ នគរបាលនោះ បានបញ្ជាក់ដូច្នេះ៖ «ខ្លាចបងប្អូនគេ (ខាងភាគីម៉ូតូ) វាយ... ឲ្យខ្ញុំវិនិច្ឆ័យ ...ខ្ញុំមិនមែនតុលាការអីណា!»៕