ម្ចាស់ខ្សែក្រវាត់ ISKA ពិភពលោក វ៉ន វីវ៉ា បាន​សរសេរ​សារ​បញ្ឈឺ​កីឡាករ សេន ប៊ុនថេន នៅ​លើ​គណនី​ហ្វេសប៊ុក​របស់​លោក​ថា៖ «ចាស់​ថា​កុំ​អួត​ពេក ចាញ់​គឺ​វា​អញ្ចឹង ហាហា ខ្លាំង​ទៀត​ទៅ​អា​ប្អូន! ស្តាយ​ណាស់ បើ​ដឹង​ថា​ឯង​អញ្ចឹង​នោះ បង​មិន​ទុក​ឲ្យ​បាន​៥ទឹក​ទេ។ ៤ទឹក​មិន​ទាន់​ទេ គឺ​អា​ប្អូន​សុំ​បង (កុំ​វ៉ៃ​ពេក ជួយ​គ្នា​ឲ្យ​បាន​ចប់​ទឹក​ផង នេះ​ជា​ពាក្យ​របស់ សេន ប៊ុនថេន)។»

ពាក្យសម្ដីផ្លែផ្កាឌឺដង របស់​កីឡាករ​ដែល​ទើប​រៀប​អាពាហ៍​ពិពាហ៍​ថ្មី ជា​មួយ​កីឡាការិនី សន ដាវិន បាន​កើត​ឡើង​នៅ​បន្ទាប់​ពី​កីឡាករ សេន ប៊ុនថេន បាន​ប្រកួត​ចាញ់​កីឡាករ​បារាំង Antone Pinto ជា​លើក​ទី២ ក្នុង​ព្រឹត្តិការណ៍ Thai Fight នៅ​ថៃ។ មិន​ត្រឹម​តែ​ពាក្យ​សរសេរ​ខាង​លើ​នេះ​ប៉ុណ្ណោះ​ទេ តែ​កីឡាករ​ប្រដាល់​ដ៏​ល្បី​ឈ្មោះ វ៉ន វីវ៉ា បាន​បញ្ឆេះ​កំហឹង​បន្ថែម​ឲ្យ​កីឡាករ សេន ប៊ុនថេន ទៀត​ថា៖ «សុំ​ទោស​បង​ប្អូន ខ្ញុំ​មិន​គួរ​និយាយ​ពាក្យ​ទាំង​នេះ​ទេ តែ​គាត់​ធ្លាប់​ថា​ឲ្យ​រូប​ខ្ញុំ​ខ្លាំងៗ​ពេក (ឥឡូវ​ខ្ញ្ញុំ​ចង់​ឲ្យ សេន ប៊ុនថេន បាន​លឺ​ថា ខ្ញុំ​នេះ​និយាយ​ពិត​ឬ​ទេ?)»។ កីឡាករ​រូប​នេះ ថែម​ទាំង​និយាយ​ឲ្យកីឡករ ប៊ុនថេន ដាក់​តម្លៃ​ខ្លួន​ឡើង​វ៉ៃ​ដូច្នេះ៖ អ្នក​ឈ្នះ​បាន ៨០០០​ដុល្លារ រី​ឯ​អ្នក​ចាញ់​បាន​តែ ៨០​ដុល្លារ​ប៉ុណ្ណោះ។ «ហ៊ានឬអត់?»។

បន្ទាប់ពីត្រូវកីឡាករម្ចាស់ខ្សែក្រវាត់ ISKA ពិភពលោកវ៉ន វីវ៉ា ដែលត្រូវជាបងថ្លៃ របស់ម្ចាស់មេដាយមាស កីឡា​អាស៊ីកីឡាការិនី ស៊ន សៀវម៉ី ដុតឱ្យក្តៅស្លឹកត្រចៀករួចមក កីឡាករ សេន ប៊ុនថេន ដែលកំពុងរងការអាម៉ាស ព្រោះចាញ់កីឡាករជាតិបារាំងស្រាប់ផង បានសរសេរឌឺដាក់ផ្លែទៅវិញថា៖ «ម្ចាស់ខ្សែក្រវាត់ ISKA ដូចជាចេះ​ដឹងគួរសមដែរ ឯឈ្មោះក៏ល្បី ចុះហេតុអីបានជាសំដីចេញមក ដូចជាមនុស្សមិនដែលចូលសាលា ...។ ខ្ញុំក៏​ដូច​ជាមិនព្រឺ ក្នុងរឿងនេះដែរ។»

សេន ប៊ុនថេន ដែលឆ្លើយឆ្លងសារ តាមរយៈទំព័រហ្វេសប៊ុកឈ្មោះ Sen Bunthen បានសរសេរបន្តថា បើ វ៉ន វីវ៉ា គ្រាន់បើមែននោះ តើ វ៉ន វីវ៉ា ហ៊ានដាក់ខ្សែក្រវាត់ ISKA ដែលមួយជីវិតរបស់ខ្លួនដណ្តើមបានតែមួយនេះ​ដែរ​ទេ? បើហ៊ានដាក់ថ្ងៃ លោកស្វាគមន៍ម្ចាស់ខ្សែក្រវាត់ ISKA ជានិច្ច ថែមទាំងកំណត់ថ្ងៃនៅឆ្នាំ២០១៥ខាងមុខ​នោះ​ទៀត។ សេន ប៊ុនថេន បានសរសេរបន្ថែមថា៖ «ខ្ញុំឲ្យដាក់ពេលកំណត់នេះ ពីព្រោះខ្ញុំមានកម្មវិធីប្រកួត នៅ​ក្រៅ​ប្រទេសច្រើន ដែលគេមករកខ្ញុំ ព្រោះថា ខ្ញុំបាទ សេន ប៊ុនថេន មិនមែនជាកង្កែបក្នុងអណ្តូង ដូចម្ចាស់ខ្សែក្រវាត់ ISKA ទេ»។

សង្គ្រាមពាក្យសម្ដី រវាងអ្នកប្រដាល់ក្បាច់គុនបុរាណខ្មែរ ដ៏ល្បីខ្ទខ្ទាថា ជាជើងខ្លាំងរបស់កម្ពុជាទាំង២រូបនេះ មិន​បានគេចផុតពីការតាមដាន របស់អ្នកស្នេហាវិស័យកីឡានានាឡើយ។ ហើយការឆ្លើយឆ្លងគ្នានេះ បានបង្កឲ្យ​មាន​ប្រតិកម្ម ពីពិភពស្នេហាកីឡាទាំងនោះ ដោយពួកគេបានរិះគន់កីឡាករទាំងពីរថា មិនចេះសហការគ្នា យក​ការច្រណែនជាត្រីមុខ ការមិនឲ្យតម្លៃគ្នា បង្កការរិះគន់ក្នុងន័យជាន់ពន្លិច ហើយមិនបានធ្វើ​ឲ្យកីឡា​ខ្មែររីក​ចម្រើន​អ្វីសោះឡើយ។ ផ្ទុយទៅវិញ ភាសានិយាយចុះឡើងរបៀបនេះ បានធ្វើឲ្យអាប់ឱនយ៉ាងខ្លាំង ដល់វិស័យ​កីឡា​ប្រដាល់​ខ្មែរ។

ទស្សនិកជនម្នាក់បានសរសេរថា៖ «ខ្ញុំមិនសន្មត់ថារឿងនេះ មកពីខាងណានោះទេ ប៉ុន្តែពិតជាមានអារម្មណ៍ថា ខកចិត្ត ពេលមើលឃើញរឿងមួយនេះ បានកើតឡើង!!! ខ្ញុំឃើញ Status នេះបង្ហោះក្នុងគណនីហ្វេសប៊ុក របស់ វ៉ន វីវ៉ា តាំងពីកីឡាករ Sen Bunthen ចាញ់ម្ល៉េះ។ ជាកីឡាករអាជីពមួយរូប គួរតែមានចិត្តធ្ងន់។ កីឡាករ វ៉ន វីវ៉ា ធ្វើបែបនេះ អាចនឹងត្រូវបាត់បង់ប្រជាប្រិយភាព។»

ម្ចាស់គណនីមួយរូបទៀត បានសរសេរបញ្ចេញយោបល់ដែរថា «យើងសុទ្ធតែខ្មែរដូចគ្នា យើងគួរណាស់​តែ​រួប​រួមគ្នា.... ក្នុងនាមជាកីឡាករអាជីព គួរតែមានមោទនភាព ដែលបានមិត្តរួមអាជីពឡើងប្រកួតក្នុង​ឆាក​អន្តរជាតិ !!! មានកីឡាទើបគេស្គាល់កម្ពុជា»។

ចំណែកប្រិយមិត្តម្នាក់ផ្សេង ដែលមិនជឿថា នោះជាសម្តីរបស់អ្នកទាំងពីរ ក៏បានបានចោទសួរទៅកាន់​ប្រិយមិត្ត​ដ៏ទៃទៀតថា៖ «សេន ប៊ុនថេន នឹង វ៉ន វីវ៉ា កំពុងតែបញ្ចេញចង្កូមដាក់គ្នា (...) តើនេះជាការពិតដែររឺទេ? ក្រែង​ពួក​គាត់ទាំងពីរ ជាមិត្តភក្ក័នឹងគ្នាឬ? តើ Account ដែលបានផុសនោះជា Account ពិតប្រាកដអត់?»

ទស្សនាវដ្ដីមនោរម្យ.អាំងហ្វូ មិនអាចធ្វើការទំនាក់ទំនង សុំការបំភ្លឺពីកីឡាករទាំងពីរនាក់បានទេ ក្នុងពេលនេះ​ប៉ុន្តែនឹងបន្តព្យាយាម ដើម្បីជម្រាបជូនមិត្តអ្នកអានបានជ្រាប ក្នុងអត្ថបទចេញផ្សាយលើកក្រោយរបស់ខ្លួន៕