គំនូរ​គ្មាន​ចំណង​ជើង​មាន​តែ​ពណ៌ លក់​បាន៧៦​លាន​ដុល្លារ នៅ​អាមេរិក

នៅដើមសប្ដាហ៍នេះ នាទីក្រុងញ៉ូយក សហរដ្ឋអាមេរិក គ្រឹះស្ថានដេញថ្លៃ សូធើបាយ (Sotheby's) ទើប​នឹង​បាន​សម្រេច​លក់ដាច់ នូវផ្ទាំងគំនូរចំនួនពីរ របស់វិចិត្រករគំនូរព្រាល (abstrait) ដ៏ល្បីឈ្មោះជាតិអាមេរិកាំង លោក ម៉ាក រ៉ូតខូ (Mark Rothko)។​ តម្លៃ​ដែល​លក់​ដាច់៖ ៧៦,៥លានដុល្លារ។
Loading...
  • ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី១២ វិច្ឆិកា ២០១៤
  • កែប្រែចុងក្រោយ: November 12, 2014
  • ប្រធានបទ: វិចិត្រកម្ម
  • អត្ថបទ: មានបញ្ហា?
  • មតិ-យោបល់

ចំណងជើងរបស់ផ្ទាំងគំនូរទាំងពីរនេះ គឺ​«គ្មាន​ចំណង​ជើង» និង​«គ្មាន​ចំណង​ជើង (ពណ៌​លឿង ទឹក​ក្រូច លឿង ទឹក​ក្រូច​ភ្លឺ)»។ បើ​គេ​មើល​ពី​ចំងាយ គេ​នឹង​ឃើញ​គំនូរ​នេះ បាន​ពន្លេច​នូវ​ពណ៌​យ៉ាង​ចែង​ចាំង និង​​រស់​រវើក។ ផ្ទាំង​​គំនូរ​ទី​មួយ ដែល​ត្រូវ​បាន​គូរ​នៅ​ឆ្នាំ១៩៧០ បាន​លក់​ដាច់​ក្នុង​តម្លៃ ៣៩,៩លានដុល្លារ ខណៈ​ពេល​ដែល​ផ្ទាំង​គំនូរ​មួយ​ទៀត បាន​លក់​ដាច់​ក្នុង​តម្លៃ ៣៦,៦លាន​ដុល្លារ។

លោក ម៉ាក រ៉ូតខូ ជា​វិចិត្រករ​​ជាតិ​​អាមេរិកាំង ដែល​​មាន​​ដើម​​កំណើត ឡេតូនី។ លោក​​ត្រូវ​​បាន​​គេ​​ចាត់​​ទុក​​ថា ជា​កំពូល​​វិចិត្រករ​​ដៃ​​ទិព្វ ផ្នែក​​សិល្បៈ​​ទំនើប។ ស្នា​ដៃ​​របស់​លោក​ជា​ច្រើន នឹង​​ផ្ដល់​ឲ្យ​អ្នក​ផង​ទាំង​ឡាយ មើល​ឃើញ​​ក្នុង​រយៈ​ពេល​មួយ​ភ្លែត​ដំបូង យល់​ថា​គ្រាន់​តែ​ជា​បណ្ដុំ នៃ​ពណ៌​ច្រើន​រួម​បញ្ចូល​គ្នា​ប៉ុណ្ណោះ។ ប៉ុន្តែ​សម្រាប់​អ្នក​​ស្នេហា​​ផ្ទាំង​​គំនូរ​ និង​អ្នក​វិភាគ​សិល្បៈ មិន​បាន​មើល​ឃើញ​ផ្ទាំង​គំនូរ​ទាំង​នោះ គ្រាន់​តែ​ជា​បណ្ដុំ​ពណ៌​នោះ​ទេ។

បន្ទាប់ពីមរណភាពរបស់លោកនៅឆ្នាំ១៩៧០នោះមក ស្នាដៃរបស់លោកត្រូវបានគេឲ្យតម្លៃដល់កំពូល។ កាល​ពីឆ្នាំ២០១២ ផ្ទាំងគំនូរមួយដែលប្រជុំទៅដោយពណ៌ ទឹកក្រូច ក្រហម លឿង ដែលត្រូវបានលោក​គូរក្នុង​ឆ្នាំ​១៩៦១នោះ បានលក់ដាច់ក្នុងតម្លៃប្រមាណជា ៨៧លានដុល្លារ។

ប៉ុន្តែមិនមែនមានតែគំនូរតែពីរនេះទេ ព្រោះក្នុងសប្ដាហ៍នេះដដែល ផ្ទាំងគំនូរដ៏ចម្លែកពីរទៀត របស់លោក រ៉ូតខូ ក៏ត្រូវបានដាក់ឲ្យដេញថ្លៃដែរ។ ហើយផ្ទាំងគំនូរទាំងនេះ ជាការប្រមូលចងក្រងជាឯកជន ដោយលោកស្រី​ត្រកូល មើឡុន ឈ្មោះ Rachel "Bunny" Mellon ដែលល្បីឈ្មោះខាងដើរទិញ យកវត្ថុសិល្បៈពិសេសៗ​ទាំង​ឡាយ ដើម្បីជាការកំសាន្ដរបស់ខ្លួន។ លោកស្រី ប៊ុននី មើឡុន បានធ្វើមរណភាពទៅហើយ កាលពីខែមិនា​កន្លង​ទៅ ហើយវត្ថុសិល្បៈដែលគាត់បានប្រមូលទុកនោះ កំពុងដាក់ចេញលក់ដេញថ្លៃបណ្ដើរៗ។ វត្ថុ​សិល្បៈ​មួយចំនួនទៀត ត្រូវបានបញ្ជូនទៅធ្វើជាអំណោយ សម្រាប់សារមន្ទីរជាតិមួយ នៅរដ្ឋធានីវ៉ាស៊ីនតោន៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...