ល្បីដំឡូងជ្វាកំពង់ឆ្នាំងថាឆ្ងាញ់ លក់ដាច់រាប់រយគីឡូមួយថ្ងៃៗ (vdo)
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ០៣ វិច្ឆកា ២០១៤
- កែប្រែចុងក្រោយ: November 05, 2014
- ប្រធានបទ: ចង់ឆ្ងាញ់
- អត្ថបទ: មានបញ្ហា?
- មតិ-យោបល់
-
«លឺគេនិយាយរាប់រយដង មិនស្មើរនឹងបានភ្លក្សម្តងទេ» នេះជាការនឹកភ្នក របស់អ្នកដំណើរស្ទើរគ្រប់គ្នា ដែលធ្វើដំណើរនៅតាមដងផ្លូវជាតិលេខប្រាំ ហើយបានឃើញដំឡូងពិសេស ដែលដាំមិនប្រើជីគីមីទាំងនោះ ប្រាកដជាមិនអាចបើកបង្ហួសទៅបានឡើយ។ បំណងរបស់ពួកគេ គឺចង់សាកល្បងរសជាតិ ដំឡូងធម្មជាតិ របស់កសិករខេត្តកំពង់ឆ្នាំង។
ហើយដោយសារតែហេតុនេះហើយ ទើបមានសំដីបានលើកឡើងថា ករសិករដាំដំឡូងទាំងនោះ កំពុងឡើងកូដខ្លាំង ដោយសារដំឡូងជ្វា«ផ្អែមឆ្ងាញ់» ដែលជាដំណាំកសិផលរបស់ពួកគាត់ ជំរុញឲ្យអ្នកទទួលទានច្រើនឡើង បានឈប់ចុះទិញ យ៉ាងច្រើនកុះករ នៅតាមបណ្ដោយផ្លូវជាតិលេខប្រាំ ជាពិសេសក្នុងឱកាសរដូវបុណ្យកឋិនទានឆ្នាំនេះ។
ក្នុងមួយថ្ងៃ ប្រជាពលរដ្ឋមួយចំនួនដែលរស់នៅខេត្តកំពង់ឆ្នាំង អាចរកចំណូលបាន ៤ម៉ឺនទៅ ៥ម៉ឺន ពីផលចំណេញនៃការលក់ដំឡូង ហើយគេអាចលក់អស់ដទៅ ២ទៅ ៣រយគីឡូក្រាម ឯណោះក្នុងមួយថ្ងៃ។ ដំឡូងនៅទីនោះ មិនត្រឹមតែមានរស់ជាតិឆ្ងាញ់ទេ ថែមទាំងមានតម្លៃថោកទៀតផង មួយគីឡូត្រឹមតែ ៥០០រយរៀល ទៅ ១២០០រៀលប៉ុណ្ណោះ តាមទំហំតូចធំ។
លោក ប៊ុន ធុល អ្នកដំណើរមកពីបុណ្យកឋិន នៅវត្តមួយក្នុងខេត្តកំពង់ឆ្នាំង បានប្រាប់ទស្សនាវដ្តីមនោរម្យ.អាំងហ្វូថា៖ «ដំឡូងណ្នឹងវាឆ្ងាញ់ ខ្ញុំឈប់ទិញផ្ញើរអ្នកនៅផ្ទះ វាផ្អែម យើងទិញម្នាក់ ៥គីឡូ ១០គីឡូ។»
ស្ត្រីម្នាក់ទៀតឈ្មោះ ចាន់ ធ្វើដំណើរមកពីបុណ្យកឋិនវត្តរំដួល ខេត្តកំពង់ឆ្នាំងដូចគ្នា បាននិយាយដែរថា គាត់បានឃើញដំឡូងនេះល្អហើយ មានតម្លៃថោក ការដាំដុះរបស់គេមិនប្រើជីគីមីទេ គាត់បានទិញដំឡូងនេះ សំរាប់ផ្ញើរអ្នកផ្ទះ ៦ គីឡូក្រាម។
កសិករមួយរូប បាននិយាយថា ក្នុងមួយឆ្នាំគាត់អាចដាំដំឡូង បានក្នុងមួយហិចតា ហើយទទួលបានផលមួយតោន ដោយមិនប្រើប្រាស់ជីគីមីនោះទេ។ កសិកររូបនោះ បានបន្ថែមទៀតថា ក្នុងមួយគីឡូក្រាម ដំឡូងរបស់គាត់ អាចលក់ចេញបាន ចាប់ពីមួយពាន់រៀលឡើងទៅ ចំពោះដំឡូងណាដែលមានមើមធំៗ៕