រ៉ុង ឈុន៖ GMAC គួររៀបចំខ្លួនឆ្លើយចំពោះមុខរដ្ឋសភា
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញ ថ្ងៃទី០៤ វិច្ឆិការ ២០១៤
- កែប្រែចុងក្រោយ: November 04, 2014
- ប្រធានបទ: ១ពាន់លានដុល្លារ
- អត្ថបទ: មានបញ្ហា?
- មតិ-យោបល់
-
ប្រធានសហភាពសហជីពកម្ពុជា លោក រ៉ុង ឈុន បានស្នើសុំឲ្យសមាគមរោងចក្រកាត់ដេរនៅកម្ពុជា ហៅកាត់ថា GMAC នោះ ត្រឡប់ទៅមើលសេចក្តីថ្លែងការណ៍របស់លោកឲ្យបានច្បាស់ មុននឹងធ្វើប្រតិកម្មមករូបលោក។ ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ លោកបានរំលឹកថា អ្វីដែលលោកបានលើកឡើង ក្នុងសេចក្តីថ្លែងការណ៍កាលពីថ្ងៃទី២៨ ខែតុលានោះ ជាការអះអាងរបស់ GMAC ដោយផ្ទាល់ខ្លួនឯង ជាមួយសារព័ត៌មានក្នុងស្រុកមួយ កាលពីដើមសប្តាហ៍មុន។
លោក រ៉ុង ឈុន បាននិយាយថា៖ «យើងមិនចេះតែចោទប្រកាន់អ្នកណា ឥតមានមូលដ្ឋានទេ។ សេចក្តីថ្លែងការណ៍នេះ គ្រាន់តែយើងដកស្រង់ ពីសារព័ត៌មានក្នុងស្រុកមួយ ដែលបានចុះរបាយការណ៍ហិរញ្ញវត្ថុរបស់ GMAC។ ក្នុងរបាយការណ៍នោះ បានចង្អុលបង្ហាញថា បានផ្តល់លុយទៅក្រសួងពាណិជ្ជកម្ម ៥០០០ (ប្រាំពាំន់ដុល្លារអាមេរិក) និងអាវយឺតទាហ៊ានមួយពាន់លានដុល្លា។»
ការថ្លែងរបស់លោក រ៉ុង ឈុន បានធ្វើឡើង បន្ទាប់ពីសមាគមរោងចក្រកាត់ដេរនៅកម្ពុជា បានចេញសេចក្តីថ្លែងការណ៍ កាលពីថ្ងៃទី៣ ខែវិច្ឆិកាម្សិលម៉ិញនេះ ប្រតិកម្មតបទៅនឹង សេចក្តីថ្លែងការណ៍របស់ ប្រធានសហភាពសហជីពកម្ពុជា លោក រ៉ុង ឈុន ដែលបានលើកឡើងថា ទឹកប្រាក់ប្រមាណមួយពាន់លានដុល្លារ ទៅកាន់ស្ថាប័នរដ្ឋមួយចំនួននោះ ជាឧបសគ្គដល់ការ តំឡើងប្រាក់ឈ្នួលកម្មករអប្បរមាន ១៧៧ដុល្លារ ក្នុងមួយខែ។
«ឆ្កួតវងេ្វង»
សេចក្តីថ្លែងការណ៍ថ្ងៃទី៣ ខែវិច្ឆិកាដដែលរបស់ GMAC បានជំរុញឲ្យ លោក រ៉ុង ឈុន ដកចេញនូវសេចក្តីថ្លែងការណ៍នោះ ដោយចាត់ទុកថា ការអះអាងមិនមែនជាការពិត និងប៉ះពាល់ដល់កេរ្តិ៍ឈ្មោះរបស់ GMAC។ GMAC បានចោទប្រកាន់ទៅលោក រ៉ុង ឈុន ចំៗថា៖ «សេចក្តីថ្លែងការណ៍នេះ មិនត្រឹមតែជាការមិនពិត និងមានចេតនាបង្ខូចកេរ្តិ៍ឈ្មោះប៉ុណ្ណោះទេ តែថែមទាំងមានលក្ខណៈឆ្កួតវង្វេង គួរឲ្យអាម៉ាសបំផុត។»
ទាក់ទិននឹងលើកឡើងក្នុងរបាយការណ៍ GMAC ការចោទប្រកាន់ខាលើនេះ លោក រ៉ុង ឈុន បានបញ្ជាក់ថា «GMAC ចេញសេចក្តីថ្លែងការណ៍ ដើម្បីលាងខ្លួនហើយ។ (...) រឿងនេះធំណាស់ ដោយសាតែមានទំនាក់ទំនងយ៉ាងស្អិតរមួតរវាង GMAC និងមន្រ្តីរដ្ឋាភិបាល ស្ថាប័នរដ្ឋមួយចំនួន។ នេះជាឧបសគ្គ ដល់ការតម្លើងបៀរវត្ស។»
ប្រធានសហភាពសហជីពកម្ពុជា បានឲ្យខាង GMAC រៀបចំខ្លួន ដើម្បីឆ្លើយនៅចំពោះមុខរដ្ឋសភា ពីករណីលុយ ប្រមាណជាងមួយពាន់លានដុល្លានោះ។ លោកថា ក្រៅពីសេចក្តីថ្លែងការណ៍នេះ ក្រុមការងារសហព័ន្ធទាំងប្រាំបី ក៏បានស្នើលិខិតមួយទៅកាន់រដ្ឋសភា កាលពីសប្តាហ៍មុនរួចរាល់ហើយ ដើម្បីស្នើសុំធ្វើការកោះហៅ មកសាកសួរ និងបំភ្លឺ។ លោកបានបញ្ជាក់ទៀតថា៖ «រឿងនេះមិនត្រឹមតែថ្លែងការណ៍ទេ យើងបានដាក់ទៅរដ្ឋសភាមួយទៀត ក្នុងនាមសហព័ន្ធឃ្លាំមើល ដែលមានសហព័ន្ធចំនួនប្រាំបី ចុះហត្ថលេខា ដើម្បីស្នើសុំឲ្យធ្វើការសាកសួរ។ សូមថ្នាក់ដឹកនាំ GMAC រៀបចំខ្លួនឲ្យហើយទៅ។»៕
