បទ​«ល្បី​ដល់​ក្អួត​ឈាម» កើត​ពី​ការ​ចំអក (Troll) របស់​អ្នក​ប្រើ​ប្រាស់​ហ្វេសប៊ុក

បទថ្មីមួយ ដែលមានចំណងជើងថា «ល្បីដល់ក្អួតឈាម» នឹងចេញជារូបរាងក្នុងពេលឆាប់ៗខាងមុខនេះ បន្ទាប់​ពី​យុទ្ធនាការ​សើច​ចំអក ដ៏សន្ធឹកសន្ធាប់មួយ ពីសំណាក់អ្នកប្រើប្រាស់ហ្វេសប៊ុក។
Loading...
  • ដោយ: អ៊ុម វ៉ារី ដោយ ប្រាថ្នា (ទំនាក់ទំនង៖ [email protected] ) - ភ្នំពេញ ថ្ងៃទី១៥ តុលា ២០១៤
  • កែប្រែចុងក្រោយ: November 01, 2014
  • ប្រធានបទ: ចម្រៀង
  • អត្ថបទ: មានបញ្ហា?
  • មតិ-យោបល់

នៅពេលដែលអ្នកស្តាប់បទ Apolojoy របស់​តារា​ចម្រៀង​បរទេស​នោះ អ្នក​នឹង​នឹក​ឃើញ​ដល់​តារា​ចម្រៀង ទើប​នឹង​ដុះ​ពន្លក​ម្នាក់ ដែល​គេ​ដាក់​រហស្ស​នាម​ឱ្យ​ថា «Apolojoy» ដែល​ជា​តារា​ច្រៀង​ល្បី​ឈ្មោះ តាម​រយៈ​ការ​ចំអក (Troll) របស់​ទស្សនិក​ជន នៅ​លើ​បណ្តាញ​សង្គម​ហ្វេសប៊ុក ។ ឥលូវ​តារា​ច្រៀង​ពន្លក​ថ្មី​រូប​នេះ ត្រៀម​នឹង​ចេញ​បទ​ថ្មី​មួយ​ទៀត ដែល​និពន្ធ​ទំនុក​ភ្លេង និង​ច្រៀង​ផ្ទាល់ ដែល​មាន​ចំណង​ជើង​ថា «ល្បី​ដល់​ក្អួត​ឈាម»។

«ល្បីដល់ក្អួតឈាម» គឺ​ជា​បទ​ថ្មី​ដែល​កើត​ចេញ​ពី​ការ​រិះគន់ ឌឺដង ឬ​បន្តុះ​បង្អាប់​របស់​ទស្សនិកជន ដែល​ប្រើប្រាស់​បណ្តាញ​សង្គម​ហ្វេសប៊ុក ទៅ​លើ​តារា​ចម្រៀង​ម្នាក់ ដែល​ទើប​ចាប់​ផ្តើម​ដុះ​ពន្លក ជា​តារា​ចម្រៀង​នៅ​លើ​វិថី​សិល្បៈ ហើយ​ធ្លាប់​ឡើង​ច្រៀង​នៅ​លើ​កញ្ចក់​ទូរទស្សន៍ នា​ពេល​កន្លង​មក។

បទ«ល្បីដល់ក្អួតឈាម»នេះ ក៏នឹងត្រៀមចេញវីស៊ីឌីលក់ ក្នុងពេលឆាប់ខាងមុខនេះដែរ នៅក្នុងផលិតកម្ម World Song។ បន្ទាប់ពីស្ងាត់មុខមួយរយៈ តារាចម្រៀង រស់ សេរីវណ្ណាត ហៅ Apolojoy បានចេញមុខជាថ្មី ដើម្បី​បកស្រាយពីចម្ងល់របស់ទស្សនិកជន ក្រោយពីពួកគេបានឃើញរូបថតក្អួតឈាម នៅក្នុងបន្ទប់ជួល រហូត​ដល់មានទំព័រ Troll ជាច្រើនយកទៅចុះផ្សាយ ក្នុងបណ្តាញសង្គមហ្វេសប៊ុក។

ក្នុងវីដេអូដែលមានរយៈពេល ៩ នាទី ដែលបានបង្ហោះ នៅលើបណ្តាញសង្គមហ្វេសប៊ុកនោះ រស់ សេរីវណ្ណាត ម្ចាស់បទ«ល្បីដល់ក្អួតឈាម» បានបញ្ជាក់ថា រូបថតដែលបង្ហោះចេញទៅនោះលើបណ្តាញសង្គមហ្វេសប៊ុក មិនមែនជាការពិតឡើយ  គ្រាន់តែជាឈុតមួយ នៅក្នុងការសម្តែងបទល្បីដល់ក្អួតឈាម។ ប៉ុន្តែតារា​ចម្រៀង​ពន្លកថ្មីរូបនេះ បានបញ្ជាក់ថា បេះដួងរបស់គេឈឺចាប់ និងរងរបួសផ្លូវចិត្តធ្ងន់ធ្ងរ ជាងសភាពក្អួតឈាម ក្នុង​រូប​ថតនេះទៅទៀត នៅពេលដែលលឺពាក្យទាំងឡាយ របស់អ្នកប្រើប្រាស់បណ្តាញសង្គមហ្វេសប៊ុក បាន​រិះគន់ និងនិយាយពាក្យបញ្ចើចបញ្ចើ មកលើខ្លួន។

លោកបន្តថា៖ «ព្រោះកាលណា ដែលយើងក្អួតឈាមចេញមក វាហាក់ធូរស្រាលជាង ប៉ុន្តែការដែលយើង​គ្រាំ​ឈាម​នៅខាងក្នុង ទើបជាការលំបាក»។ លោកថា នៅពេលដែលលោក បានជួបនូវការវាយ​ប្រហារផ្លូវចិត្ត​បែប​នេះ លោកត្រូវគេចវេសន៍ ពីមនុស្សម្នាទាំងឡាយ ទៅណាមកណា ត្រូវពាក់ម៉ាសគេចពីអ្នកដ៏ទៃ។ ប៉ុន្ត​តារា​ចម្រៀង​រូបនេះ បញ្ជាក់ថា ចាប់ពីថ្ងៃនេះតទៅ លោកនឹងប្រឈមមុខជាមួយទស្សនិកជន។

ចំពោះបទចម្រៀង«ល្បីដល់ក្អួតឈាម»នេះ លោក Apolojoy មានបំណងចង់លាក់ទុកសិន ទុកឱ្យ​ទស្សនិកជន​ភ្ញាក់ផ្អើល។ ក្រៅពីបទល្បីដល់ក្អួតឈាមនេះ តារាចម្រៀងរូបនេះ ក៏នឹងប្តេជ្ញាស្តារ​បទចម្រៀង​មួយចំនួនរបស់ខ្លួនឡើងវិញ ដើម្បីទទួលបានបានចាប់អារម្មណ៍ និងបម្រើអារម្មណ៍ទស្សនិកជន។ បទទាំង​នោះ មាន «ស្រីស្រស់ចិត្តធម៌ ស្នេហ៍ស្រីជានិច្ច អ្នកក្រត្រដរចង់មាន និងបេះដូងរងកម្ម» ជាដើម។ លោក​បញ្ជាក់ថា បើទោះបីជាបទល្បីដល់ក្អួតឈាមនេះ ជាស្នាដៃនិពន្ធទាំងសាច់ភ្លេង និងទំនុកច្រៀងដោយខ្លួន​លោកផ្ទាល់ក្តី ប៉ុន្តែនេះ មិនមែនជាលោកទីមួយឡើយ ព្រោះកាលពី៧ ទៅ៨ឆ្នាំមុន លោកក៏ធ្លាប់និពន្ធបទភ្លេង Original បែបនេះដែ។

សម្រាប់ទស្សនិកជនមួយចំនួន បានលើកឡើងថា មិនគួរណានាំគ្នាបន្តុះបង្អាប់ រិះគន់លោក រស់ សេរីវណ្ណាត នោះទេ។ ផ្ទុយទៅវិញ គេគួរតែតែលើកចិត្តដល់លោក ដែលខិតខំផលិតបទខ្លួនឯង មិនចម្លងគេ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...