បន្ទាប់ពីបានចុះទៅធ្វើទស្សនកិច្ច និង​សំណេះ​សំណាល ប្រជា​ពលរដ្ឋ​នៅ​ខេត្ត​បាត់ដំបង​ហើយ លោក សម រង្ស៊ី ប្រធាន​គណៈបក្ស​សង្គ្រោះ​ជាតិ បាន​យក​ឱកាស​នោះ ទៅ​តាមដាន​ពី​សកម្មភាព នៃ​ការ​លួច​ធ្វើ​អាជីវកម្ម​ថ្ម​កែវ នៅ​ភ្នំ​សិលា​កែវ ឃុំ​តាគៀម ស្រុក​បាណន់ ខេត្ត​បាត់ដំបង កាល​ពី​ថ្ងៃ​ទី ៣០ តុលា​ម្សិល​ម៉ិញ​នេះ។

ក្នុងវីដេអូមួយ ដែល​ត្រូវ​បាន​បង្ហោះ តាម​គណនី​ហ្វេសប៊ុក​របស់​លោក បាន​បង្ហាញ​ពី​ទិដ្ឋភាព នៃ​ការ​ទាញ​យក​ធនធាន​ធម្មជាតិ​ថ្ម​កែវ ដ៏​ល្អ​ប្រណិត ក្នុង​នោះ​មាន​ផ្ទាំង​ធំៗ​ថ្លា​ល្អ និង​មាន​តម្លៃ​ថ្លៃ​ជាង​ថ្ម​ដទៃ។ ថ្ម​កែវ​នៅ​ភ្នំ​សិលា​កែវ ដែល​អាច​ត្រូវ​បាន​យក​ទៅ​ប្រើប្រាស់​ ក្នុង​សំណង់​អាគារ​ប្រណិត​ទំនើបៗ​នោះ ទំនង​ជា​ត្រូវ​បាន​ដឹក​ចេញ​ទៅ​លក់ នៅ​ក្រៅ​ប្រទេស ព្រោះ​ថា​រថយន្ត​ដែល​ដឹក​ជញ្ជូន​ថ្ម​នេះ មាន​ស្លាក​លេខ​វៀតណាម។

ការធ្វើអាជីវកម្មយកថ្មកែវនេះ មានដំណើរការជាយូមកហើយ ហើយនៅតែបន្តធ្វើ ជារៀងរាល់ថ្ងៃ ប៉ុន្តែ​នៅ​ពេល​ដឹងថា ដំណើរទស្សនកិច្ចរបស់លោក សម រង្ស៊ី បានទៅដល់ខេត្តបាត់ដំបង ពួកគេបាន​បញ្ឈប់​ការ​ទាញ​យកថ្មកែវ ហើយបានទុកការដ្ឋាននោះចោល។ នេះបើតាមការលើកឡើងរបស់លោក សម រង្ស៊ី។ ប្រជាជន​ដែលនៅជិតនោះ បានលើកឡើងថា នៅពេលដែលគេដាក់គ្រឿងផ្ទុះយកថ្ម ជួនកាលបានធ្វើឲ្យដុំកំទេចថ្ម ផ្ទុះ​ទៅធ្លាក់ចំដំបូលផ្ទះរបស់ពួកគាត់ ហើយបង្កសំលេងរំខានដល់ការរស់នៅរបស់ពួកគាត់ និងសត្វ​ពាហណៈជា​ដើម។

លោក សម រង្ស៊ី ក៍បានលើកទៀតថា៖ «ការធ្វើអាជីវកម្មអីក៍ដោយ យកទ្រព្យសម្បតិ្តជាតិ ត្រូវតែផ្តល់ផល​ចំណេញ​ដល់ជាតិ ត្រូវតែផ្តល់ប្រាក់ចំណូល ផ្តល់ថវិការត្រូវតែបង់ពន្ធជូនរដ្ឋ ត្រូវតែមានការគ្រប់គ្រង កុំឲ្យ​មាន​ផលប៉ះពាល់ដល់បរិស្ថានហួសហេតុ កុំឲ្យរំខានដល់ប្រជាពលរដ្ឋ ដែលរស់នៅជុំវិញនេះហួសហេតុ។»

ទស្សនាវដ្ដីមនោរម្យ.អាំងហ្វូ នឹងព្យាយាមស្វែងរកប្រតិកម្ម ពីក្រុមហ៊ុននោះ ព្រមទាំងអាជ្ញាធរតំបន់ផង មកចុះ​ផ្សាយក្នុងអត្ថបទលើកក្រោយរបស់ខ្លួន៕