អាជីវករថា ក្រុមសន្ដិសុខជាអ្នក«លក់ផ្លូវ» តែអភិបាលខណ្ឌថា មិនដឹង!
- ដោយ: អ៊ុម វ៉ារី ដោយ អ៊ុម វ៉ារី (ទាក់ទង៖ [email protected]) - ភ្នំពេញថ្ងៃទី២៧ តុលា ២០១៤
- កែប្រែចុងក្រោយ: October 28, 2014
- ប្រធានបទ: ជ្រុងមួយ
- អត្ថបទ: មានបញ្ហា?
- មតិ-យោបល់
-
បញ្ហាជាច្រើន រាប់តាំងពីក្រុមសន្តិសុខផ្សារ យកលុយពីអាជីវករ ការបណ្ដេញលែងឲ្យលក់នៅលើទ្រូងថ្នល់ ការតម្លើងថ្លៃតូប។ល។ គឺជាបញ្ហា ដែលក្រុមអាជីវករនៅក្នុងផ្សារដើមគរ រាជធានីភ្នំពេញ បានថ្លែងរៀបរាប់ នៅក្នុងវេទិការសាធារណៈលើកទីមួយ កាលពីព្រឹកថ្ងៃទី២៧ ខែតុលានេះ។
អាជីវករលក់បន្លែម្នាក់នៃផ្សារដើមគរ អ្នកស្រី លឹម ដានី បានលើកឡើងពីបញ្ហា ដែលបង្កឡើងដោយក្រុមសន្តិសុខផ្សារ ថាចេះតែដើរប្រមូលប្រាក់ ពីក្រុមអាជីវករដូចគាត់ យកដាក់ហោប៉ៅ ដែលជាហេតុធ្វើឲ្យការរៀបចំសណ្ដាប់ធ្នាប់ផ្លូវជុំវិញផ្សារដើមគរ នៅជាប់គាំងមិនអាចដោះស្រាយរួច។ អ្នកស្រីបានថ្លែងឲ្យដឹងថា៖ «សន្តិសុខផ្សារដើមគរ ជាអ្នកលក់ផ្លូវយកលុយដាក់ហោប៉ៅ តើរៀបចំអ្វីនឹងចេញ? មួយកន្លែងចាប់ពី៥០០ដុល្លា ទៅ៥០០០ដុល្លា ស្រេចតែពួកគាត់ថា។ ឥឡូវមកវែកផ្លូវ ដើម្បីធ្វើចរាចរណ៍ល្អ វែកអ្វីនឹងចេញ វែកយ៉ាងម៉េចបើសន្តិសុខជាអ្នកលក់ផ្លូវ។ »
ចំណែកឯលោក ហុង ម៉េងឈៀង អាជីវករលក់បន្លែ ក្នុងផ្សារតាំងពីជាង១០ឆ្នាំមកហើយ បានរៀបរាប់ថា កាលពីថ្ងៃទី១៧ ខែកក្កដា ឆ្នាំ២០១៤ ប្រធានផ្សារដើមគរ បានចុះរៀបចំសណ្តាប់ធ្នាប់ផ្សារ និងឲ្យអាជីវករផ្សារមួយចំនួន ឲ្យផ្អាកការលក់ដូរ ជាបណ្តោះអាសន្ន ដើម្បីកិច្ចស្វាគមន៍ លោកនាយករដ្ឋមន្រ្តី មកសម្ភោធស្ពានអាកាសស្ទឹងមានជ័យ។ ផ្ទុយមកវិញ វាមិនមែនជាការផ្អាកលក់ដូរ ជាបណ្ដោះអាសន្នទេ តែត្រូវបានដកហូតទាំងស្រុង មិនឲ្យអាជីវករលក់ដូរបន្តទៀតឡើយ ហើយបានយកទីតាំងទាំងនោះ ទៅធ្វើជាចំណតរថយន្ត និងកន្លែងទទួលផ្ញើរម៉ូតូជាដើម។
លោក ហុង ម៉េង បានត្អូញត្អែរថា៖ «ពេលខ្ញុំដាក់អីវ៉ាន់លក់ សន្តិសុខផ្សារ រួមទាំងប៉ូលីសខណ្ឌ ចុះមកភ្លាម និងចាប់យកអីវ៉ាន់ខ្ញុំ តែម្នាក់ប៉ុណ្ណោះ ដោយគ្មានមូលហេតុអ្វីឡើយ។ (...) ឯអាជីវករមួយចំនួនទៀត លក់ពេញលើផ្លូវ មិនព្រមចាប់នោះទេ។»
ឯក្រុមអាជីវករមួយចំនួនទៀត ស្នើដល់អាជ្ញាធរខណ្ឌ ធ្វើយ៉ាងណាជួយរៀបរយផ្លូវ ព្រោះក្រុមអាជីវករផ្សេងទៀត បានយកឥវ៉ាន់ មកលក់ស្ទើរពេញផ្លូវ អស់ទៅហើយ។ អាជីវករខ្លះ លក់នៅពីមុខផ្ទះអាជីវករខាងក្នុង រកច្រកចូលទៅទិញ សឹងតែគ្មានទៅហើយ។ ម្យ៉ាងទៀត ក្រុមអាជីវករទាំងនោះ បានរអ៊ូរទៀតថា ជារៀងរាល់ថ្ងៃនេះ ពួកគាត់លក់មិនចាច់ទាល់តែសោះ ព្រោះតែគ្មានផ្លូវសម្រាប់អ្នកទិញ ចូលទៅទិញ។
អាជីវករភាគច្រើនពីក្នុងចំណោមនោះ ក៏បានសំណូមពរដល់ថ្នាក់ដឹកនាំផ្សារដែរ ថាត្រូវតែធ្វើការយោគយល់ ហើយមិនត្រូវតម្លើងថ្លៃតូបនោះឡើយ ដោយហេតុថា ក្នុងពេលបច្ចុប្បន្ន មានតូបមួយចំនួនធំ កំពុងរងនូវការបិទទ្វា។ ជាពិសេសទៅទៀត នៅក្នុងទីផ្សារមួយ គេចាំបាច់ត្រូវរៀបចំ ធ្វើអនាម័យឲ្យបានស្អាត និងរហ័ស ឲ្យដូចពេលដែលថ្នាក់ដឹកនាំទាំងនោះ មក«យកលុយ»នោះផង។
សម្រាប់លោក លោក ឯក ឃុនដឿន អភិបាលខណ្ឌទួលគោក មិនបានខ្វល់ទៅលើក្រុមការងាររបស់លោក ដែលបានដើរយកលុយ ឬកំណត់ថ្លៃលើទីតាំងណាមួយ ដែលតម្រូវឲ្យអាជីវករបង់នោះឡើយ។ តែផ្ទុយមកវិញ លោកបានរិះគន់លើក្រុមអាជីវករទាំងអស់ថា បានចូលរួមលាក់លៀម ជាមួយក្រុមយកភាស៊ីទាំងនោះ តាមរយៈការសរសេរក្នុងសៀវភៅ ថា«ត្រឹមត្រូវតាមសៀវភៅបន្ទុក»។
លោកបានវាយតម្លៃថា ទាំងនេះជាមូលហេតមួយ ដែលបានបិទបាំងនូវកំហុសអ្នកវិនិយោគ និងក៏មិនអាចឲ្យលោក ស្វែងរកចាប់កំហុសគេ បាននោះដែរ។ លោកនិយាយទៀតថា៖ «ខ្ញុំប្រាប់ត្រង់ថា ខ្ញុំមិនដែលបានទទួលលុយមួយរៀលខ្មែរ ពីក្រុមប្រមូលភាស៊ីទាំងនោះទេ។ ខ្ញុំមិនទទួលដាច់ខាត សុំតែឲ្យមានការធ្វើតាមសៀវភៅបន្ទុកបានហើយ។»
ចំពោះការទិញលក់ នៅលើទ្រូងផ្លូវ ដែលត្រូវបានធ្វើកន្លងមក មិនត្រូវបានលោក ឯក ឃុនដឿន ទទួលស្គាល់នោះទេ។ លោកពន្យល់ថា បើអាជីវករលក់ទិញផ្លូវពីអ្នកណា ត្រូវស្វែរកអ្នកនោះមកដោះស្រាយ។ លោកមិនអាចធ្វើការដោះស្រាយបានទេ ព្រោះលោកមិនមែនជាអ្នកលក់ឡើយ។ លោកបានបន្តថា ផ្សារដើមគរ ជាផ្សារមួយត្រូវបានដាក់បញ្ចូល ជាផ្សារគំរូសម្រាប់ខណ្ឌទួលគោក ទាក់ទង់នឹងអនាម័យ ហេដ្ឋារចនាសម្ព័ន្ធ ការគ្រប់គ្រង ការធ្វើចរាចរលើបណ្តោយផ្លូវមួយចំនួន ជុំវិញផ្សារជាដើម។
សេចក្តីជូនដំណឹងមួយ ចុះថ្ងៃទី១៥ ខែសីហា ឆ្នាំ២០១៤ថ្មីៗនេះ របស់អភិបាលខណ្ឌទួលគោកស្តីទី លោក ប៉ាង លីដា ធ្វើទៅកាន់ថ្នាក់គ្រប់គ្រង និងអាជីវករផ្សារដើមគរទាំងអស់ បានប្រកាសបដិសេធ មិនទទួលស្គាល់លោក ចាន់ សុខុម ហៅឡេង ដែលជាអ្នកប្រមូលលុយសណ្តាប់ធ្នាប់ជុំវិញផ្សារដើមគរ ចាប់ពីថ្ងៃចុះហត្ថលេខាតទៅ។
ឯលោក កើត ស៊ីវិនី ដែលជាប្រធានផ្សារដើមគរនោះ មិនបានផ្តល់កិច្ចសម្ភាសណាមួយ ទៅឲ្យអ្នកសារព័ត៌មានទេ៕