កន្លងមក ព្រះសង្ឃ សឺន ហាយ ត្រូវ​បាន​គេ​ស្គាល់​ថា ជា​ព្រះ​សង្ឃ​មួយ​អង្គ ដែល​តែង​តែ​ចូល​រួម​ធ្វើ​បាតុកម្ម​តវ៉ា ជា​មួយ​ប្រជា​ពលរដ្ឋ​ជំលោះ​ដី​ធ្លី ដឹកនាំ​ធ្វើ​បាតុកម្ម​នៅ​មុខ​ស្ថានទូត​វៀតណាម ជួយ​ផ្តល់​ជា​កន្លែង​ស្នាក់​នៅ ដល់​ប្រជា​ពលរដ្ឋ​ដែល​មក​ធ្វើ​បាតុកម្ម ឫ​ដាក់​ញត្តិ​នៅ​រាជធានី​ភ្នំពេញ​ជា​ដើម។

ពាក់ព័ន្ធ​នឹង​ការ​វាយ​តប់​គ្នា នៅ​វត្ត​ស្ទឹង​មាន​ជ័យ ដែល​បណ្តាល​ឲ្យ​ព្រះ​សង្ឃ សឺន ហាយ និង​ព្រះ​សង្ឃ​ពីរ​អង្គ​ទៀត​រង​របួស​ធ្ងន់ គឺ​ដោយ​សារ​តែ​មាន​គំនុំ​គុំគួន​គ្នា ពី​ក្នុង​រយៈ​កាល​កន្លង​មក។

តាមការបញ្ជាក់របស់លោក សួន សង្វាត អគ្គលេខាចលនាកូនខ្មែរ បានប្រាប់ទស្សនាវដ្តីមនោរម្យ.អាំងហ្វូថា កន្លង​មកព្រះសង្ឃ សឺន ហាយ បានផ្តល់កន្លែងស្នាក់នៅ ក្នុងវត្តស្ទឹងមានជ័យ ឲ្យប្រជាពលរដ្ឋជំលោះដីធ្លី​មក​ពី​ខេត្តបន្ទាយមានជ័យ ប៉ុន្តែត្រូវព្រះចៅអធិការវត្តមិនឲ្យស្នាក់នៅ។ តែព្រះសង្ឃ សឺន ហាយ នៅតែបន្តក្រុម​ប្រជា​ពលរដ្ឋស្នាក់នៅដដែល ដោយសំអាងថា វត្តអារាមមិនមែនជារបស់អ្នកណាទេ គួតែជួយគ្នាក្នុងគ្រាអាសន្ន។

ក្រោយមកទៀតព្រះសង្ឃចៅអធិការ នៅតែមិនព្រមឲ្យប្រជាពលរដ្ឋស្នាក់នៅក្នុងវត្តនេះដដែល ហើយ​ថែមទាំង​ចេញសំបុត្រ​ដេញព្រះសង្ឃអង្គនេះចេញពីវត្ត ប៉ុន្តែព្រះសង្ឃ សឺនហាយ មិនបានចេញពីវត្តស្ទឹងមានជ័យទេ។

លុះដល់ថ្ងៃទី ២៣តុលាម្សិលម៉ិញនេះ កូនសិស្សរបស់ព្រះសង្ឃ សឺន ហាយ បានទិញម៉ូតូថ្មីហើយព្រះសង្ឃ សឺន ហាយ បានជិះម៉ូតូថ្មីរបស់កូនសិស្សនៅក្នុងបរិវេណក្នុងវត្ត។ ពេលកំពុងជិះម៉ូតូក្នុងវត្តនោះ ស្រាប់តែមាន​ជន​ស្រវឹង​ម្នាក់ស្រែកដាក់ព្រះសង្ឃ សឺន ហាយ ថាជាចោររួចបង្ករជាជំលោះ និងវាយព្រះសង្ឃយ៉ាងចាស់​ដៃតែ​ម្តង។ ជនស្រវឹងរូបនេះ ត្រូវបានគេស្គាល់ថា ជាប្អូនប្រុសបង្កើត របស់ព្រះចៅអធិការវត្តស្ទឹងមានជ័យ។ នេះបើ​តាម​ការបញ្ជាក់របស់លោក សួន សង្វាត។

គួបញ្ជាក់ថា ព្រះសង្ឃទាំងបីអង្គ ដែលរងរបួសនោះ ត្រូបានគេបញ្ជូនទៅព្យាបាលនៅអង្គការលីការដូ។ ហើយ​បញ្ហានេះ នៅមិនទានដោះស្រាយដាច់ស្រេចនៅឡើយទេ ពីព្រោះថាព្រះចៅអធិការវត្ត បានចោទប្រកាន់​ព្រះសង្ឃ​ទាំងបីអង្គ ថាជាអ្នកវាយប្អូនខ្លួនទៅវិញ៕