ចំរើន សុភ័ក្រ្ត ធ្វើឱ្យគ្រូបង្វឹក និងទស្សនិកជន និយាយលែងចេញ
- ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី២០ តុលា ២០១៤
- កែប្រែចុងក្រោយ: October 22, 2014
- ប្រធានបទ: The Voice
- អត្ថបទ: មានបញ្ហា?
- មតិ-យោបល់
-
«បើយើងក្លាយជាអ្នកដទៃ» ដែលជាសំនៀងដើម របស់តារាចម្រៀងកញ្ញា ឱក សុគន្ធកញ្ញា ត្រូវបានបេក្ខនារីកូនក្រុមរបស់គ្រូបង្វឹក ណុប បាយ៉ារិទ្ធ លើកយកមកបកស្រាយ។ ថ្វីត្បិតតែបទចម្រៀងនេះ ពិបាកច្រៀង និងត្រូវការដាក់មនោសញ្ចេតនាខ្ពស់ ប៉ុន្តែកញ្ញា ចម្រើន សុភ័ក្រ មិនត្រឹមតែច្រៀងបានយ៉ាងល្អទេ តែនាងថែមទាំងបានដាក់អារម្មណ៍ធ្វើឱ្យមហាជន ក៏ដូចជាគ្រូបង្វឹកទាំងបួន កាលពីយប់ថ្ងៃអាទិត្យទី១៩ ខែតុលាម្សិលម៉ិញនេះ មានអារម្មណ៍រំភើប ស្ទើរស្រក់ទឹកភ្នែកគ្រប់ៗគ្នា។
កញ្ញា ចំរើន សុភ័ក្រ គឺបេក្ខជនមកពីរាជធានីភ្នំពេញ នាងមានវ័យ២៣ឆ្នាំ សព្វថ្ងៃនេះ នាងជានិស្សិតផ្នែកដូរតន្រ្តី នៃសាកលវិទ្យាល័យភូមិន្ទវិចិត្រសិល្បៈ។ នាងក៏ជាសិល្បៈការិនី ផ្នែកខាងរបាំមួយរូបផងដែរ។ មិនត្រឹមតែមានរូបសម្ផស្សស្រស់ស្អាត នាងក៏មានសម្លេងដ៏ពិរោះ តាំងពីកំណើតដែរ។ ដោយសារតែសម្លេងដ៏ស្រទន់ និងមានទឹកដមរបស់សុភ័ក្រ បានធ្វើឱ្យទស្សនិកជនជាច្រើន បានស្លុតអារម្មណ៍ ស្ទើរនិយាយលែងចេញ។
កញ្ញា ឱក សុគន្ធកញ្ញា ដែលជាម្ចាស់បទចម្រៀងមួយនេះ បានលើកសរសើរថា កញ្ញា ចំរើន សុភ័ក្រ្ត បានធ្វើឱ្យកញ្ញាខ្លួនឯង ដែលជាម្ចាស់បទ ស្លុងអារម្មណ៍ទៅតាមការបកស្រាយ ស្ទើរទប់មិនបាន។
រីឯលោក ណុប បាយ៉ារិទ្ធ ដែលជាគ្រូបង្វឹក របស់បេក្ខនារីមកពីរាជធានីភ្នំពេញរូបនេះវិញ បាននិយាយយ៉ាងដូច្នេះដែរថា តាំងពីវគ្គ Blind រហូតវគ្គ Battle ហើយពេលនេះវគ្គ Live Show កញ្ញានៅតែធ្វើបានល្អជានិច្ច ដែលធ្វើឱ្យលោកជាគ្រូបង្វឹក មានមោទនភាពយ៉ាងខ្លាំង ជាមួយនឹងសម្លេងដ៏ក្រអួនក្រអៅរបស់នាង។ លោកបន្តថា៖ «សុភ័ក្រតែងតែធ្វើឱ្យខ្ញុំមានសេចក្តីសង្ឃឹម និងសប្បាយចិត្តជាមួយគាត់»។
ចំណែក បន្ទាប់ពីបានស្តាប់ឮ នូវសំនៀងដ៏ស្រទន់ របស់បេក្ខនារីដែលវិវត្តខ្លួនពីនាដការី មកជាតារាចម្រៀងសម័យនោះ ទស្សនិកជនម្នាក់បានលាន់ថា៖ «Woww...She has a beautiful voice!!»។ អ្នកប្រើប្រាស់បណ្ដាញសង្កម ដែលមានឈ្មោះថា Bunthan Ly Khmer សរសេរបញ្ចេញយោបល់បន្ថែមថា សម្លេងកញ្ញា ចំរើន សុភ័ក្រ្ត ធ្ងន់ល្អ ហើយអាចប្រើសម្លេងស្រែកអស់ហើយ មិនភ្លាត់ទៀតផង។
ទស្សនិកជនមួយរូបទៀត បញ្ចេញវាចារកោតសរសើដែរថា៖ «ខ្ញុំសូមសរសើរបងស្រី បងច្រៀងពិរោះ ជាងតារាចម្រៀងមួយចំនួនទៀត។ សំលេងរបស់បងមានទឹកដមមិនថា បទចម្រៀងប្រពៃណី បទសម័យ បទបែបណា ក៏បងអាចធ្វើទៅបានយ៉ាងល្អឥតខ្ចោះ។ ពិបាកនឹងរកសម្លេងដូចបងខ្លាំងណាស់។»
បើទោះបីជានាង មិនត្រូវបានទស្សនិកជន បោះឆ្នោតឱ្យក៏ដោយ ប៉ុន្តែនាងត្រូវបានលោក ណុប បាយ៉ារិទ្ធ ដែលជាគ្រូបង្វឹករបស់នាង ជ្រើសរើសឱ្យទៅកាន់វគ្គបន្តទៀត៕
ចង់ដឹងថា សម្លេងដ៏ផ្អែមស្រទន់របស់បេក្ខនារីរូបនេះ ពិរោះយ៉ាងណានោះ សូមទស្សនាទាំងអស់គ្នា៖