សិទ្ធិលំនៅដ្ឋានសមរម្យ អ្នកមាន និង​អ្នកក្រ អាច​រស់​នៅ​ទី​ប្រជុំជន ជនបទ​បាន​ដូច​គ្នា មិន​មែន​ថា​ទីក្រុង​សំរាប់​អ្នក​មាន ឯ​អ្នក​ក្រ​ត្រូវ​តែ​ចេញ​ពី​ទីក្រុង ហើយ​រដ្ឋ​ត្រូវ​មាន​កាតព្វកិច្ច​ក្នុង​ការ​រៀបចំ ជួយ​រៀបចំ​ប្រជា​ពលរដ្ឋ​រស់​នៅ ឲ្យ​មាន​របៀប​រៀបរយ ដោយ​មិនមែន​យក​ការ​បណ្តេញ​ចេញ ដើម្បី​សោភ័ណភាព​ទីក្រុង ឫ​ក៍​បរិស្ថាន អនាម័យ​ទីក្រុង​នោះ​ឡើយ។ នេះ​ជា​ការ​លើក​ឡើង របស់​លោក អំ សំអាត ប្រធាន​ផ្នែក​បច្ចេកទេស​ស៊ើប​អង្កេត​របស់​អង្គការ​លីកាដូ ដែល​បាន​ថ្លែង​ទៅ​កាន់​អ្នក​សារព័ត៌មាន ក្នុង​ឱកាស​នៃ​ការ​ប្រារព្ធ ទិវា​សិទ្ធិ​លំនៅដ្ឋាន​ពិភពលោក លើក​ទី២៩ ថ្ងៃ​ទី៦ ខែ​តុលា ឆ្នាំ​២០១៤​នេះ។

ការថ្លែងរបស់មន្ត្រីលេចធ្លោ ខាងការឃ្លាំមើលសិទ្ធិមនុស្ស ក្នុងប្រទេសកម្ពុជារូបនេះ បានធ្វើឡើងស្រប​ទៅ​នឹង​ប្រធានបទ«សំឡេងអ្នកក្រក្នុងទីក្រុង» នៃការប្រារព្ធទិវាសិទ្ធិលំនៅដ្ឋាន ឆ្នាំនេះ ដែលផ្ដោត​សំខាន់ទៅ​លើ​​សម្រេកឃ្លាននៃសិទ្ធិរស់នៅ មានជម្រក​សមរម្យ និង​ថ្លៃថ្នូរ នៃពលរដ្ឋរងគ្រោះនឹងការបណ្ដេញចេញ ដែល​​ភាគច្រើនសុទ្ធសឹងជាជនក្រីក្រ។ នាព្រឹកថ្ងៃទី ០៦ ខែតុលានេះដែរ ក៏មានការដើរដង្ហែក្បួនដាក់ញត្តិ​នៅ​រដ្ឋសភា និងខុទ្ទកាល័យរបស់លោកនាយករដ្ឋមន្ត្រី ហ៊ុន សែន ផងដែ។

នៅក្នុងញត្តិនោះ មានសរសេរបញ្ជាក់ថា ប្រជាពលរដ្ឋរស់នៅ ក្នុងរាជធានីភ្នំពេញច្រើនជាង ១០ភាគរយ ត្រូវ​បានជម្លៀសចេញ ពីលំនៅដ្ឋានរបស់ខ្លួន ក្នុងរយៈពេលពីទស្សវត្សរ៍ចុងក្រោយនេះ។ ប្រជាពលរដ្ឋទាំងនោះ សុទ្ធតែប្រជាពលរដ្ឋដែលក្រីក្រ រស់នៅក្នុងតំបន់ក្រីក្រ។ ពួកគេត្រូវបានជម្លៀសចេញ ពីលំនៅដ្ឋានរបស់ខ្លួន ក្រោមហេតុផល ការអភិវឌ្ឍន៍សម្រាប់ប្រយោជន៍សាធារណៈ កែលម្អសោភ័ណ្ដភាពទីក្រុង និងការរៀបចំ​សណ្តាប់ធ្នាប់ សន្តិសុខ និងសុវត្ថិភាព សង្គម។

ទាក់ទងនឹងករណីនេះ លោក អំ សំអាត បានបកស្រាយថា៖ «ការបណ្តេញចេញ កំពុងតែកើតមាន។ ការ​បណ្តេញចេញ និងការរំលោភដីធ្លី ក៍កំពុងកើតមានជាបន្តបន្ទាប់ដែរ អ៊ីចឹងហើយ ប្រជាពលរដ្ឋដែល​លោក​មក​ប្រារពពិធីនេះ គឺចង់សម្តែងមតិទី ១ សុំឲ្យបញ្ឈប់ជាបន្ទាន់ នូវការបណ្តេញចេញ។ ទី ២ ប្រសិនបើ​ចាំ​បាច់​នៅក្នុងការអភិវឌ្ឍន៍ ត្រូវតែមានការដោះស្រាយសំណងសមរម្យ និងយុត្តិធម៍ ដែលប្រជាពលរដ្ឋ​អាចទទួល​យក​បាន មិនមែនជាការចាប់បង្ខំនោះទេ។ ហើយទី៣ រដ្ឋត្រូវតែធានាថាប្រជាពលរដ្ឋពិតជាទទួលបាន មាន​លំនៅដ្ឋានសមរម្យ ដោយការអភិវឌ្ឍន៍នៅនឹងកន្លែង ដោយមិនយកជម្រើស នូវការបណ្តេញប្រជា​ពលរដ្ឋ​ចេញ ដើម្បីប្រគល់ដីទៅដល់ក្រុមហ៊ុនធ្វើការអភិវឌ្ឍន៍នោះទេ។»៕