ងប់នឹងរឿងភាគខ្លាំងពេក បែរជាមកចាក់សម្លាប់សង្សាឯង ហើយកាត់នាងជាដុំៗ
- ដោយ: សេក មនោរកុមារ ដោយ សេក មនោរកុមារ (ទាក់ទង៖ [email protected]) - ប៉ារីស ថ្ងៃទី០៣ តុលា ២០១៤
- កែប្រែចុងក្រោយ: October 05, 2014
- ប្រធានបទ: ឃាតកម្មរន្ធត់
- អត្ថបទ: មានបញ្ហា?
- មតិ-យោបល់
-
នៅថ្ងៃទី២៤ ខែមករា ឆ្នាំ២០១៣ កញ្ញា អលីហ្សាបេត ថូម៉ាស (Elizabeth Thomas) យុវតីអាយុ១៧ឆ្នាំ កំពុងគេងសម្រាកក្នុងបន្ទប់ ដែលជាលំនៅដ្ឋានឪពុកម្ដាយរបស់នាង ក្នុងក្រុង អូសតេដ (Oxted - ភាគកណ្ដាលនៃចក្រភពអង់គ្លេស)។ រំពេចនោះ ស្ទេវេន ម៉ៃ (Steven Miles) កាលនោះអាយុ១៦ឆ្នាំ សង្សារបស់យុវតីតាំងពី៤ខែមកហើយ បានហក់ចូលមកក្នុងបន្ទប់របស់នាង ហើយបានបង្កហេតុការណ៍ដ៏រន្ធត់មួយឡើង។
យុវជនដែលមានកាន់កាំបិតនៅនឹងដៃ បានចាក់ អេលីហ្សបេត ថូម៉ាស ចំក្បាល និងពីក្រោយខ្នង តែមិនទាន់ស្លាប់ភ្លាមទេ។ ឃើញយុវតីជាសង្សាវ័យក្មេង ដួលដេកទៅនៅនឹងដីប៉ុណ្ណេះហើយ ស្ទេវេន ម៉ៃ បានបន្ថែមទម្ងន់ទៅលើទង្វើដ៏ឃោឃៅរបស់ខ្លួន ឲ្យកាន់តែធ្ងន់ធ្ងរទៀត។
ជាមួយនឹងរណា និងសម្ភារៈផ្សេងទៀត ដែលសុទ្ធជារបស់ឪពុករបស់ខ្លួន យុវជនបានកាត់ខ្លួនប្រាណនាង អេលីហ្សាបេត ជាកង់ៗ ក្នុងនោះមានដៃ និងជើង ត្រូវបានយុវជនខ្ចប់ដាក់ក្នុងថង់ផ្លាស្ទិក ហើយយកទៅបោះចោលក្នុងធុងសម្រាម។ ខ្លួនប្រាណនៅសល់ ត្រូវបានយកទៅបោះចោលនៅខាងក្រៅផ្ទះ ដែលដាក់គ្របពីលើដោយក្រណាត់តង់ ពណ៌បៃតង។
នេះមិនមែនជារឿងមួយខុសធម្មតាទេ សម្រាប់យុវជន ស្ទេវេន ម៉ៃ ដែលជាអ្នកងប់ទស្សនា រឿងភាគអាមេរិក Dexter ដែលល្បីជារឿងដ៏សាហាវមួយ មានតួអង្គជាឃាតករ និងបានកាត់ជនរងគ្រោះជាដុំៗ នៅក្រុងមីអាមី (Miami)។ គ្រាន់តែនៅថ្ងៃកើតហេតុ យុវជន ស្ទេវេន ម៉ៃ បានដើរតួរសមសួនបានទាំងស្រុង នៅឈុតឆាកដ៏ពិតៗមួយ ដែលយុវជនរូបនេះ បានស្រម័យយកតាមភាពយន្ដភាគ។
នៅក្នុងសវនាការដែលទើបនឹងបញ្ចប់ កាលពីថ្ងៃសុក្រ ទី៣ ខែតុលា ឆ្នាំ២០១៤ កន្លងទៅនេះ គេបានដឹងថា យុវជនដែលជានិស្សិត ខាងវិទ្យាសាស្ត្រនយោបាយរូបនេះ ជាមនុស្សមានបញ្ហាខាងរវើរវាយ តាមបែបក្មេងជំទង់ផ្ដេសផ្ដាស និងមានចរិកមានៈ។ ដើម្បីដោះសារពីទោសកំហុសរបស់ខ្លួន យុវជនបាននិយាយថា មានជនស្រមោលម្នាក់ទៀតឈ្មោះ អេដ (Ed) បានបញ្ជាឲ្យខ្លួន ត្រូវ«សម្លាប់នរណាម្នាក់»។
នៅថ្ងៃកើតហេតុ មួយម៉ោងក្រោយមក បងស្រីរបស់អេលីហ្សាបេត បានត្រឡប់មកផ្ទះវិញ ស្ទេវេន បានសារភាពភ្លាមថា៖ «អេដ បានបង្ខំឲ្យខ្ញុំធ្វើរឿងអាក្រក់ហើយ»។ តាមពិតទៅ គេគួរតែដឹងទង្វើនេះជាមុន តាំងពីយូរមកហើយ ព្រោះមានសារជាច្រើនណាស់ ដែល ស្ទេវេន ម៉ៃ បានផ្ញើរមក អេលីហ្សាបេត ហើយមានន័យសឹងតែដូចៗគ្នាថា៖ «ខ្ញុំនឹងសម្លាប់នរណាម្នាក់ ក្នុងពេលឆាប់ៗខាងមុខនេះ ហើយអ្នកឯងនឹងឃើញថា មិនមានភាពខុសគ្នាប៉ុន្មានទេ រវាង Dexter និងខ្ញុំ»៕
ខាងក្រោមនេះ ជាឈុតឆាកផ្សាយពាណិជ្ជកម្មរបស់ភាពយន្ដភាគនេះ៖