ពេជ្រ សោភា មិនខ្វល់នឹងការរិះគន់ ថាចម្លង«Style»តាមតារាផ្សេង
- ដោយ: ប្រាថ្នា ដោយ ប្រាថ្នា (ទំនាក់ទំនង៖ [email protected] ) - ភ្នំពេញ ថ្ងៃទី០២ តុលា ២០១៤
- កែប្រែចុងក្រោយ: October 04, 2014
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
តារាចម្រៀង ពេជ្រ សោភា របស់ផលិតកម្មហង្សមាស បានស្លៀកសំលៀកបំពាក់មួយឈុត ដូចគ្នាទៅនឹងតារាចម្រៀងកូរ៉េ នាង ស៊ីអ៊ិល (CL) ក្នុងក្រុម 2NE1។ រូបថតរបស់ ពេជ្រ សោភា និងនាង CL ត្រូវបានអ្នកប្រើប្រាស់បណ្ដាញសង្គម ហ្វេសប៊ុក កាត់មកដាក់ទន្ទឹមគ្នា ហើយចែកចាយគ្នា ដោយនាំគ្នាដាក់ពិន្ទុថាតើមួយណាស្អាតជាង?
ចំពោះការយកស្តាយ (Style) ស្លៀកពាក់ តាមតារាកូរ៉េដ៏ល្បីឈ្មោះនោះ ពេជ្រ សោភា ក៏ត្រូវទទួលរងការរិះគន់ ពីទស្សនិកជនមកវិញផងដែរ។ កន្លងមក មិនមែនតែតារាចម្រៀង របស់ផលិតកម្មហង្សមាសតែម្នាក់នេះទេ ដែលតែងតែចម្លងស្តាយស្លៀកពាក់ ឬម៉ូតសក់តាមតារាបរទេស តែតារាខ្មែរមួយចំនួនទៀត ក៏ធ្លាប់រងការរិះគន់យ៉ាងចាស់ដៃ ពីសំណាក់ទស្សនិកជន និងប្រិយមិត្តអ្នកស្រឡាញ់សិល្បៈផងដែរ។
ស្រង់សម្តី ដោយគេហទំព័រក្នុងស្រុកមួយ កញ្ញាពេជ្រ សោភា បាននិយាយយ៉ាងដូច្នេះថា ត្រឹមស្លៀកសម្លៀកបំពាក់ ចំឡងពីគេ ក៏កញ្ញាមានក្ដីសុខណាស់ទៅហើយ ព្រោះនាងធ្វើបានត្រឹមប៉ុណ្ណឹង ម្យ៉ាងចំណូលមានកម្រិត មិនអាចទិញសម្លៀកបំពាក់ថ្លៃ Original បាន។ យ៉ាងណាក៏ដោយ អ្វីដែលសំខាន់នោះ ពេជ្រ សោភា ជាអ្នកស្លៀកសម្លៀកបំពាក់ និងធ្វើឲ្យនាងមានក្ដីសុខ មិនមែនអ្នករិះគន់នាង មានក្ដីសុខទេ។
គ្រូបង្វឹករបស់កម្មវិធីប្រលងចម្រៀងដ៏ល្បីរូបនេះ បន្តថា«មនុស្សម្នាក់ៗ មិនអាចមានតារា ក្នុងចិត្តទេឬ ? តើអ្នកធ្លាប់ស្រមៃ ចង់ស្លៀកពាក់អ្វីតាមតារា ក្នុងចិត្តរបស់អ្នកឬទេ ? ខ្ញុំក៏ដូចគ្នា ខ្ញុំស្រមៃចង់ស្លៀកពាក់ តាមតារាក្នុងចិត្តរបស់ខ្ញុំ ពិសេសខ្ញុំស្រឡាញ់ការច្នៃម៉ូដ ដែលប្លែកៗ ព្រោះសម្លៀកបំពាក់ស្អាត ធ្វើឲ្យយើងកាន់តែ ស្រស់ស្អាត។»
កញ្ញា ពេជ្រ សោភា ប្រហែលមិនយល់ អ្វីទៅជាតារា និងអ្វីទៅដែលហៅថា អ្នកគាំទ្រតារានោះទេ។ នេះបើតាមការលើកឡើង របស់គ្រូបង្រៀនសិល្បៈខ្មែរមួយរូប នៅទីក្រុងប៉ារីស ប្រទេសបារាំង តបនឹងការលើកឡើងរបស់កញ្ញាខាងលើ។ គ្រូសិល្បៈរូបនោះ បាននិយាយថា៖ «នៅលើឆាក នាង ពេជ្រ សោភា ជាតារា និងត្រូវតាំងខ្លួនជាតារា មិនមែនមកធ្វើខ្លួនជាអ្នកគាំទ្រតារាផ្សេង ហើយឡើងមក"កាច់រាង"នៅលើឆាក ក្រោមក្រសែភ្នែករាប់សិបរបស់អ្នកគាំទ្ររបស់នាងនោះទេ។»៕