កុមារគ្មានមុខមួយរូប នឹងត្រូវឆ្លងកាត់ការវះកាត់ នៅអូស្ត្រាលី
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី០២ តុលារ ២០១៤
- កែប្រែចុងក្រោយ: October 03, 2014
- ប្រធានបទ: ធម្មជាតិចម្លែក
- អត្ថបទ: មានបញ្ហា?
- មតិ-យោបល់
-
ជីវិតរបស់កុមារជាតិម៉ារុកដ៏កំសត់ អាចនឹងមានការប្រែប្រួល នៅពេលដែលកុមារនេះ នឹងត្រូវបញ្ជូនទៅធ្វើការវះកាត់ នៅអំឡុងខែធ្នូខាងមុខ នៅក្នុងមន្ទីរពេទ្យជំនាញមួយ នៃទីក្រុងមែលប៊ន ប្រទេសអូស្ត្រាលី។ ដំបូងឡើយ គឺមិត្តភ័ក្រមួយរូបរបស់ឪពុកកុមារទេ ដែលបានសុំជំនួយ នៅតាមបណ្ដាញសង្គម ដោយបានចុះផ្សាយរូបថតមួយសន្លឹក របស់កុមារ នៅលើទំព័រហ្វេសប៊ុក ហើយបានរកឃើញចម្លើយ ស្របតាមការដង្ហោយហៅមែន។
នោះគឺស្ត្រីជាតិអូស្ត្រាលីមួយរូប អ្នកស្រី ហ្វាទីម៉ា បារ៉ាកា (Fatima Baraka) ដែលមានដើមកំណើតពីប្រទេសម៉ារុក បានស្រយ៉ុងចិត្តជាមួយនឹងការផ្សព្វផ្សាយនេះ និងជាពិសេស អ្នកស្រីធ្លាប់បានធំដឹងក្ដីនៅក្នុងភូមិមួយ ដែលស្ថិតនៅមិនឆ្ងាយ ពីភូមិរបស់កុមាររស់នៅ។
អ្នកស្រីចិត្តធម៌បានធ្វើដំណើរ មកប្រទេសម៉ារ៉ុក ដើម្បីមើលកុមារដោយផ្ទាល់ភ្នែក ហើយបានទាក់ទង ជាមួយលោកវេជ្ជបណ្ឌិត តូនី ហូលមេស៍ (Tony Holmes) ជំនាញខាងការវះកាត់បែបនេះ និងធ្លាប់ល្បីឈ្មោះថាបាន វះកាត់បំបែកដោយជោគជ័យ នូវកូនភ្លោះជាប់ខ្លួនជាតិបង់ក្លាដេសពីរនាក់ Trisha និង Krishna។
លោកវេជ្ជបណ្ឌិត បានយល់ព្រមវះកាត់ទៅលើកុមារតូច ដែលចាំបាច់ត្រូវឆ្លងកាត់ច្រើនដំណាក់កាល ហើយអាចធ្វើឲ្យកុមារស្លាប់បាន។ ក្នុងបទយកការណ៍មួយ របស់ទូរទស្សន៍អូស្ត្រាលី Channel Seven លោក ហូលមេស៍ បានថ្លែងថា៖ «កុមារនេះ នឹងច្បាស់ជាមិនស្លាប់ទេ បើគេមិនធ្វើការវះកាត់។ តែកុមារអាចនឹងស្លាប់ បើគេធ្វើការវះកាត់។» យ៉ាងណាក៏ដោយ ក៏លោកវេជ្ជបណ្ឌិត បានច្បាស់ក្នុងចិត្តថា លោកនឹងអាចផ្ដល់ជីវិតថ្មី ដល់កុមារនេះបាន។ លោកនិយាយថា៖ «វាជាសិទ្ធិរបស់រាល់គ្នា ដែលត្រូវមានរូបរាងមុខមាត់ ជាមនុស្ស តែកុមារម្នាក់នេះ មិនមានលក្ខណៈសម្បត្តិ៍ជាមនុស្សទេ»៕