តើអាពាហ៍ពិពាហ៍របស់តារាហូលីវូដ ហ្សក ឃ្លូនី នៅក្រុង វើនីស អស់តម្លែប៉ុន្មាន?
- ដោយ: ឈូករ័ត្ន ដោយ ឈូករ័ត្ន (ទាក់ទង៖ [email protected]) - ប៉ារីស ថ្ងៃទី០១ តុលារ ២០១៤
- កែប្រែចុងក្រោយ: October 01, 2014
- ប្រធានបទ: តារាល្បី
- អត្ថបទ: មានបញ្ហា?
- មតិ-យោបល់
-
នៅក្នុងស្បោងអំណោយ ដែលសាមីដើមការ បានផ្ដល់ទៅឲ្យភ្ញៀវចូលរួមជាកិត្តិយស មានក្រដាសមួយសន្លឹក បានសរសេរជាអាថ៌ថា៖ «យើងខ្ញុំទាំងពីរនាក់ មានសេចក្ដីត្រេកអរ សប្បាយរីករាយណាស់ នឹងវត្តមានរបស់លោកអ្នក នៅទីនេះ។ លោកអ្នកបានធ្វើដំណើរមកពីចំងាយ ហើយយើងចង់តបស្នង នូវទឹកចិត្តនេះរបស់លោកអ្នក។»
លោក ហ្សក ឃ្លូនី (George Clooney) និងនាង អាម៉ាល់ អាឡាមូឌីន (Amal Alamuddin ជាជនជាតិលីបង់) បានដឹកដៃគ្នាប្រកាសរួមរស់ជាផ្លូវការ ក្នុងអាពាហ៍ពិពាហ៍ដ៏អធិកអធមមួយ កាលពីចុងសប្ដាហ៍កន្លងទៅ នាទីក្រុងវើនីស ដែលជាទីក្រុងបណ្ដែតទឹកដ៏ល្បី របស់ប្រទេសអ៊ីតាលី។ ជាមួយនឹងការរៀបចំ សម្រាប់រយៈពេល៤ថ្ងៃ ប្រកបដោយភាពមនោរម្យ និងមានការចូលរួម ដោយក្រុមតារា វរៈជនល្បីៗ ផងនោះ សំនួរជាច្រើនបានចោទឡើង ចង់ដឹងថា តើកម្មវិធីបែបនេះ ត្រូវចំណាយអស់ទ្រព្យធនប៉ុន្មាន។
សារព័ត៌មាន New-York Daily បានធ្វើការប៉ាន់ប្រមាណថា ពិធីអាពាហ៍ពិពាហ៍នេះ ចំណាយអស់ច្រើនជាងកម្មវិធី របស់តារាល្បីផ្សេងទៀតទាំងអស់ ដោយខ្ទង់ចំណាយបានធ្លាយទៅដល់ ជាង១៣លានដុល្លារអាមេរិក (ជាង១០លានអ៊ឺរ៉ូ)។ លោកស្រី តាទីយ៉ាណា បាយរ៉ុន (Tatiana Byron) អ្នករៀបចំពិធីការបានពន្យល់ថា៖ «រឿងខ្លះ អាចត្រូវបានបន្ថែមភ្លាមៗ យ៉ាងឆាប់រហ័សជាទីបំផុត ដោយមិនបានគិតមុន»។ ហើយបើសម្រេចរួចហើយ វាតម្រូវឲ្យមានការចាយប្រាក់យ៉ាងសម្បើមតាមនោះដែរ។ បើអញ្ចឹងតើមានអ្វីខ្លះទៅ?
ភ្ញៀវដែលធ្វើដំណើរពីសហរដ្ឋអាមេរិក និងពីប្រទេសលីបង់ ត្រូវបានសាមីខ្លួនជូនសំបុត្រយន្ដហោះ ដែលមានតម្លៃសរុប ប្រមាណជា៣សែន៥ម៉ឺនដុល្លារ (៣សែនអ៊ឺរ៉ូ)។ ហើយនៅពេលមកដល់ក្រុងវើនីស ភ្ញៀវទាំងនោះ ត្រូវបានទទួលឲ្យស្នាក់នៅក្នុងសណ្ឋាគារផ្កាយប្រាំ ដែលគេត្រូវបន្ថែម ជិត២សែនដុល្លារទៀត ក្នុងមួយយប់ ទៅក្នុងការចំណាយ។
បន្ថែមពីលើនេះ នៅមានអាហារអាពាហ៍ពិពាហ៍ ដែលត្រូវបានរៀបចំឲ្យចុងភៅអ៊ីតាលីដ៏ល្បី និងត្រូវចំណាយ៧០០ដុល្លារ ក្នុងមួយនាក់ បន្ទាប់មកនៅមានភេសជ្ជៈ និងការរៀបចំផ្សេងទៀត ដែលធ្វើឲ្យការចំណាយឈានទៅដល់ ប្រមាណជា ៣ម៉ឺនដុល្លារ។ ក្នុងរយៈពេលនៃការស្នាក់នៅ គូរស្វាមីភរិយាថ្មី បានផ្ដល់ជូនទៅឲ្យភ្ញៀវរបស់ពួកគេ នូវការដើរកំសាន្ដតាមទូកឯកជនជាច្រើន ហើយភ្ញៀវម្នាក់អាចទទួលបាន នូវអាយផូត (Ipod) ឧបករណ៍ស្ដាប់ចម្រៀងមួយគ្រឿង ជាមួយនឹងចម្រៀងជាច្រើនបទនោះទៀត។
បន្ទាប់មកទៀត លោក ហ្សក ឃ្លូនី និងនាង អាម៉ាល់ អាឡាមូឌីន បានជិះយន្ដហោះឯកជនមួយ ចេញពីក្រុងវើនីស ឆ្ពោះមកកាន់រាជធានីឡុងដ៍ ប្រទេសអង់គ្លេស កាលពីថ្ងៃចន្ទទី២៩ ខែកញ្ញា ដើមសប្ដាហ៍នេះ។ ប៉ុន្តែការចំណាយនៅចក្រភពអង់គ្លេស មិនត្រូវបានគិតចូល ក្នុងបញ្ជីចំណាយខាងលើនេះទេ៕