ប្រតិកម្មប្រឆាំងអាជ្ញាធរ ដែលធ្វើទារុណកម្ម និងចាប់ព្រះសង្ឃនៅសៀមរាបដាក់គុក
- ដោយ: ក. វិច្ចនី ដោយ ក.វិច្ចនី (ទាក់ទង៖ [email protected]) - ភ្នំពេញ ថ្ងៃទី ៣០ កញ្ញា ២០១៤
- កែប្រែចុងក្រោយ: October 01, 2014
- ប្រធានបទ: ប្រព័ន្ធយុត្តិធម៌
- អត្ថបទ: មានបញ្ហា?
- មតិ-យោបល់
-
ហេតុការណ៍ចាប់ខ្លួននេះ ត្រូវបានសារព័ត៌មានក្នុងស្រុកជាច្រើនសន្ធឹកសន្ទាប់ យកមកចុះផ្សាយ ដោយភាគច្រើនគ្រាន់តែ«បន្ទរតាម» ការចោទប្រកាន់របស់អាជ្ញាធរ ឬតាមការបកស្រាយរបស់ក្រុមមួយប៉ុណ្ណោះ។ ប៉ុន្តែសម្រាប់ការបកស្រាយ របស់ព្រះសង្ឃ ហួ សុផាត ដែលគង់នៅវត្តជាមួយព្រះសង្ឃ ពេជ្រ ដេវីត (ព្រះសង្ឃដែលត្រូវបានចាប់ឃាត់ព្រះកាយ) បានថ្លែងឲ្យដឹងនៅក្នុងសន្និសីទព័ត៌មាន ថ្ងៃទី៣០ ខែកញ្ញានោះ ថាហេតុការណ៍ពិតប្រាកដ នៅយប់ថ្ងៃទី ១៨ ខែកញ្ញា មិនពិតជាដូចការចោទប្រកាន់ឡើយ។
ព្រះសង្ឃ ហួ សុផាត មានសង្ឃដីការថា ដោយសារសាច់ញោមធម៌របស់ព្រះសង្ឃ ពេជ្រ ដេវីត ស្លាប់នៅកៀនស្វាយ ទើបព្រះសង្ឃ ពេជ្រ ដេវីត បានប្រើកូនសិស្សពីនាក់ឈ្មោះ ហួត ចាន់ត្រា និងឈ្មោះ សំអាត ឲ្យទៅទិញសំបុត្ររថយន្ដ ដើម្បីនិមន្តមករាជធានីភ្នំពេញ។ ប៉ុន្តែរហូតដល់ម៉ោង ១១:០០យប់ ទើបឃើញកូនសិស្សត្រឡប់មកវិញ។ បន្ទាប់មកព្រះសង្ឃខាងលើ បានទៅគោះទ្វាបន្ទប់កូនសិស្សនោះ ដើម្បីយកសំបុត្រ ហើយបានឃើញពួកគេទាំងពីរ កំពុងញុំាប្រហិតជាមួយមនុស្សស្រីពីរនាក់ទៀត។ សកម្មភាពរបស់កូនសិស្ស ត្រូវបានព្រះសង្ឃ ពេជ្រ ដេវីត ស្តីបន្ទោស មុននឹងព្រះអង្គនិមន្តចេញមកក្រៅវិញ។ ប៉ុន្តែគឺនៅពេលនោះហើយ ដែលហេតុការណ៍ដ៏អាក្រក់បានផ្ទុះឡើង។
ព្រះសង្ឃ ហួ សុផាត បានបន្តទៀតថា ពេលចេញមកខាងក្រៅ ព្រះអង្គ ពេជ្រ ដេវីត បានជួបនឹងក្រុមកងកម្លាំងនគរបាល ចំនួន៦នាក់ ដែលសុទ្ធតែមានមាឌធំៗ ហើយបានបើកការវាយប្រហារទៅលើ ព្រះសង្ឃអង្គនេះ ដោយមានទាំងការជាន់ក និងឆក់រហូតដល់សន្លប់។ ក្រោយមក គេឃើញមានកងកម្លាំងនគរបាល ពីខាងស្នងការក្រុង ចំនួន ២០នាក់ បានមកដល់ទៀត។ នៅចំពោះហេតុការណ៍នេះ មិនមានមន្ត្រីព្រះសង្ឃអង្គណាមកធ្វើអន្តរាគមន៍ទេ តែគេបែរជាឃើញក្រុមអាជ្ញាធរទាំងនោះ ចាប់ព្រះសង្ឃដាក់ខ្នោះ ទាំងនៅស្បង់ចីពរទៀតផង។
«តាមដានយ៉ាងល្អិតល្អន់» ហើយធ្វើការក្របួចបាន«ជនកំហូច»
សារព័ត៌មានក្នុងស្រុកជាច្រើន បានលើកយក ការចោទប្រកាន់របស់ក្រុមអាជ្ញាធរ មកផ្សាយថា ព្រះសង្ឃទាំង២អង្គនេះ ត្រូវបានប្រជាពលរដ្ឋ និង ពុទ្ធបរិស័ទចំណុះជើងវត្តបានរាយការណ៍ ជាយូរយាណាស់មកហើយ។ ទើបតែពេលនេះ សមត្ថកិច្ចបាន«តាមដានយ៉ាងល្អិតល្អន់» ហើយធ្វើការក្របួចបាន«ជនកំហូច»មានប្រុសមានស្រីទាំង៦នាក់ (សង្ឃពីរអង្គ យុវជន២នាក់ និងយុវតី២នាក់) នោះបានដោយជោគជ័យ ខណៈពេលពួកគេកំពុងតែនាំគ្នាផឹកស្រាបៀរ ក្លែម ស្រីសេ្នហ៍យ៉ាងសប្បាយរីករាយនៅក្នុងកុដិ នាយប់ថ្ងៃទី១៨ ខែកញ្ញាកន្លងទៅនេះ។
វីដេអូមួយឈុត ស្ដីពីការចាប់ខ្លួននោះ ក៏ត្រូវបានបង្ហោះផ្សាយ នៅក្នុងបណ្ដាញសង្គមដែរ ដែលទំនងជាមានបំណង ចង់បន្ថែមទំងន់ទោស ឲ្យជនសង្ស័យទាំង៦រូបនេះ កាន់តែធ្ងន់ថែមទៀត។
ប៉ុន្តែព្រះសង្ឃ និងពុទ្ធបរិស័ទភាគច្រើន បានលើកឡើងថា ដោយសារតែព្រះសង្ឃ ពេជ្រ ដេវីត មានកេរិ៍ឈ្មោះល្បី មានអ្នកគោរពស្រលាញ់ច្រើន និងធ្លាប់ចេញទៅក្រៅប្រទេស ដើម្បីរៃអង្គាសថវិការមកជួយសង្គម និងជួយក្មេងកំព្រា ទើបមានការច្រណែនពីព្រះសង្ឃដទៃ ហើយបានរៀបគំរោងធ្វើបាបព្រះសង្ឃ ពេជ្រ ដេវីត។ ព្រះសង្ឃ និងពុទ្ធបរិស័ទ ដែលប្រជុំគ្នាប្រមាណជា២០០នាក់ កាលពីថ្ងៃ ២៤ ខែកញ្ញា នៅក្នុងវត្តពោធិលង្កា ដើម្បីទាមទារឲ្យគេដោះលែងជនសង្ស័យមកវិញនោះ បានបរិហាការចោទប្រកាន់របស់ក្រុមអាជ្ញាធរ ខាងលើនោះ ថាគ្រាន់តែជាការប្រឌិតឡើងប៉ុណ្ណោះ ។
សម្រាប់អង្គការធម្មទានសង្គមវិញ នៅក្នុងសន្និសីទការសែត ថ្ងៃទី៣០ ខែកញ្ញា បានទាមទារឲ្យមានការដោះស្រាយបញ្ហានេះ ឲ្យសមស្របទៅនឹងច្បាប់សាសនា និងច្បាប់រដ្ឋ ដើម្បីជៀសវាងការរំលោភសិទ្ធិ និងការជិះជាន់ចំពោះព្រះសង្ឃ។ អង្គការនេះ បានបរិហាការធ្វើទារុណកម្ម និងការចាប់ព្រះកាយ ទៅលើព្រះសង្ឃខាងលើ ថាជាអំពើ«អយុត្តិធម៌»ជាទីបំផុត និងបានអំពាវនាវសូមឲ្យអាជ្ញាធរបញ្ឈប់ ការប្រើអំពើហឹង្សា លើស្ថាប័នព្រះពុទ្ធសាសនាបន្តទៀត និងត្រូវគោរពតួនាទីរបស់ខ្លួន៕