ភ្លាមៗ បន្ទាប់ពីកិច្ចព្រមព្រៀង អនុស្សរណៈយោគយល់គ្នា (MOU) ជាទ្វេភាគី​មួយ រវាងកម្ពុជា និងអូស្រ្តាលី ត្រូវបានចុះហត្ថលេខាដោយ លោក ស ខេង រដ្ឋមន្ត្រីក្រសួងមហាផ្ទៃកម្ពុជា ជាមួយលោក ស្កុត ម៉ូរីសុន (Scott Morrison) រដ្ឋមន្ត្រីក្រសួង​អន្តោប្រវេសន៍ និងកិច្ចការពារព្រំដែនអូស្ត្រាលីនោះមក អង្គការលើកលែង​ទោស​អន្តរជាតិ ដែលមានទីស្នាក់ការកណ្ដាល នៅទីក្រុង ហ្សឺណែវ ប្រទេសស្វីស បានសម្ដែង​ប្រតិកម្ម​ខ្លាំងៗ ដោយ​បានហៅកិច្ចព្រមព្រៀងនេះថា បានបម្រើឲ្យផលប្រយោជន៍«នយោបាយ»​រយៈពេលខ្លីមួយ​របស់ខ្លួន ជៀសជាង​កិច្ចការពារជនភៀសខ្លួន ដែលជាមនុស្សងាយរងគ្រោះជាងគេ ក្នុងពិភពលោក។

លោក រ៉ូប៊ែរ អាប៊ុត (Rupert Abbott) នាយករងរបស់អង្គការលើកលែងទោសអន្តរជាតិ ទទួលបន្ទុកតំបន់​អាស៊ីប៉ាស៊ីភិក បានបន្តបរិហាទៀតថា៖ «ប្រទេសអូស្ត្រាលី បានធ្វើឲ្យប្រទេសកម្ពុជា ឃុបឃិតជាមួយខ្លួន នៅក្នុងការរំលោភសិទ្ធិមនុស្ស ដែលធ្វើឡើងដោយប្រទេសអូស្ត្រាលី និងប្រព័ន្ធរបស់ខ្លួន ដែលមានសភាព​ខ្វះចន្លោះខ្លាំង នៅក្នុងមជ្ឈមណ្ឌលគ្រប់គ្រងជនអន្តោប្រវេសន៍ ស្ថិតនៅក្រៅទឹកដីរបស់ខ្លួន»។

កង្វះតម្លាភាព នៃល័ក្ខខ័ណ្ឌ នៅក្នុងកិច្ចព្រមព្រៀងខាងលើ បានក្លាយជាក្ដីកង្វល់មួយយ៉ាងខ្លាំងក្លា សម្រាប់​ប្រទេសទាំងសងខាង។ ក្រុមអ្នកធ្វើការស្និតនឹងជនភៀសខ្លួន មិនអាចចូលទៅជជែកពិភាក្សា ហើយក៏មិន​អាចដឹងជាផ្លូវការ នូវល័ក្ខខ័ណ្ឌសិទ្ធិមនុស្សចាំបាច់ ដែលតម្រូវឲ្យមាន ដើម្បីគ្រប់គ្រងជនភៀសខ្លួនឡើយ។ ក្រុមនេះ បូករួមទាំងអង្គការលើកលែងទោសអន្តរជាតិផង បានបន្ទោសពីសមត្ថភាព ក្នុងការទទួលយក​ជន​ភៀស​ខ្លួនទាំងនោះ របស់ប្រទេសកម្ពុជា ដែលនៅល្បីថាជាប្រទេសរំលោភសិទ្ធិមនុស្សខ្លាំងក្លា នៅឡើយ។

នៅចុងឆ្នាំ២០១៣ និងនៅដើមឆ្នាំ២០១៤ មនុស្សជាច្រើននាក់ ត្រូវបានសម្លាប់និងធ្វើឲ្យរបួស និងមួយ​ចំនួន​ទៀតបានបាត់ខ្លួននៅឡើយ ដោយការបង្ក្រាបយ៉ាងសាហាវឃោឃៅ ពីសំណាក់កងកម្លាំងអាជ្ញាធរ បញ្ជា​ដោយរដ្ឋាភិបាលក្រុងភ្នំពេញ នៅក្នុងរលកបាតុកម្មទាមទារសិទ្ធិ របស់ក្រុមអ្នកតវ៉ារាប់ពាន់នាក់។ ប្រទេស​កម្ពុជានេះដដែល កំពុងល្បីឈ្មោះ ថាជាប្រទេសដែលសម្បូរដោយបញ្ហាចម្រូងចម្រាស់ ដោះស្រាយ​មិន​ចេញ ជុំវិញការណីបណ្ដេញពលរដ្ឋរាប់សិបពាន់នាក់ ឲ្យចេញពីលំនៅដ្ឋាន ឬ​ដីធ្លីរបស់ខ្លួន ហើយពលរដ្ឋ​ក្រីក្រ​ជា​ច្រើនទៀត នៅមិនទាន់មានផ្ទះសម្បែងសមរម្យនៅឡើយ។

លោក រ៉ូប៊ែរ អាប៊ុត បានថ្លែងបន្តទៀតថា៖ «កាលពីក្នុងកិច្ចប្រជុំនៅអង្គការសហប្រជាជាតិ ស្ដីពីសិទ្ធិមនុស្ស នាខែមករាកន្លងមក រដ្ឋាភិបាលអូស្ត្រាលី បានថ្កោលទោសពីតុល្យភាពដ៏ធ្ងន់ធ្ងរ របស់ប្រទេសកម្ពុជា នៅ​ក្នុង​វិស័យសិទ្ធិមនុស្ស។ តែផ្ទុយទៅវិញ នៅថ្ងៃនេះ ប្រទេសធំមួយនេះ កំពុងត្រៀមបញ្ជូនទៅកាន់ទីនោះ (កម្ពុជា) នូវពពួកជនភៀសខ្លួន ដែលងាយរងគ្រោះទៅវិញ។»៕