យោងតាមរបាយការណ៍ ដែលចេញដោយអគ្គស្នងការដ្ឋាន នគរបាលជាតិ ក្រសួងមហាផ្ទៃ ក្នុងរយៈពេល​ប្រាំថ្ងៃនៃថ្ងៃបុណ្យភ្ជុំបិណ្ឌឆ្នាំ២០១៤ ដោយគិតពីថ្ងៃទី ២០ ដល់ថ្ងៃទី២៤ ខែកញ្ញា មានមនុស្សស្លាប់​រហូត​ដល់​៤៩នាក់ ដែលឆ្នាំ២០១៣មានអ្នកស្លាប់ត្រឹមតែ២៤នាក់។ ឯអ្នករបួសធ្ងន់ និងស្រាលវិញ មាន​រហូតដល់​៣០៥​នាក់ បើប្រៀបធៀបក្នុងឆ្នាំ២០១៣ មានត្រឹមតែ១៦៩នាក់ប៉ុណ្ណោះ។ មានន័យថាក្នុងឆ្នាំ២០១៤នេះ គ្រោះ​ថ្នាក់​ចរាចណ៍ ក្នុងរដូវបុណ្យភ្ជុំបិណ្ឌមានការកើនឡើង។

ដោយឡែកនាយរដ្ឋមន្រ្តីកម្ពុជា លោក ហ៊ុន សែន នាព្រឹកថ្ងៃទី២៥ ខែកញ្ញានេះ ក៏បានធ្វើការថ្លែង​កោត​សរសើរ ដល់កិច្ចខិតខំប្រឹងប្រែង និងយកចិត្តទុកដាក់ របស់សមត្ថកិច្ច កងកម្លាំងនគរបាល និងកម្លាំង​ប្រដាប់​អាវុធ ដែលបានរក្សាសន្តិសុខ និងសណ្តាប់ធ្នាប់បាន ល្អប្រសើរក្នុងអំឡុងពេលបុណ្យភ្ជុំបិណ្ឌនេះ។ ការថ្លែងកោតសសើរនេះ ត្រូវបានធ្វើឡើងនៅមជ្ឈមណ្ឌលពិពណ៌កោះពេជ្រ ក្នុងពេលចែកសញ្ញាបត្រដល់ និស្សិតនៃសកលវិទ្យាល័យចំរើនពហុបច្ចេកវិទ្យា។

តាមរបាយការណ៍ដដែលបានបង្ហាញទៀតថា តួលេខខាងលើនេះ​បើធៀបទៅនឹងរយៈពេលដូចគ្នា នៃរដូវ​ភ្ជុំ​ឆ្នាំ២០១៣ ឃើញថាចំនួនអ្នក«ស្លាប់»នៃគ្រោះថ្នាក់ចរាចរណ៍កើនឡើង២១នាក់ ករណី និងអ្នករបួសធ្ងន់ និង​ស្រាលកើនឡើង៧៨នាក់ករណី។ សរុបករណីនៃគ្រោះថ្នាក់នេះ កើនឡើងរហូតដល់ ៥៣ ករណី។ តាម​របាយការណ៍នេះ មូលហេតុ​បណ្តាលមកពីអ្នកបើកបរ មានគ្រឿងស្រវឹង និងបើកបរហួសល្បឿនកំណត់ ការ​មិនគោរពសិទ្ធិអាទិភាព មិនប្រកាន់ស្ដាំ បើកបរប្រជែងគ្រោះថ្នាក់ បើកបរពេលស្រវឹង ងងុយដេកជាដើម៕