ក្រុមកម្មករដែលបានធ្វើការតស៊ូទារមទារ ឲ្យតម្លើងប្រាក់ឈ្នួលអប្បបរិមា ក្នុងវិស័យកាត់ដេរសម្លៀក​បំពាក់​កម្ពុជានោះ បានទទួលនូវការគាំទ្រពីសំណាក់ភាគីបញ្ជាទិញ ជាពិសេសពីសំណាក់ យីហោ​សម្លៀក​បំពាក់​ធំៗល្បីៗ ដូចជា  Zara, H&M, Next និង New Look បន្ទាប់ពីពួកគេបានសន្យាថា នឹងដាក់ទម្ងន់ទៅលើ​ការ​បញ្ជាទិញ ដើម្បីធ្វើឲ្យមានប្រាក់ឈ្នួលសមរម្យសម្រាប់កម្មករ កម្មការិនី។

នៅក្នុងលិខិតមួយចុះថ្ងៃទី១៨ ខែកញ្ញានេះ ទៅកាន់រដ្ឋាភិបាលកម្ពុជា និងទៅកាន់សមាគមរោងចក្រ​កាត់ដេរ​កម្ពុជា (តំណាងឲ្យភាគីថៅកែរោងចក្រ) ក្រុមយីហោធំៗទាំងនោះ បាននិយាយថា បានត្រៀមខ្លួនរួចជា​ស្រេច ថា​នឹង​ហ៊ានចំណាយថ្លៃបន្ថែមទៀត ទៅលើផលិតផលបញ្ជាទិញពីកម្ពុជា។

ចម្លើយ​ឆ្លើយតបរបស់យីហោបញ្ជាទិញសម្លៀកបំពាក់ទាំងនេះ បានធ្លាក់មកដល់តែមួយថ្ងៃ បន្ទាប់ពី​យុទ្ធនាការ​មួយ ត្រូវបានធ្វើឡើងពាសពេញពិភពលោក ដើម្បីទាមទារឲ្យមានការតម្លើងប្រាក់ឈ្នួល ដ៏តិច​តួច​ស្ដួច​ស្ដើង របស់ក្រុមកម្មករកម្មការិនី ដែលមានចំនួនប្រមាណជា ៦សែននាក់ ក្នុងប្រទេសកម្ពុជា។ ក្រុម​កម្មករ និង​សហជីព​របស់ពួកគេ បានយកប្រាក់ឈ្នួល១៧៧ដុល្លារក្នុងមួយខែ មកជជែកទាមទារ ដោយ​ផ្អែក​​ការសិក្សា​ស្រាវជ្រាវមួយ ដែលបានអះអាងថា ប្រាក់ឈ្នួលនេះនឹងអាចឲ្យកម្មករ​អាចរស់នៅបាន​សមរម្យ ផ្ទុយស្រឡះ​ពី​ប្រាក់ឈ្នួលដែលពួកគេទទួលបានក្នុងពេលបច្ចុប្បន្ន ១០០ ឬ១១០ដុល្លារ។

លោក ដេវ វេស្ស (Dave Welsh) នាយកមជ្ឈមណ្ឌលអាមេរិកាំង ដើម្បីការពារសិទ្ធិពលកម្ម បានវាយតម្លៃថា ការប្រកាសរបស់ក្រុមហ៊ុនយីហោសម្លៀកបំពាក់ខាងលើ ប្រៀបបាននឹងអាវុធមួយ។ លោកនិយាយថា៖ «បើ​តាមខ្ញុំដឹង វាជាលើកពីមួយហើយ ដែលយីហោធំៗទាំងនោះ បានប្រកាសជាសាធារណៈ ថាខ្លួននឹង​បន្ថែម​តម្លៃ​ទៅក្នុងផលិតផល ដែលខ្លួនបញ្ជាទិញ»។

ប៉ុន្តែនាយកមជ្ឈមណ្ឌលរូបនេះ បានសម្ដែងការសោកស្ដាយថា នៅមានការធ្វើមិនដឹងមិនឮ ពីសំណាក់​យីហោធំៗ មួយចំនួនទៀតនៅឡើយ។ យីហោទាំងនោះ មានដូចជា Puma - Mark & Spencer និងយីហា​របស់អាមេរិកផ្សេងទៀត។ លោក ដេវ បានរំលឹកទៀតថា ក្រុមយីហោទាំងនេះ មិនត្រឹមតែបាន​ស្ងាត់បាត់​មាត់ មិនឮនិយាយក្នុងពេលនេះទេ តែនៅចុងឆ្នាំ២០១៣ និងដើមឆ្នាំ២០១៤ នៅពេលមានរលកបាតុកម្មធំៗ ទាមទារតម្លើងប្រាក់ឈ្នួលនោះ ក៏ក្រុមយីហោទាំងនេះ បានធ្វើមិនដឹងមិនឮដូចគ្នាដែរ។

សម្រាប់លោក អាត ធន់ ប្រធានសហជីព ប្រជាធិបតេយ្យកម្មករកាត់ដេរកម្ពុជា បានថ្លែងថា លោកក៏បាន​ទទួលលិខិតនោះដែរ តែបានស្នើសុំឲ្យក្រុមហ៊ុនយីហោសម្លៀកបំពាក់ទាំងនោះ បញ្ចេញសកម្មខ្លាំងជាងនេះ និងចូលមកជួបចរចា ជាមួយនឹងក្រុមកម្មករដោយផ្ទាល់។ លោកបានថ្លែងប្រាប់សារព័ត៌មាន The Guardian របស់អង់គ្លេសថា «យើងមានបទពិសោធន៍ហើយថា សបុត្រតែមួយសន្លឹក នឹងមិនមានទម្ងន់ខ្លាំងនោះទេ។ ម៉ាកយីហោទាំងនោះ ត្រូវបានធ្វើចាត់វិធានការភ្លាមៗ ដើម្បីធានាឲ្យកម្មករកម្ពុជា ទទួលបានប្រាក់ខែ​ខ្ពស់​ជាង​សព្វថ្ងៃ»៕