ដំបង់ឆក់ ដំបងក្ដគោ កៅអីចងអ្នកទោស ... ត្រូវបានផលិតឡើងដោយសហគ្រាសក្នុងប្រទេសចិន ប្រមាណ​ជាជាង១៣០សហគ្រាស ដើម្បីរកស៊ីចំណេញ ទៅលើសម្ភារៈធ្វើទារុណកម្មទាំងនេះ។ នេះបើតាមរបាយ​ការណ៍​មួយ ចេញផ្សាយនៅថ្ងៃទី២៣ ខែកញ្ញានេះ របស់អង្គការលើកលែងទoសអន្តរជាតិ មានទីស្នាក់ការ​កណ្ដាលនៅទីក្រុង ហ្សឺណែវ ប្រទេសស្វីស។ ការធ្វើពាណិជ្ជកម្ម«មានបាន» ក្នុងប្រភេទនេះ បានបង្ក​ឲ្យ​មាន​ការ​កើន​ឡើង នូវការរំលោភសិទ្ធិមនុស្សយ៉ាងធ្ងន់ធ្ងរ នៅក្នុងប្រទេសជាច្រើន នាទ្វីបអាហ្វ្រិក និងអាស៊ី។

កាលពី១០ឆ្នាំមុន សហគ្រាសទាំងនេះ ដែលមួយចំនួនធំជាកម្មសិទ្ធិរបស់រដ្ឋបាលចិននោះ មានចំនួន​តែ​២៨​សហគ្រាសប៉ុណ្ណោះ។ អង្គការអន្តរជាតិ បានសរសេរទៀតថា៖ «ឧបករណ៍ធ្វើទារុណកម្មមួយចំនួន ជា​ប្រភេទ​​ផលិតផល មានភាពសាហាវព្រៃផ្សៃហួសប្រមាណ ហើយគួរតែត្រូវបានដកចេញ ពីការធ្វើជំនួញ​នេះ​ភ្លាម»។ សម្ភារៈទាំងនោះ ត្រូវបានអង្គការលើកស្ទួយសិទ្ធិមនុស្សមួយនេះ លើកយកមកបង្ហាញជា​ឧទាហរណ៍ ដូច​ជា​សម្ភារៈបំបិទមាត់ ឬខ្នោះច្រវាក់ចង់ភ្ជាប់ដៃជើងជាដើម។

របាយការណ៍របស់អង្គការលើកលែងទោស បានសរសេរបរិហារ មហាអំណាចតំបន់ មួយនេះថា៖ «នៅ​ប្រទេស​ចិន មិនមានវិធានការពិតប្រាកដណាមួយ ដើម្បីត្រួតពិនិត្យទៅលើសម្ភារៈ ឬឧបករណ៍ទាំងនេះ ថាគួរ​ត្រូវ​បានដកចេញ ពីទីផ្សារនោះទេ»។ តែអង្គការនេះ បានផ្ដល់ជាអនុសាសន៍មួយថា៖ «វាបន្ទាន់ណាស់ សម្រាប់​អាជ្ញាធរចិន ក្នុងការធ្វើកំណែទម្រង់ឲ្យស៊ីជម្រៅមួយ ទៅលើច្បាប់ទម្លាប់ពាណិជ្ជកម្ម ដើម្បី​បញ្ចប់​ឲ្យ​បាន​ឆាប់​រហ័ស នូវការធ្វើចរាចរណ៍ដោយគ្មានការទទួលខុសត្រូវ នៃសម្ភារៈទាំងនេះ»។

អង្គការនេះបានអះអាងទៀតថា ពេលខ្លះ ការធ្វើពាណិជ្ជកម្មនេះ ត្រូវបានធ្វើដោយចំហរ ដោយគ្មានការ​លាក់​បាំងអ្វីឡើយ។ ហើយយ៉ាងហោចណាស់ ក្រុមហ៊ុនចិនចំនួន៧ បានបង្ហាញនៅក្នុងសៀវភៅតាំងផលិតផល (catalogue) របស់ពួកគេ ពីរដំបងឆក់ ឬដំបងក្ដគោ​ដែលធ្វើអំពីដែក។ បើតាមរបាយការណ៍ដដែល បាន​បញ្ជាក់​ថា ឧបករណ៍ទាំងនេះត្រូវបានប្រើប្រាស់ដោយកងកម្លាំងនគរបាលកម្ពុជា ក្នុងការយកទៅវាយសំពង លើ​ពលរដ្ឋ​ដៃទទេ ដែលពួកគេគ្រាន់តែធ្វើការតវ៉ា ដោយសន្តិវិធីប៉ុណ្ណោះ។ ឧបករណ៍ទាំងនេះ ក៏កំពុង​ត្រូវ​បាន​នាំ​ចេញ ទៅបំពាក់ឲ្យកងកម្លាំងរបស់ប្រទេសណេប៉ាល់ និងប្រទេសថៃនោះដែរ។

រីឯក្រុមហ៊ុនមួយទៀត ដែលមានឈ្មោះថា China Xinxing Import/Export ត្រូវបានអង្គការលើក​លែង​ទោេស ស្រង់ការបញ្ជាក់មួយមកសរសេរថា មានចំណង់ទាក់ទងពាណិជ្ជកម្ម ជាមួយប្រទេសចំនួន៤០ នៅ​ក្នុង​ទ្វីប​អាហ្វ្រិក នៅក្នុងការធ្វើជំនួញជួញដូរ ច្រវាក់ខ្នោះដៃ និងដំបងឆក់៕