«ពេលភ្ជំអញ្ចឹង យូៗគេលែងម្តង គឺដាច់ជាង» នេះជាការរៀបរាប់របស់ សុធា អ្នកលក់កូនចាបមួយរូប នៅ​ទី​តាំងមុខព្រះបរមរាជវាំង នៅពេលថ្ងៃធម្មតា។ សុធាបានប្រាប់ថា ខ្លួនបានចាប់មុខរបរ ជាអ្នកលក់ចាប​នេះជា​យូរមកហើយ។ ក្នុងអំឡុងពេលបុណ្យភ្ជំបិណ្ឌនេះ អ្នកលក់កូនចាប ដែល​មានទីលំនៅច្បារអំពៅរូបនេះ បាន​ប្តូរពីការលក់នៅមុខវាំង មកលក់នៅតាមវត្តអារាមវិញម្តង ព្រោះថានៅរដូវភ្ជំបិណ្ឌនេះ សម្បូអ្នកមកធ្វើបុណ្យ​នៅឯវត្ត ដែលពួកគេជឿថា បុណ្យកុសល ដែលបានមកពីការព្រលែងកូនចាប ដែលបានជាប់ទ្រុងទាំងនោះ នឹងទៅដល់ញាតិការរបស់ពួកគេ ដែលបានចែកឋានទៅ។

មានអាយុ២៨ឆ្នាំ រាងតូចស្តើង និងមានសម្បុរស្រអែម នាង សុធា បានឱ្យដឹងទៀតថា រាល់កូនចាបដែល​នាង​យកមកលក់ ត្រូវបាននាងទិញចូល ក្នុងតម្លៃមួយក្បាល២០០០រៀល សម្រាប់ថ្ងៃបុណ្យទាន។ តែសម្រាប់ថ្ងៃ​ធម្មតា មានតម្លៃត្រឹមតែ១៥០០ប៉ុណ្ណោះ។ រីឯការលក់ចេញវិញ ក្នុងរដូវភ្ជំបិណ្ឌបែបនេះ កូនចាបរបស់នាង ត្រូវបានលក់ដាច់ខុសពីថ្ងៃធម្មតា និងចំណេញបានច្រើន ព្រោះថាថ្ងៃធម្មតាលក់បានតែមួយគូរ ពី៣ពាន់​រៀល ទៅបួនពាន់រៀល រីឯថ្ងៃបុណ្យទានវិញ នាងលក់បានក្នុងមួយគូពី៥ពាន់ ទៅ៦ពាន់រៀល។ នាង សុធា បញ្ជាក់​ថា៖ «បើចាបច្រើន ជួនកាលលក់បាន៥០ម៉ឺន ហើយថ្ងៃខ្លះលក់បាន២០ម៉ឺន»។

ចំណែកយុវជនអាយុ២៤ឆ្នាំ ឈ្មោះ ហេង ទិត្យ ដែលបានប្តូមុខរបរ មកលក់កូនចាបក្នុងរដូវបិណ្ឌភ្ជំនេះ បាន​រៀបរាប់ឱ្យដឹងដែរថា៖ «ដោយសារ រដូវបុណ្យភ្ជំបិណ្ឌនេះ មានមនុស្សមកច្រើន ហើយអាចរកបាន​ពេល​ហ្នឹង។ មួយថ្ងៃ រកបាន (ប្រាក់ចំណេញ) ពីប្រាំពីរ (ទៅ) ប្រាំបីម៉ឺន។»។ យុវជនលក់កូនចាប ដែលមានសម្បុរ​ស្រគាំរូបនេះ បានពន្យល់ថា ពេលខ្លះលោកលក់បាន ពី៨០ ទៅ១០០ក្បាល ក្នុងមួយថ្ងៃ។ រីឯតម្លៃទិញចូល ក៏មានលក្ខណៈធូរស្រាលជាងនាង សុធា ខាងលើដែរ ដោយចំណាយចេញត្រឹម ១៥០០រៀល និងចំណូល​មកវិញបាន ៣៥០០រៀល ក្នុងមួយក្បាល។

សម្រាប់លោក ល័ក្ខ មានមាឌមាំសម្បុរខ្មៅបន្តិច បានឈប់ប្រកបមុខរបរ ជាអ្នកធ្វើការសំណង់បណ្តោះអាសន្ន ហើយងាកមកចាប់របរ ក្នុងរដូវបុណ្យភ្ជំបិណ្ឌនេះវិញម្តង។ លោកកំពុងឈរហៅអតិថិជន ឱ្យទិញកូនចាប​របស់ខ្លួន យ៉ាងមមាញឹក។ លោកសប្បាយចិត្តណាស់ នឹងមុខរបរថ្មីសម្រាប់ពេលមួយគ្រានេះ ព្រោះវារក​បាន​ចំនូលច្រើនជាង មុខរបរប្រចាំថ្ងៃជាជាងសំណង់របស់លោក។

ចំណែកអ្នកទិញកូនចាបដើម្បីយកទៅព្រលែងវិញ លោក សុធា មានអាយុ២៣ឆ្នាំ ក្នុងពេលដែលលោក​បាន​នាំប្រពន្ធកូនមកវត្ត លោកបានប្រាប់ឱ្យដឹង ការដែលលោកតែងតែចូលចិត្ត ទិញកូនចាបលែងក្នុងថ្ងៃ​បុណ្យ​ទាននេះ ព្រោះដើម្បីឧទ្ទិសកុសលញាតិមិត្តទាំងពីរសន្តានដែល បានស្លាប់បាត់បង់ជីវិត ហើយលោកមាន​ជំនឿថា នៅពេលសាច់ញាតិរបស់លោក ទៅកើតក្នុងជាតិខាងមុខទៀត ពួកគាត់នឹងជួបនឹងរឿង​ល្អៗជា​និច្ច។ លោក​បន្តថា៖ «យើងឃើញចាបជាប់ទ្រុងអញ្ចឹង គឺយើងចង់ឱ្យវាមានសេរីភាព ដូចយើងដែរ»៕