ថ្មីៗនេះ នៅលើបណ្តាញសង្គមហ្វេសប៊ុក មានព័ត៌មានព្រោងព្រាត បានរិះគន់ទៅអាជ្ញាធរអប្សរា ដែល​មិន​យក​ចិត្តទុកដាក់ចំពោះភ្ញៀវបរទេស ដែលបានឆ្លាក់អក្សរ ជប៉ុន ថៃ ចិន និងវៀតណាមជាដើម នៅលើផ្ទាំង​ចំលាក់​នៃជញ្ជាំងប្រាសាទអង្គរវត្ត។ ក្រុមអ្នករិះគន់ ដែលថតទាំងរូបភាព បង្ហោះនៅបណ្តាញ​ហ្វេសប៊ុក​ផង​នោះ បាន​លើកឡើងថា ភាសារបរទេសដែលសរសេរ និងចារនៅលើប្រសាទអង្គរវត្ត បានធ្វើឱ្យខូច​សោភ័ណភាព ជាពិសេសរូបចំលាក់ដែលនៅជញ្ជាំងប្រសាទមួយនេះ។

ឆ្លើយនឹងការរិះគន់នេះ អាជ្ញាធរអប្សរា បានចេញលិខិតបំភ្លឺមួយនៅថ្ងៃទី១៧ ខែកញ្ញា ដោយបកស្រាយថា អក្សរបរទេស ដែលមានចារនៅលើជញ្ជាំង នៃប្រាសាទអង្គវត្តនោះ ត្រូវបានក្រុមអ្នកសិក្សាស្រាវជ្រាវ នៃ​អាជ្ញាធរអប្សរាបានចុះបញ្ជី និងសិក្សាតាំងពីឆ្នាំ២០០២មកម្លេះ ហើយអក្សរប្រភេទនេះ ត្រូវបានអ្នក​ស្រាវជ្រាវ​ចាត់ទុកថា Graffiti តាមនិយាមអន្តរជាតិ ដែលមិនមែនជាប្រភេទសិលាចរិក គំនូរឬចម្លាក់​នោះទេ។

លិខិតរបស់អាជ្ញាធរអប្សរាដដែលនេះ បានអះអាងថា នៅដើមសតវត្យឆ្នាំ១៩៩០ ឆ្មាំប្រាសាទ​នៃ​អភិរក្សដ្ឋាន​អង្គរ បានព្យាយាមកោសលុបអក្សរចំណារទាំងនោះខ្លះៗដែរ ប៉ុន្តែការប្រឹងប្រែងនេះមិនសូវបានផល ហើយ​បានធ្វើឱ្យបាត់ដានប្រវត្តិសាស្រ្តរបស់អង្គរវត្ត ពីព្រោះភ័ស្តតាងទាំងនេះ គឺជាទិន្នន័យសំខាន់ សម្រាប់ស្វែង​យល់អំពីប្រវត្តិសាស្រ្តរបស់អង្គវត្ត។

អជ្ញាធរអប្សរាបានឱ្យដឹងថា ក្នុងចំណោមអក្សរបរទេសទាំងអស់ ដែលបានឆ្លាក់នៅលើប្រសាទអង្គរវត្ត គឺ​ភាសារជប៉ុនមានអាយុកាលចាស់ជាងគេ គឺសរសេរនៅដើមសតវត្សទី១៧ រីឯភាសាផ្សេងទៀត សរសេរ​នៅ​ចុងសតវត្សទី១៩ ដើមសតវត្សទី២០ និងនៅមុនឆ្នាំ១៩៨៩។ ចំណារទាំងនោះ គឺនិយាយអំពីបូជនីយដ្ឋាន អង្គរវត្តជាទឹកដីរបស់ព្រះ ដែលគេឯងតែងតែមកគោរពបូជា។

អាជ្ញាធរអប្សរាបព្ជាក់បន្តថា តាមច្បាប់ស្តីពីការការពារបេតិកភ័ណ្ឌ អាជ្ញាធរអប្សរាមិនអញ្ញាតឱ្យមាន​ការ​សរសេរ ឬចារលើសាច់ថ្មនៅតាមជញ្ជាំង ឬសរសរប្រសាទទៀតឡើយ ហើយអាជ្ញាធរអប្សរា នឹងចាត់​វិធានការណ៍ចំពោះបញ្ហានេះ៕