សិក្ខាសាលា ពិគ្រោះយោបល់ត្រីភាគីថ្នាក់ជាតិ ដើម្បីកំណត់ប្រាក់ឈ្នួលអប្បបរមានៅកម្ពុជា បានរៀបចំ​ឡើងនៅថ្ងៃទី ១៧ ខែកញ្ញា ឆ្នាំ ២០១៤ ដែលមានរយៈពេលពេញមួយថ្ងៃ។ វត្តមាននៅក្នុងសិក្ខាសាលានេះ លោក ប៉ាវ ស៊ីណា ប្រធានសហព័ន្ធសហជីពចលនាកម្មករ (CUMW) បានថ្លែងប្រាប់អ្នកសារព័ត៌មានថា៖ «ទូរលេខដែលយើងដាក់ ១៧៧ដុល្លា គឺជាលេខដែលយើង ដាក់ធ្វើការចរចា។ មានន័យថា យើងស្នើរឡើង​ដោយភាគីកម្មករ ដូច្នេះហើយលេខនេះមិនមែនជាលេខឈរទេ មានន័យថាវាជាលេខដែលអាច​បត់បែន​បាន ហើយលេខនេះ គឺយើងត្រៀមខ្លួនក្នុងការចរចារ។»

ច្រើនឆ្នាំកន្លងមក កម្មកររោងចក្រកាត់ដេរ ក្នុងប្រទេសកម្ពុជាជាច្រើនរយនាក់ បានដួលសន្លប់ និងធ្លាក់ខ្លួន​ឈឺជាបន្តបន្ទាប់ ដោយសារបញ្ហាសុខភាព បណ្តាលមកពីប្រាក់ឈ្នួលតិច ការហូបចុកមិនបានគ្រប់គ្រាន់ ការទទួលដំណេក និងសម្រាកមិនគ្រប់គ្រាន់ ដោយសារត្រូវបង្ខំចិត្តធ្វើការបន្ថែមម៉ោងច្រើន។

លោក ប៉ាវ ស៊ីណា បានបន្តទៀតថា៖ «ប្រសិនបើយើងជំរុញឲ្យប្រាក់ឈ្នួលកម្មករ ស្ថិតក្នុងជីវភាព​មួយ​សមរម្យ អាចទទួលយកបាន មានន័យថា គាត់អាចកាត់បន្ថយនូវករណីសន្លប់បាន»។

ស្របនឹងគ្នានោះដែរ លោក អ៊ិត សំហេង រដ្ឋបន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើក​ឡើង​ថា បញ្ហាប្រាក់ឈ្នួល នឹងមានការតម្លើងជារាងរាល់ឆ្នាំ។ ក្នុងមួយឆ្នាំម្តង នឹងមានការពិភាក្សាគ្នា ហើយនៅ​ពេល​​ដែលមានការពិភាក្សាម្តងៗ ការបូកបន្ថែម ពិតជាត្រូវមាន ក្នុងអត្រាមួយ ដែលរោងចក្រអាចអនុវត្តបាន និង​នៅតែមាននិរន្តរភាព។ បងប្អូនកម្មករ នៅតែមានការងារធ្វើ ហើយប្រាក់ឈ្នួលកាត់តែប្រសើរ​ឡើង​ទៀត។

គួបញ្ជាក់ថា នៅថ្ងៃទី ១៧ ខែកញ្ញានេះដដែល ក្រុមកម្មកររោងចក្រជាង ៣០០រោងចក្រ បានធ្វើយុទ្ធនាការ​ទូទាំងប្រទេស ដើម្បីទាមទារប្រាក់ឈ្នួល១៧៧ដុល្លាក្នុងមួយខែ ហើយយុទ្ធនាការនេះធ្វើសំរាប់តែថ្ងៃទី១៧ ខែកញ្ញានេះមួយថ្ងៃទេ ដែលប្រើរយៈពេល ត្រឹមតែកន្លះម៉ោងប៉ុណ្ណោះ ក្នុងវេលាដែលកម្មករឈប់សំរាក​ពិសារ​អាហារថ្ងៃត្រង់។

ប្រធានសហព័ន្ធសហជីព ចលនាកម្មករ លោក ប៉ាវ ស៊ីណា បានពន្យល់ទៀតថា៖ «ការប្រកាសលទ្ធផល នៃ​ការពិភាក្សាក្នុងខែនេះ គឺក្នុងចន្លោះខែ ១០។ ដូច្នេះហើយសហជីពយើង គ្រោងនឹងមានការជួបជុំកម្មករ​នៅ​មុនខែ១០ ដើម្បីបង្ហាញសារទៅកាន់ក្រសួងពាក់ព័ន្ធថា យើងត្រូវការប្រាក់ឈ្នួល ដែលអាចទទួលយកបាន។ ដូច្នេះប្រសិនបើលទ្ធផលការប្រកាសរបស់ក្រសួង ក្នុងកម្រិតទាបដែលយើងមិនអាចទទួលយកបាន បាន​ន័យ​ថា អ្វីដែលយើងជួបជុំ គឺជាសារមួយចុងក្រោយហើយ ថាយើងនិងធ្វើអី។»៕