ហាង ប៊ើហ្គើរឃីង (Burger King) ដែលជាភោជនីយដ្ឋានអាហាររហ័ស ជំនាញខាង ហ៊េមប៊ើហ្គើរ បានបង្កើត​រូបរាង ហ៊េមប៊ើហ្គើរ ពណ៌ខ្មៅទាំងស្រុងនេះឡើង។ ដំបូងនំប័ង ដែលធ្វើជាគម្របសងខាង និងប៊័រខាប់ ត្រូវ​បានធ្វើ​ឲ្យខ្មៅងងឹង ដោយសារបានដុតជាមួយនឹងធ្យូងឬស្សី។ រីឯសាច់គោចិញ្ច្រាំវិញ ក៏ត្រូវបានផ្សំគ្រឿង​ជា​មួយនឹងម្រេចខ្មៅ ដោយលាយជាមួយនឹងទឹកខ្ទឹម ផ្សំនឹងប្រេងមួយប្រភេទ ដែលមានសម្បុរខ្មៅដែរ។

បើនៅក្នុងទ្វីបអ៊ឺរ៉ុបខាងលិច អ្នកជំនាញខាងចំណីអាហារបាននិយាយទុកមុន ថាហ៊េមប៊ើហ្គើរ ខ្មៅ មិនអាច​ធ្វើ​ឲ្យ​អតិថិជនជ្រួលជ្រើមចង់ទិញ មកបរិភោគប៉ុន្មានទេ។ មូលហេតុ៖ ព្រោះពណ៌ខ្មៅរបស់ប៊័រខាប់ មិនបាន​ធ្វើ​ឲ្យ​បណ្ដាជនអ្នករស់នៅទីនោះ ផ្លាស់ប្ដូរទម្លាប់របស់ពួកគេ ដែលតែងតែបរិភោគ ប៊័រខាប់ដែលមានពណ៌​លឿង នោះទេ។

ប៉ុន្តែសម្រាប់ ប៊ើហ្គើរឃីង នៅប្រទេសជប៉ុនវិញ មិនបានគិតថា ការបង្កើតថ្មីនេះ មិនអាចទៅរួចនោះឡើយ។ ហាង​​ជំនាញខាង ហ៊េមប៊ើហ្គើរ ដែលធ្លាប់ធ្វើ ហ៊េមប៊ើហ្គើរ ពណ៌ខ្មៅពាក់កណ្ដាលរួចហើយ កាលពី​ពេល​កន្លង​មក​នោះ បានបញ្ចេញការបង្កើតថ្មីរបស់ខ្លួនខាងលើ មកលក់ចាប់ពីខែនេះតទៅ តែសម្រាប់តែចំនួន​មួយ ដែល​​មាន​កំណត់​ប៉ុណ្ណោះ៕