«មានកត្តាច្រើនមែនទែន ដែលនាំឱ្យខ្ញុំទទួលបានជោគជ័យ មកដល់ថ្ងៃនេះ» នេះជាការលើកឡើង​របស់​យុវតី ចាន់ កិត្យាភារ៉ា ជាសិស្សម្នាក់ ដែលទទួលបាននិទ្ទេសល្អប្រសើរ ទូទាំងប្រទេសក្នុង​ចំណោមសិស្ស​ទាំង​១១​នាក់ ដែលទទួលបាននិទ្ទេសល្អប្រសើរ ក្នុងសម័យប្រលងឆ្នាំ២០១៤នេះ ជាឆ្នាំ​ដែលមានសិស្ស​ធ្លាក់​ច្រើន​ជាង​គេ។ កញ្ញា ចាន់ កិត្យភារ៉ា គឺជាសិស្សមកពីវិទ្យាល័យកំពង់ស្ពឺ ក្នុងក្រុងច្បារមន ខេត្តកំពង់ស្ពឺ។ កញ្ញា​ទទួល​បាន​ចំណាត់​​លេខ​៥ ក្នុងចំណោមសិស្សពូកែ ដែលមាននិទ្ទេសល្អប្រសើរទាំងអស់។

ក្នុងទឹកមុខរំភើបរីករាយ កិត្យាភារ៉ា បានរៀបរាប់ពីបទពិសោធន៍ ដែលនាំឱ្យខ្លួនកញ្ញាក្លាយជាសិស្សពូកែថា ក្រោយពីភារ៉ា ក្រេបចំណេះពីគ្រូនៅសាលារៀនហើយ នៅពេលមកដល់ផ្ទះវិញ នាងបាន​ចំណាយពេល​២​ទៅ​៤ម៉ោង ដើម្បីរៀនធ្វើលំហាត់ឡើងវិញ នូវមុខវិជ្ជាពិបាកមួយចំនួន ដូចជាគណិតវិទ្យា រូបវិទ្យា គីមីវិទ្យា ជីវៈវិទ្យាជាដើម។ លើសពីនេះទៅទៀត ភារ៉ា បានរៀបរាប់ទៀតថា ការរៀនបន្ថែមដោយខ្លួនឯង នៅ​ផ្ទះ​មិន​គ្រប់គ្រាន់នោះទេ នៅពេលទំនេរ ភារ៉ានិងមិត្តភក្តិតែងតែជួបជុំគ្នា ដើម្បីរំលឹកមេរៀនចាស់ និងលំហាត់ៗ​ឡើង​វិញ និងផ្លាស់ប្តូរ ចែកលែកចំណេះដឹងគ្នាទៅវិញទៅមក។

ជាកូនទី២ ក្នុងចំណោមបងប្អូន៣នាក់ សិស្សឆ្នើម ដែលទទួលចំណាត់ទី៥ក្នុងចំណោមសិស្សពូកែ ទាំង​១១​នាក់រូបនេះបានឱ្យដឹងថា យុវតីជំទង់រូបនេះ ទទួលបានការលើកចិត្តយ៉ាងច្រើនពីក្រុមគ្រួសារ ពិសេស​ពី​សំណាក់ឪពុកម្តាយ និងមិត្តភក្តិជិតដិតរបស់នាង ដែលកត្តានេះ បានជំរុញទឹកចិត្តឱ្យនាង កាន់តែមានចិត្ត​ខំប្រឹង​ប្រែងថែមទៀត រហូតទទួលបានជោគជ័យនៅថ្ងៃនេះ។

ឆ្លើយតបនឹងសំណួរ ដែលសួរនៅពេលអនាគត តើភារ៉ា នឹងចាប់ជំនាញអ្វី? សិស្សពូកែប្រចាំវិទ្យាល័យ​កំពង់ស្ពឺ​រូបនេះ បានបញ្ជាក់យ៉ាងដូច្នេះថា សេដ្ឋកិច្ចបច្ចុប្បន្ននៅប្រទេសកម្ពុជា កាន់តែរីកចំរើនជាលំដាប់ មាន​រោងចក្រសហគ្រាស និងវិគិនបរទេសជាច្រើដែលបានមកដាក់ទុននៅកម្ពុជា ដូច្នេះជំនាញសេដ្ឋកិច្ច គឺជា​គោលដៅដែលខ្លួនត្រូវតម្រង់ទិស។ «ខ្ញុំចង់ក្លាយជាអ្នកវិភាគសេដ្ឋកិច្ចមួយរូប អញ្ចឹងខ្ញុំចង់រៀនផ្នែក​សេដ្ឋកិច្ច ដែលអាចជួយអភិវឌ្ឍសេដ្ឋកិច្ចនៅក្នុងប្រទេសយើង» នេះជាអ្វីដែលកញ្ញា កិត្យាភារ៉ា បានបញ្ជាក់​បន្ថែម។

ភារ៉ា អះអាងថា ការទទួលបានជោគជ័យនៅពេលនេះ គឺជាជំហានមួយតែប៉ុណ្ណោះ នាងនឹងខិតខំរៀនធ្វើ​យ៉ាងណា ដើម្បីឱ្យខ្លួនទទួលបានអាហារូបករណ៍ ទៅសិក្សានៅក្រៅប្រទេស។

យុវតីជាសិស្សឆ្នើមរូបនេះ បានផ្តាំផ្ញើទៅកាន់អ្នក ដែលធ្លាក់ពីការប្រលងយកសញ្ញាបត្រ​មធ្យមសិក្សា​ទុតិយភូមិ នៅលើកទីមួយនេះ ថា សូមកុំឱ្យបាក់ទឹកចិត្ត ហើយត្រូវតែខិតខំ ប្រឹងប្រែងរៀនឡើង ដើម្បី​ទទួល​បានជោគជ័យ ក្នុងការប្រលងលើកទី២ ក្នុងខែតុលាខាងមុខនេះ៕