ក្មេងម្នាក់ ដែលត្រូវគេបានចងស្លាបសេក​ ជ្រមុជក្បាលក្នុងទឹកពាង ដោយសាររឿងលួចផ្លែដូង ដែលកំពុង​ល្បី​ខ្ទរខ្ទាពេញបណ្តាញសង្គមហ្វេសប៊ុក ពេលនេះត្រូវបានតារាសម្តែង និងជាម្ចាស់គម្រោងសាវិន លោក សាវីន ហ្វីលីព ឧបត្ថម្ភថវិការចំនួន៤៩០ដុល្លា ដែលលោកទទួលបានពីសម្បុរសជននានា។

តាមរយៈហ្វេសប៊ុក របស់តារាសម្តែងលោក សាវីន ហ្វីលីព លោកបានយកថវិកា ទាំង៤៩០ដុល្លានេះ ជូន​ទៅ​ដល់ដៃកុមារារងគ្រោះដោយផ្ទាល់។ ថវិកានេះ លោកទទួលបានការឧបត្ថម្ភ ពីអតីតតារាសម្តែងដ៏ល្បី​ឈ្មោះ​លោក ខៃ ប្រសិទ្ធ លោក អ៊ូ យាណារ៉ា ព្រមទាំងតារាសម្តែងផ្សេងទៀត ក្នុងនោះមានលោក ឡាយ វណ្ណយុត្ត ផងដែរ។

កុមារា ម៉ន វាសនា អាយុ១៤ឆ្នាំ មានស្រុកកំណើត ស្ថិតក្នុងឃុំ កំពង់ពពិល ស្រុក ពារាំង ខេត្តព្រៃវែង​ត្រូវ​បាន​​បុរសពីរនាក់បងប្អូនធ្វើទារុណកម្ម យ៉ាងឃោរឃៅកាលពីប៉ុន្មានថ្ងៃមុននេះ ដោយសារតែ​កុមារ​ដែល​ចេញពីគ្រួសារដ៏ទីទាល់ក្រ បានចូលទៅលួចបេះដូង របស់បុរសទាំងពីរខាងលើ។ ប៉ុន្តែជនដៃដល់​ទាំងពីរ​នាក់បងប្អូន ត្រូវបានសមត្ថកិច្ចចាប់ខ្លួនរួចហើយ កាលពីថ្ងៃទី២៨ សីហា ឆ្នាំ២០១៤ ដើម្បីផ្ដន្ទាទោសទៅ​តាមច្បាប់ជាធរមាន ពីបទធ្វើទារុណកម្ម និងវាយដំទៅលើរូបរាងកាយ៕