ទន្ទឹមនឹងគ្រោះថ្នាក់យន្ដហោះ ចេះតែកើតមានជាបន្តបន្ទាប់ អ្នកដំណើរមួយរូបដែលបានជិះលើយន្ដហោះ ថមសុន អ៊ែរវេស (Thomson Airways) ទំ​នងជាបានវាយបំបែកកញ្ចក់បង្អួចយន្ដហោះ បានមួយជាន់ជាស្ថាពរហើយ នៅ​ក្នុង​ពេលដែលយន្ដហោះ កំពុងហោះនៅលើអាកាស។

យន្ដហោះប្រភេទ ប៊ូអីង ៧៨៧ របស់​ក្រុមហ៊ុន​អាកាស​ចរណ៍ ថមសុន អ៊ែរវេស។ (រូបថតក្រុមហ៊ុន)

គ្រោះថ្នាក់យន្ដហោះ - ព្រឹត្តិការណ៍ដ៏ខ្មៅងងឹត ជាបន្តបន្ទាប់នៃការបាត់ខ្លួន និងធ្លាក់យន្ដហោះ ហៀបតែនឹងបន្ត​ភាគ​របស់ខ្លួនបន្ថែមទៀត នៅប្រទេសអៀឡង់ កាលពីចុងសប្ដាហ៍មុន។ អ្នកដំណើរមួយរូប ដែលរហូតមកដល់​ពេលនេះ គេនៅមិនទាន់ដឹងពីមូលហេតុអ្វីនៅឡើយ ទំនងជាបានវាយបំបែកកញ្ចក់បង្អួចយន្ដហោះ របស់​ក្រុមហ៊ុន​អាកាស​ចរណ៍ ថមសុន អ៊ែរវេស ដែលខ្លួនកំពុងជិះកាលពីថ្ងៃទី២៥ ខែកក្កដាមុន ចេញពីរដ្ឋផ្លរីដ (Floride) សហរដ្ឋ​អាមេរិក ឆ្ពោះមក​កាន់ក្រុង មេនឆេស្ទើរ (Manchester) នៃចក្រភពអង់គ្លេស។

បន្ទាប់ពីយន្ដហោះបានចុះចតដល់ព្រលានយន្ដហោះភ្លាម បុរសដ៏អស្ចារ្យម្នាក់នេះ ត្រូវបានឃាត់ខ្លួនជាបន្ទាន់ ហើយបន្ទាប់មក ត្រូវបានចោទប្រកាន់ជាផ្លូវការ ពីបទបង្កគ្រោះថ្នាក់ដល់ការហោះហើរ ដោយអាជ្ញាធរអង់គ្លេស កាលពីចុងសប្ដាហ៍មុន។ នេះបើតាមការប្រកាសឲ្យដឹង របស់នគរបាលក្រុងមេនឆេស្ទើរ។

ជាសំណាងល្អ ដែលបុរសឈ្មោះ នីកូឡា វ៉ាយថឃើរ (Nicholas Whitaker) អាយុ ៤៣ឆ្នាំរូបនេះ បានបំបែកត្រឹមតែ​កញ្ចក់ទីមួយ នៃបង្អួច​យន្ដហោះប្រភេទ ប៊ូអីង ៧៨៧ តែប៉ុណ្ណោះ។ តាមអ្នកជំនាញខាងយន្ដហោះមួយរូប បានថ្លែង​បញ្ជាក់ប្រាប់សារព័ត៌មានអង់គ្លេស ដេល្លីមែល (Daily Mail) ឲ្យដឹងថា ប្រសិនជាកញ្ចក់ទាំងពីរជាន់ ត្រូវបានបំបែក​នោះ យន្ដហោះទាំងមូលនឹងឃ្លោង បាត់លំនឹង ហើយគ្រោះថ្នាក់ក៏អាចកើតមានឡើងដែរ។ អ្នកជំនាញរូបនោះ បាន​អះអាងទៀតថា៖ «បំបែកកញ្ចក់ជាន់ខាងក្នុងយន្ដហោះ មិនជាស្រួលប៉ុន្មានទេ ហើយបំបែកកញ្ចាក់ខាងក្រៅ គឺពិត​ជាមិនអាចទៅរួចឡើយ»។

ប៉ុន្តែផ្ទុយស្រឡះពីការលើកឡើង របស់អ្នកជំនាញម្នាក់នេះ ព្រោះ នីកូឡា វ៉ាយថឃើរ ទំនងជាបានបំបែកកញ្ចក់​ជាន់​ខាងក្នុងនេះ ដោយប្រើ​តែមួយកណ្ដាប់ដៃប៉ុណ្ណោះ។ យ៉ាងណាក៏ដោយ ក៏ទង្វើដែលគ្មានហេតុផល របស់បុរសអ្នក​ដំណើរនេះ សក្ដិសមនឹងត្រូវបក​ស្រាយឲ្យបានច្បាស់ នៅក្នុងសវនាការថ្ងៃទី១១ ខែសីហា​ ឆ្នាំ២០១៤​ខាង​មុខ៕