តែគួរឲ្យស្ដាយ ដោយទឹកបឹងនោះ អាចនឹងបង្កឲ្យមានជំងឺមហារីក ដោយសារតែនៅតំបន់នោះ មានសម្បូរទៅដោយ​សារជាតិ ហ្វូស្វាត។

បឹងផុសខ្លួន កណ្ដាលវាលខ្សាច់។ (រូបថតផ្តិតពីវីដេអូ)

បឹងចម្លែក - ទឹកដ៏ថ្លាឈ្វង់ នៃបឹងដែលបានផុសឡើង យ៉ាងចម្លែកកាលពីដើមខែកក្កដាកន្លងមកនេះ បានធ្វើឲ្យ​អ្នក​រស់នៅក្នុងតំបន់ ហ្គាហ្វសា (Gafsa) ប្រទេសតួណេស៊ី មានភាពត្រេកអរសប្បាយរីករាយណាស់ ដោយសារតែពួកគេ​ចាត់ទុកបឹងថ្មី ដែលបានកកើតឡើងកណ្ដាលវាលខ្សាច់ដ៏ល្វឹងល្វើយ ជាការប្រទានរបស់ព្រះអាឡាហ៍ជាម្ចាស់។

ប៉ុន្តែបន្ដិចម្ដងៗ ទឹកបឹងនោះ បានធ្វើឲ្យអាជ្ញាធររបស់ប្រទេស តួណេស៊ី ខ្វល់ខ្វាយជាខ្លាំង។ អ្នកសារព័ត៌មាន​របស់​ប្រទេសនេះមួយរូប លោក ឡាខ៍ដា ស៊ូអីដ (Lakhdar Souid) បានរាយការណ៍ឲ្យដឹងថា «មានសញ្ញាដ៏ច្បាស់មួយ បង្ហាញថាទឹកបឹងនេះ មានជំងឺឆ្លង និងអាចបង្កឲ្យមានជំងឹមហារីក»។

នៅខែនេះ ប្រទេសតួណេស៊ី មានសីតណ្ហភាពក្ដៅរហូតដល់ ៤០អង្សាសេ។ ហើយការផុសឡើងនៃបឹង​ដែលមាន​ទឹកថ្លាឈ្វេង ហើយមានជម្រៅរហូតដល់១៨ម៉ែត្រនេះ ស្ថិតនៅចន្លោះជួរភ្នំ ដែលល្បីថាសម្បូរទៅ​ដោយសារជាតិ ហ្វូស្វាត។

តែពីរសប្ដាហ៍ក្រោយពីការពន្លេចខ្លួនរបស់បឹងនេះ អាជ្ញាធរបានចាត់ទុកបឹងនេះ ថា«មិនល្អស្អាត ក្នុងការចុះងូតទឹក»​នោះទេ ហើយថាអាជ្ញាធរត្រូវការពេលវេលាបន្ថែមទៀត ដើម្បីកំណត់ឲ្យដឹងពីគុណភាពទឹក និងប្រភពនៃទឹកបឹង​នេះ។

មូលហេតុមួយទៀត ដែលធ្វើឲ្យបឹងនេះផុសឡើងនោះ អាចបណ្ដាលមកចលនាផែនដី បានធ្វើឲ្យផ្ទាំងថ្ម​នៅក្រោមដី​ប្រេះរបើក ជំរុញឲ្យទឹកអាចរកផ្លូវចេញមកខាងលើផែនដីបាន។ អ្នកជំនាញខ្លះទៀត បានគិតថា ទឹកបឹងអាចជាទឹក​ភ្លៀង ដែលបានស្រោចស្រព នៅជុំវិញតំបន់នេះ។ អ្នកសារព័ត៌មានដដែល បាននិយាយបន្តថា៖ «ក្នុងប៉ុន្មានថ្ងៃដំបូង ទឹកមានសភាពថ្លាឈ្វេង ដូចកញ្ចក់។ ប៉ុន្តែក្នុងពេលបច្ចុប្បន្ន ទឹកបានប្រែពណ៌ជាបៃតង និងសម្បូរទៅដោយ ស្លែរ និងស្នឹម។ បែបនេះធ្វើឲ្យគេគិតថា ទឹកបឹងចម្លែក មានសភាពនៅនឹងថ្កល់ មិនមានចរន្ដផ្លាស់ប្ដូរនោះឡើយ។»៕

បឹងដ៏ចម្លែក ជាវីដេអូ៖