លិខិតរបស់ក្រសួងធម្មការ និងសាសនា ចុះនៅថ្ងៃទី២៨ ខែកក្តដា បានឱ្យដឹងថា ក្រសួងធម្មការ នឹងចាត់វិធានការ​យ៉ាងតឹងតែងបំផុតចំពោះបុគ្គល ធាន វុទ្ធី ដែលបានតែងតាំងខ្លួនថា ជាព្រះសិរអារ្យមេត្រីយ៍ និងការលក់ដូររូបថត និងវីដេអូជាដើម។

រូបតាបស ធាន វុទ្ធី ដែលតាំងខ្លួនជាព្រះពុទ្ធទី៥។ (រូបថត ហ្វេសប៊ុក)

អបិយជំនឿ - ក្រោយពីសារព័ត៌មានជាច្រើន និងអ្នកប្រើប្រាស់បណ្ដាញសង្គម បាននាំបង្ហោះចែកចាយ​វីដេអូដែល​ទាក់ទងលោក ធាន វុទ្ធី តាំងខ្លួនជា«ព្រះសិរអារ្យមេត្រីយ៍»មក លោក មិន ឃិន រដ្ឋមន្ត្រីក្រសួងធម្មការ និងព្រះតេជ​ព្រះគុណ ឈឹង ប៊ុនឈា សមាជិកថេរៈសភា មិនអាចនៅព្រងើយកន្តើយ មិនប្រតិកម្មទៀតចំពោះរឿងមិនប្រក្រតីនេះ បានទេ។

បន្ទាប់ពីបានចុះធ្វើការស្រាវជ្រាវដោយផ្ទាល់ ដោយលោករដ្ឋមន្ត្រី និងព្រះតេជគុណសមាជិកថេរៈសភាផ្ទាល់ កាលពី​ថ្ងៃទី ២៧ ខែកក្កដា ឆ្នាំ២០១៤នេះ ទាក់ទងនឹងព័ត៌មានដែលថា លោក ធាន វុទ្ធី ធ្វើឱ្យប៉ះពាល់ដល់ព្រះពុទ្ធសាសនា​យ៉ាងធ្ងន់ធ្ងរនេះ ទីបំផុតទៅ ក្រសួងធម្មការបានសម្រេចថា៖ «ក្រសួងធម្មការនិងគណសង្ឃនាយក យល់ឃើញថា ប្រតិកម្មទាំងអស់នេះកើតឡើង ដោយហេតុច្រើនយ៉ាង ក្នុងនោះមានការផ្សព្វផ្សាយរូបបុគ្គល ធាន វុទ្ធី ជារូបថត ជា​វីដេអូ ដែលធ្វើសកម្មភាពហួសព្រំដែន ខុសនឹងច្បាប់ព្រះពុទ្ធសាសនា និងច្បាប់រដ្ឋ»។

សេចក្ដីសម្រេចនេះ បានសរសេនៅក្នុងលិខិតមួយ របស់ក្រសួងធម្មការ និងសាសនា ចុះថ្ងៃទី២៨ ខែកក្កដា ឆ្នាំ២០១៤ នេះ ដោយមានហត្ថាលេខា របស់លោករដ្ឋមន្ត្រី មិន ឃិន និងព្រះរាជតំណាងសម្ដេចព្រះសង្ឃនាយក ព្រះតេចគុណ អំ លឹមហេង នោះផង។

លិខិតដដែលបានដាក់កំហិត ទៅលើអភិបាលនិងគណៈអភិបាលខេត្តកណ្តាល ត្រូវតែចាត់​វិធានការ​ប្រមូលយក​នូវ​ឯកសារ និងដាក់បម្រាមឱ្យបានតឹងតែងជាទីបំផុត ដើម្បីកុំឱ្យមានការលក់ដូ ឬផ្សព្វផ្សាយបន្តទៅទៀត ព្រោះនេះ​ជា​ទង្វើបោកប្រាស់ និងខុសទៅនឹងច្បាប់ព្រះពុទ្ធសាសនា ដែលជាសាសនារបស់រដ្ឋ។

បើតាមប្រធានការិយាល័យធម្មការស្រុកកោះធំ លោក ទើង ស្រ៊ុន ដែលស្រង់សម្តីដោយវិទ្យុអន្តរជាតិមួយ បានដឹងថា រឿងរ៉ាវនេះ ពិតជាធ្លាប់បានកើតឡើងពិតមែន តែលោក ធាន វុទ្ធី ក៏បញ្ឈប់ធ្វើរឿងនេះហើយ។ ដោយឡែក​អ្នក​មាន​ជំនឿស៊ុបលើលោក ធាន វុទ្ធី ក៏នំាគ្នារចនារូបលោក ធាន វុទ្ធី ជារូបព្រះសិរអារ្យមេត្រី ហើយនាំគ្នាដាក់លក់ ដោយគេ​ថានេះជាសិទ្ធិរបស់ពួកគេ។ តែលោកបញ្ជាក់ថា រាល់ថវិកាបានមកពីការលក់រូបទាំងនេះ មិនអាចយកទៅកសាង​សមិទ្ធផលនានាក្នុងវត្តឲ្យបានគ្រប់គ្រាន់ទេទេ។ សមិទ្ធផលទាំងនេះ ចេញមក​ពីថវិកា របស់ប្រជាពុទ្ធបរិស័ទគ្រប់​មជ្ឈដ្ឋាន ទាំងក្នុងនិងក្រៅប្រទេស៕

រូបផ្សាយពាណិជ្ជកម្ម នៅក្នុងវត្តទួលរាជា បង្ហាញថាតាបស ធាន វុទ្ធី ជាព្រះពុទ្ធទី៥។ (រូបថត ហ្វេសប៊ុក)