នយោបាយ - ក្រុមកាងារ៣ បង្កើតឡើងដោយគណបក្សប្រជាជនកម្ពុជា និងគណបក្សសង្រ្គោះជាតិ ដើម្បីជជែក​គ្នា​លម្អិត លើកកិច្ចព្រមព្រៀងគោល របស់គណបក្សទាំងពីរ ដែលគណបក្សសង្រ្គោះជាតិលើកឡើងនោះ គឺ៖ ទី១. ក្រុម​ការងារធ្វើវិសោធនកម្មរដ្ឋធម្មនុញ្ញ។ ទី២. ក្រុមកាងារធ្វើវិសោធនកម្ម បទបញ្ជាផ្ទៃក្នុងរដ្ឋសភា។ ទី៣. ក្រុមកាងារធ្វើ​វិសោធនកម្មច្បាប់បោះឆ្នោត។

លោកកឹម សុខា អនុប្រធានគណបក្សង្រ្គោះជាតិបានអះអាងថា ថ្នាក់ដឹកនាំកំពូលរបស់គណបក្សប្រជាជនកម្ពុជា និង​គណបក្សសង្រ្គោះជាតិ បានឯកភាពគ្នា នៅព្រះបរមរាជវាំងនៅល្ងាចថ្ងៃម្សិលមិញហើយ អំពីការចាប់ផ្តើមរបស់​ក្រុមការងារទាំងបី។ ចំពោះមុខអ្នកសារព័ត៌មាន នាសាលាដំបូងរាជធានីភ្នំពេញថ្ងៃទី២៥ ខែកក្កដា នេះ លោក កឹម សុខា បញ្ជាក់ថា៖ «ទាល់តែកិច្ចការទាំងបីហ្នឹងចប់ បានយើងចូលសភា ដើម្បីទៅអនុម័តច្បាប់ទាំងបីហ្នឹង។»

នៅពេលអ្នកសារព័ត៌មានសួរថា តើរហូតមកដល់ពេលនេះ នៅមានចំណុចខ្វែងគំនិតគ្នានៅឡើយទេ រវាង​គណបក្ស​ប្រជាជនកម្ពុជា និងគណបក្សសង្រ្គោះជាតិ? អនុប្រធានគណបក្សសង្រ្គោះជាតិ បានពន្យល់ថា ជាគោលការណ៍រួម​គណបក្សប្រជាជនកម្ពុជា និងគណបក្សសង្រ្គោះជាតិ បានព្រមព្រៀងគ្នាហើយ តែនៅមានចំណុចខ្វែងគំនិតគ្នា ឬ​យ៉ាងណានោះ គឺត្រូវចាំមើលលទ្ធផលក្រោយការជជែកគ្នាលម្អិត លើកការព្រមព្រៀងជាគោលការណ៍ នោះ។

គួររម្លឹកថា ក្នុងបុព្វហេតុជាតិ និងប្រជារាស្រ្ត គណបក្សប្រជាជនកម្ពុជា និងគណបក្សសង្រ្គោះជាតិ កាលពីថ្ងៃទី២២ ខែកក្កដា ឆ្នាំ២០១៤ បានឯកភាពគ្នា លើកិច្ចព្រមព្រៀងជាគោលការណ៍រួមមួយ ដែលមាន៧ប្រការ ដើម្បីបញ្ចប់វិបត្តិ​នយោបាយ តាំងពីក្រោយការបោះឆ្នោតសកលឆ្នាំ២០១៣។ កិច្ចព្រមព្រៀងនយោបាយ ដែលត្រូវបានសហគមន៍​អន្តរជាតិ អង្គការសង្គមស៊ីវិល និងអ្នកវិភាគឯករាជ្យ មើលឃើញថា នឹងនាំកម្ពុជាឲ្យមានលិទ្ធិប្រជាធិបតេយ្យរឹងមាំ​ថែមទៀត៕