គុណភាពអប់រំរបស់សាលាឯកជន ត្រូវបាន មាតាបិតា និងអាណាព្យាបាលសិស្សភាគច្រើន ឲ្យតម្លៃ និងមាន​ទំនុក​ចិត្តកាន់តែខ្លាំងឡើងៗ ទាំងការថែរទាំ គុណភាពចំណេះដឹង និងទាំងក្រមសីលធម៌របស់សិស្ស។

សិស្សសាលាឯកជនមួយ នៅខេត្តបាត់ដំបង។ (រូបថត betterlives)

ការអប់រំ - បច្ចុប្បន្ននេះ ចំនួនសាលាឯកជន មានចំនួនកាន់តែកើនច្រើនឡើង ពីមួយឆ្នាំទៅមួយឆ្នាំ ទាំងនៅរាជធានី និងតាមបណ្ដាខេត្ត។ ការកើនឡើងនេះ មិនមែនគ្មានមូលហេតុរបស់វានោះទេ។ ពីមួយឆ្នាំទៅមួយឆ្នាំ  ឪពុកម្ដាយ ឬអាណាព្យាបាលជាច្រើន លែងបញ្ជូនកូនក្មួយរបស់ខ្លួន ទៅរៀននៅសាលារដ្ឋទៀត តែបែរជាបានជ្រើសរើស និង​ឲ្យតម្លៃលើ ការអប់រំនៅសាលាឯកជន ច្រើនជាងទៅវិញ។ តើមានកត្តាអ្វី ដែលនាំឲ្យសាលាឯកជនមានប្រជាប្រិយ​ភាពជាងសាលារដ្ឋដូច្នេះ?

កញ្ញា ភិន គឹមលាង បុគ្គលិករបស់សាលាឯកជនមួយ បាននិយាយថា សាលាឯកជនមានលក្ខណៈពិសេស ដែល​ជួយជំរុញឲ្យសិស្ស មានចំណេះដឹងខ្ពស់ ក្នុងនោះដូចជាការពង្រឹងភាសាបរទេស ជាច្រើនភាសា ចាប់តាំងពីថ្នាក់​ក្រោមមក និងមានការបង្រៀនពេញម៉ោង ការមើលថែរយកចិត្តទុកដាក់ខ្ពស់ តាំងពីការគេង ញាំបាយ នាំក្មេងលេង​ជាដើម។ កញ្ញាបានបញ្ជាក់ទៀតថា ការប្រឡងមាន ការតឹងរឹង មិនឲ្យសិស្សចម្លងគ្នាទេ រីឯគ្រូក៏មានជំនាញ​ច្បាស់​លាស់ ក្នុងមុខវិជ្ជានីមួយៗក្នុងការបង្រៀនដែរ។

ឪពុកម្ដាយ ឬអាណាព្យាបាល ដែលចង់យកកូនក្មួយរបស់ខ្លួន ទៅចូលរៀននៅសាលាឯកជននោះ ត្រូវបង់ថ្លៃ​ទៅ​តាម​គុណភាព និងកម្មវិធីដែលសាលាត្រូវផ្ដល់ឲ្យទៅសិស្ស។ សាលាឯកជនមួយចំនួន ដែលមានឈ្មោះល្បី​ហើយ​នោះ តម្លៃក្នុងការទទួលសិស្ស ក៏មានកម្រិតខ្ពស់ទៅតាមនោះដែរ។ ដូច្នេះ ករណីបង់ប្រាក់នេះ វាចាំបាច់ត្រូវ​សាលា​មាន​ករណីយកិច្ច ក្នុងការផ្ដល់គុណភាពអប់រំ ទៅឲ្យសិស្ស ដូចអ្វីដែលឪពុកម្ដាយ ឬអាណាព្យាបាល សង្ឃឹមចង់បាន។

ការអប់រំ ចងជាប់ដោយការបង់ប្រាក់នេះ បង្ហាញពីភាពខុសគ្នាទៅនឹងសាលារដ្ឋ ដែលមិនតម្រូវឲ្យឪពុកម្ដាយ ឬ​អាណាព្យាបាល បង់ប្រាក់ឡើយ ក្នុងការឲ្យកូនក្មួយរបស់ផងខ្លួន ចូលទៅរៀន។ ដូច្នេះហើយ គុណភាពអប់រំ​មិន​ត្រូវ​បានធានាដោយសាលាទេ តែជាប្រព័ន្ធដែលកំណត់ដោយ ក្រសួងអប់រំ ឬការកំណត់របស់រដ្ឋ។

តែសម្រាប់ឪពុកម្ដាយ ឬអាណាព្យាបាល មួយចំនួន នៅតែគិតថា សាលារដ្ឋនៅមានគុណភាពគួរឲ្យកត់សម្គាល់ដែរ។ កញ្ញា ហឹម ស្រីពៅ ដែលបញ្ជូនក្មួយស្រី ទៅរៀនទាំងនៅសាលាឯកជន ទាំងសាលារដ្ឋនោះ  បានប្រាប់​ទស្សនាវដ្តី​មនោរម្យ.អាំងហ្វូ ឲ្យដឹងថា នៅសាលាឯកជន គេបង្រៀនសិស្សឲ្យចេះ ទាំងភាសាបរទេស និងជំនាញ​កុំព្យូទ័រ និង​យកចិត្តទុកដាក់លើសិស្សច្រើន។ រីឯសាលារដ្ឋវិញ ក៏ល្អម្យ៉ាងដែរ ព្រោះលោកគ្រូ អ្នកគ្រូបានបង្រៀង នៅក្នុងវិជ្ជា​ផ្សេងទៀត និងមានការយកចិត្តទុកដាក់ដល់សិស្ស ដូចគ្នា គ្រាន់តែការផ្តល់ព័ត៍មាន អំពីបញ្ហារបស់សិស្ស នៅមាន​លក្ខណៈយឺតបន្តិច។

យ៉ាងណាក៏ដោយ ក៏កញ្ញ ហឹម ស្រីពៅ នៅតែគិតថា នៅសាលាឯកជន ដូចជាមានសុវត្ថិភាព សម្រាប់សិស្ស​ច្រើន​ជាងដែរ។

ជាទូទៅ ការបង់ប្រាក់ចូលទៅរៀន នៅក្នុងសាលាឯកជន ផ្ដល់ឱកាសទៅឲ្យតែគ្រួសារអ្នកមានធនធាន តែប៉ុណ្ណោះ ខណៈសាលារដ្ឋ នៅតែជាជម្រើសតែមួយគត់ របស់ឪពុកម្ដាយ ឬអាណាព្យាបាល ដែលក្រខ្សត់មិន​មានធន​ធាន​ច្រើន។

ជម្រើសខាងលើនេះហើយ ជាការលើកឡើងរបស់ នាយកសាលាបឋមសិក្សាអនុវត្តរាជធានី លោក លឹម សុគន្ធា។ មន្ត្រីគ្រប់គ្រងសាលារូបនេះ បានបញ្ជាក់ថា ចំនួនសិស្សទៅរៀន នៅសាលាឯកជនច្រើន វាអាស្រ័យលើ ម្តាយ ឪពុក របស់សិស្ស តែប៉ុណ្ណោះ។ លោក លឹម សុគន្ធា នៅតែទទួលស្គាល់ថា  ការសិក្សានៅសាលារដ្ឋ មានភាពល្អប្រសើរ​ជាង ព្រោះថាសាលារដ្ឋនីមួយៗមានទីធ្លាធំ និងមានផាសុខភាព ហើយលោកគ្រូអ្នកគ្រូ គឺមានចំណេះដឹងខ្ពស់។ ជា​ពិសេសនោះ មុននឹងក្រសួងបញ្ជូនពួកគាត់ ទៅបង្រៀននៅសាលារដ្ឋនីមួយ លោកគ្រូអ្នកគ្រូទាំងនោះ​ចាំបាច់​ត្រូវ​ឆ្លង​កាត់ការបណ្តុះបណ្តាលពី សាលាគរុកោសល្យជាមុនសិន៕