តំណាងរាស្រ្តគណបក្សប្រជាជនកម្ពុជាលោក ឈាង វុន បានអះអាងថាអំពើហិង្សា ដែលបានកើតឡើង​នៅទីលាន​ប្រជាធិបតេយ្យ កាលពីថ្ងៃទី១៥ កក្កដា កន្លងទៅនេះ មានរូបភាពអាក្រក់ជាងអំពើហិង្សា ដែលបានកើតឡើង​នៅ​លើ​ដងវិថីវ៉េងស្រេង កាលពីដើមឆ្នាំ២០១៤។

លោក ឈាង វុន ថ្លែងនៅមន្ទីររដ្ឋសភា។ (រូបថតរដ្ឋសភា)

ហិង្សា - មើលតាមទំនង លោក ឈាង វុន ដែលមានតំណែងជាប្រធានគណៈកម្មការកិច្ចការបរទេស និង​សហ​ប្រតិបត្តិការ​អន្តរជាតិ​នៃរដ្ឋសភាផងនោះ ប្រហែលជាចង់ឲ្យគេនិយាយពីលោក ឲ្យបានច្រើនជាថ្មីម្ដងទៀត។

ថ្លែងយោងពីសេចក្តីថ្លែងការណ៍របស់រដ្ឋសភា ក្នុងសន្និសីទការសែតនៅថ្ងៃទី១៨ ខែកក្កដា ឆ្នាំ​២០១៤ មន្ត្រីគណបក្ស​ប្រជាជន ដែលសម្បូរដោយវោហារស័ព្ទរូបនេះ បានថ្លែងថា៖ «រដ្ឋសភាកម្ពុជា ថ្កោលទោស ចំពោះអំពើហិង្សាដ៏​ឃោរឃៅ ព្រៃផ្សៃ អមនុស្សធម៌ និងរំលោភសិទ្ធិ​មនុស្សយ៉ាងធ្ងន់ធ្ងរនេះ (ការប៉ះទង្គិចនៅទីលាន​ប្រជាធិបតេយ្យ​ថ្ងៃទី១៥កក្កដា )។ សកម្មភាពអាណាធិបតេយ្យ មាន​ការរៀបគម្រោងទុកជាមុននេះ គឺជាអំពើឧក្រិដ្ឋកម្ម ដែលរំលោភ​ច្បាប់ព្រហ្មទណ្ឌជាធរមាន។»

តែនៅពេលអ្នកសារព័ត៌មានសួរថា ហេតុដូចម្តេចបានជារដ្ឋសភាកម្ពុជា មិនថ្កោលទោសអំពើហិង្សា​នៅផ្លូវ​វ៉េងស្រេង​ផង? លោក ឈាង វុន បានពន្យល់ថា ករណីនៅផ្លូវវ៉េងស្រេង មិនដូចករណីនៅក្បែរទីលានប្រជាធិបតេយ្យ គឺមិន​អាក្រក់ដូចនៅទីលានប្រជាធិបតេយ្យទេ ហើយថាករណីនៅផ្លូវវ៉េងស្រេង គឺរដ្ឋសភា មិនចេញសេចក្តី​ថ្លែង​ការណ៍ ដោយសារតែចង់ទុកឱកាសឲ្យ គណបក្សសង្គ្រោះជាតិ អាចមកចរចាជាមួយគណបក្សប្រជាជនកម្ពុជា។ លោក ឈាង វុន បានបញ្ជាក់ថា៖ «ព្រឹត្តិការណ៍នៅផ្លូវវ៉េងស្រេង មិនមានរូបភាពសហាវអញ្ចឹងទេ»។

គួរបញ្ជាក់ថា ការប៉ះទង្គិចគ្នាយ៉ាងហិង្សា រវាងអ្នកគាំទ្រគណបក្សសង្រ្គោះជាតិ និងកម្លាំសន្តិសុខស៊ីឈ្នួល​របស់​សាលារាជធានីភ្នំពេញ កាលពីថ្ងៃទី១៥ ខែកក្កដា ឆ្នាំ២០១៤ នៅក្បែរទីលានប្រជាធិបតេយ្យ បណ្តាលឲ្យមានអ្នក​រងរបួសធ្ងន់ និងស្រាល យ៉ាងតិចជាង៣០នាក់ ភាគច្រើនជាក្រុមសន្តិសុខ។ តែករណីប៉ះទង្គិចនៅផ្លូវវ៉េងស្រេង​ពី​ដើមឆ្នាំ២០១៤ របាយការណ៍របស់សង្គមស៊ីវិលជាតិ និងអន្តរជាតិ ឲ្យដឹងថា បានបណ្តាលឲ្យកម្មករស្លាប់៧នាក់ និង២៣នាក់ត្រូវចាប់ខ្លួន និងរាប់សិបនាក់រងរបួស ក្រោយពីមានការបង្ក្រាបពីកម្លាំងសមត្ថកិច្ច។

មកទល់ពេលនេះ មន្រ្តីជាន់ខ្ពស់របស់គណបក្សសង្រ្គោះជាតិយ៉ាងតិច៧នាក់ ត្រូវបានសមត្ថកិច្ចគ្រប់គ្រង​ដោយ​រដ្ឋាភិបាលគណបក្សប្រជាជនកម្ពុជាចាប់ឃាត់ខ្លួន ហើយកំពុងតាមចាប់ខ្លួនបន្ថែមទៀត។ ព្រឹត្តិការណ៍នៃការចាប់​ឃាត់ខ្លួន ហើយត្រូវចោទប្រកាន់ដោយតុលាការនេះ កើតឡើងក្រោយពី ការប៉ះទង្គិចគ្នាយ៉ាងហិង្សារវាងអ្នកគាំទ្រ​គណបក្សសង្រ្គោះជាតិ និងកម្លាំសន្តិសុខស៊ីឈ្នួលរបស់សាលារាជធានីភ្នំពេញ កាលពីថ្ងៃទី១៥ ខែកក្កដានេះ៕