បើតាមការវិភាគមួយ របស់អង្គភាពស៊ើបការសម្ងាត់ នៃប្រទេសអ៊ុយក្រែន ទៅលើកិច្ចសន្ទនារវាងក្រុមអ្នក​បំបែក​ទឹកដី និយមប្រទេសរ៉ូស្សី បានបង្ហាញឲ្យឃើញថា ក្រុមនេះ បានបាញ់ទម្លាក់យន្ដហោះម៉ាឡេស៊ី ដែលពួកគេ​ស្មាន​តែជាយន្ដហោះរបស់កងទ័ព។

បំណែកយន្ដហោះ ម៉ាឡស៊ី អ៊ែរឡាញ ដែលបំផ្ទុះខ្លួនយ៉ាងអាណោចអាធម នៅលើដី។ (រូបថតផ្តិតពីវីដេអូ)

ធ្លាក់យន្ដហោះ - ការបាញ់កាំជ្រួញប្រដេញបាញ់ចេញពីដី ជាចំណុចសង្ស័យដ៏ធំបំផុតមួយ របស់អង្គភាពស៊ើបការ​សម្ងាត់ នៃសហរដ្ឋអាមេរិក ដើម្បីពន្យល់ពីការធ្លាក់យន្ដហោះ នៃជើងហោះហើរ MH17 របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ ហោះចេញពីរាជធានី អាមស្ទែដាម ប្រទេសហូឡង់ មកកាន់រដ្ឋធានី កូឡាឡំពួរ ប្រទេសម៉ាឡេស៊ី កាលពីរសៀលថ្ងៃព្រហស្បត្តិ៍ (ម៉ោងក្នុងតំបន់កើតហេតុ)។ ប៉ុន្តែអ្វីដែលគេត្រូវស្រាវជ្រាវឲ្យឃើញនោះថា តើនរណា​ជាអ្នកបាញ់យន្ដហោះស៊ីវិលមួយនេះ ដែលដឹកមនុស្ស២៩៨នាក់ (មិនមែន២៩៥នាក់ ដូចដំណឹងដែលផ្សាយភ្លាមៗ​នោះទេ)។

អាជ្ញាធរនៃប្រទេសអ៊ុយក្រែន និងរ៉ូស្សី បានចោទគ្នាទៅវិញទៅមក ខណៈពេលដែលសហរដ្ឋអាមេរិកឯណោះវិញ កំពុងធ្វើការវិន្និច្ឆ័យស្វែងរក ពីអ្នកទទួលខុសត្រូវ។ ការសង្ស័យដ៏ធំមួយ ត្រូវបានគេទម្លាយឲ្យដឹង នៅវេលាយប់ថ្ងៃ​ព្រហស្បត្តិ៍ដដែល បានបង្ហាញថា កងកុម្មង់ដូរបស់ក្រុមអ្នកបំបែកទឹកដី និយមប្រទេសរ៉ូស្សី ទំនងជាបានបាញ់​យន្ដហោះនេះ ដោយពួកគេនឹកស្មានថា ជាយន្ដហោះយោធារបស់ប្រទេសអ៊ុយក្រែន។

«បក្សាមួយក្បាល បានធ្លាក់»

លោក អ៊ីហ្គ័ ស្ទ្រឹលកូវ (Igor Strelkovn) ដែលតាំងខ្លួនជារដ្ឋមន្ត្រីក្រសួងការពារជាតិ របស់ក្រុមអ្នកបំបែកទឹកដី បាន​ផ្សាយសារមួយនៅទំព័រហ្វេសប៊ុករបស់ខ្លួនថា៖ «យើងទើបនឹងបាញ់ទម្លាក់យន្ដហោះ An-26 មួយគ្រឿង ស្ថិតនៅ​ក្បែរភូមិ ស្នីស្នេ (Snijné)។ យន្ដហោះនេះ បានហោះមកចូលមកក្នុងតំបន់រុករករ៉ែ ប្រូហ្គ្រេ (Progress)។» សារនេះ​ត្រូវបានសរសេរនៅរសៀលម៉ោង ៤ និង៣៧នាទី (ម៉ោងក្នុងតំបន់កើតហេតុ) ហើយ​យន្ដហោះ​ដែលលោក​និយាយ​ដល់នោះ ជាប្រភេទយន្ដហោះដ៏ធំមួយ របស់កងទ័ពអ៊ុយក្រែន។ តែការផ្សាយសារ​នៅ​លើហ្វេសប៊ុកនោះ បានធ្វើ​ឡើង​នៅក្រោយតែបន្ដិចប៉ុណ្ណោះ ពីពេលដែលយន្ដហោះម៉ាឡេស៊ី បានបាត់ដំណឹងពី​ប្រព័ន្ធចាប់​រលកអាកាស នៅ​វេលា​ម៉ោង ៤និង២០នាទីរសៀល នៅក្នុងតំបន់តែមួយនោះដែរ។

បន្ទាប់មក លោក អ៊ីហ្គ័ ស្ទ្រឹលកូវ ដដែល បានផ្សាយវីដេអូមួយទៀត បង្ហាញពីផ្សែងខ្មៅដ៏ខ្មួលខ្មាញ់ ហុយឡើងទៅ​លើ នៅ​នឹងកន្លែងដូចដែលកន្លែងដែលយន្ដហោះម៉ាឡេស៊ី បានធ្លាក់ ដោយមានដាក់ជាវាចាមួយឃ្លាផងថា៖ «បក្សា​មួយ​ក្បាល បានធ្លាក់»។ វីដេអូផ្សែងដ៏ខ្មួលខ្មាញ់របស់លោក ស្ទ្រឹលកូវ មានរូបរាងប្រហាក់ប្រហែលទៅនឹង វីដេអូ​ផ្សែង​ដ៏​ខ្មួលខ្មាញ់នៃយន្ដហោះដឹកមនុស្ស២៩៨នាក់ ដែលត្រូវបានបណ្ដាជនរស់នៅក្បែរនោះថតបាន ហើយផ្សាយ​នៅ​តាម​យូធូប។

«រឹបអូស កាំជ្រួចប្រដេញ បាញ់ចេញពីដី»

នៅក្នុងសេក្ដីប្រកាសមួយរបស់ទីភ្នាក់ងារសារព័ត៌មាន អ៊ិនធើហ្វាក់ (Interfax) ដែលជាអ្នកនាំពាក្យឲ្យក្រុម​អ្នក​បំបែក​ទឹកដី បានឲ្យដឹងថា ក្រុមនេះមិនមានសមត្ថភាព បំពាក់ទៅដោយឧបករណ៍ការពារដែនអាកាសទំនើបបែបនេះទេ។ ប៉ុន្តែនៅក្នុងសារមួយ ដែលផ្សាយដោយក្រុមអ្នកបំបែកទឹកដីដដែល នៅលើទំព័រទ្វីសធើរ ជាផ្លូវការរបស់ខ្លួន បាន​និយាយថា ពួកខ្លួនទើបនឹងរឹបអូសបាននូវ កាំជ្រួចជាច្រើនដើម ប្រភេទប្រដេញបាញ់ចេញពីដី ពីកងទ័ពអ៊ុយក្រែន។ ប៉ុន្តែសារនោះ ត្រូវបានលប់ចោល នៅពេលបន្ទាប់មក។

កន្លងមកពីរដ្ឋាភិបាលទីក្រុង គៀវ (ប្រទេសអ៊ុយក្រែន) តែងចោទប្រទេសរ៉ូស្សី ថាបានបំពាក់ទៅឲ្យក្រុមបំបែកទឹកដី នូវកាំជ្រួចធុនធ្ងន់ ដែលមានលទ្ធភាពអាចបាញ់ចេញ បានចំងាយរហូតដល់ ២៥គីឡូម៉ែត្រ។

ប៉ុន្តែអ្វីដែលធ្វើឲ្យគេកាន់តែព្រឺសម្បុរទៅទៀតនោះ នៅយប់ថ្ងៃព្រហស្បត្តិ៍ដដែល អង្គភាពស៊ើបការសម្ងាត់​របស់​ប្រទេសអ៊ុយក្រែន បានបញ្ចេញផ្សាយ នូវកិច្ចសន្ទនាមួយ រវាងកងកម្មង់ដូនៃក្រុមអ្នកបំបែកទឹកដី បន្ទាប់ពីពួកគេ​បាន​ចូលទៅមើលកន្លែងដែលយន្ដហោះធ្លាក់។ ខាងក្រោមនេះ ជាកិច្ចសន្ទនាទាំងនោះ៖

- «គឺក្រុម Tchernoukhine ដែលបានទម្លាក់យន្ដហោះនេះ។ យន្ដហោះ ត្រូវបានកំទេច នៅកណ្ដាលអាកាស។» ជា​សម្ដីរបស់ជនម្នាក់ ដែលទំនងជានាយផ្នែក នៅក្នុងក្រុមអ្នកបំបែកខ្លួន។

- «ហើយយ៉ាងម៉េចទៀត?» ម្នាក់ទៀតឈ្មោះ គ្រេច (Grek) បានសួរ។

- «ជាយន្ដហោះស៊ីវិល ១០០% តែម្ដង ...»

- «មានរកឃើញអាវុធខ្លះឬទេ?»

- «ទេ! អត់មានទេ។ មានតែសម្ភារៈរបស់ជនស៊ីវិលប៉ុណ្ណោះ។»

- «មានឯកសាអ្វីទេ?»

- «មាន ... លិខិតឆ្លងដែនរបស់ប្រទេសឥណ្ឌូនេស៊ី»។

សម្រាប់ទីក្រុង វ៉ាស៊ីនតោន វិញ កំពុងតាមប្រម៉ាញ់ ស្វែងរកការពិត ជុំវិញបញ្ហានេះ។ ទិន្នន័យឃ្លាំមើល នៃ​ប្រព័ន្ធ​ផ្កាយរណបជាច្រើនរបស់អាមេរិក នឹងត្រូវយកមកពិនិត្យ ដើម្បីកំណត់ឲ្យដឹងថា តើការបាញ់កាំជ្រួចនេះ ចេញពី​ប្រភពណា។ នៅពេលនេះ ការស៊ើបអង្កេត ជុំវិញសោកនាដកម្មដ៏ខ្លោចផ្សារ នៅមិនទាន់ចប់នៅឡើយ៕

វីដេអូមួយទៀត ដែលបង្ហាញពីការផ្ទុះរបស់យន្ដហោះមួយ ក្នុងតំបន់ដូចគ្នា៖