ហេតុការណ៍ដ៏អកុសល នៃការបាញ់ធ្លាក់ នូវយន្ដហោះរបស់ក្រុមហ៊ុន ម៉ាឡេស៊ីអ៊ែរឡាញ នៅភាគខាងកើតនៃ​ប្រទេសអ៊ុយក្រែន បានបង្កឲ្យមានប្រតិកម្មធ្លាក់មកយ៉ាងព្រោងព្រាត ដោយមានអមជាមួយនឹងរូបភាពផង ជា​ពិសេស​នៅតាមបណ្ដាញសង្គម។ បណ្ដាញ​ព័ត៌មានជាច្រើន ក៏បានផ្សព្វផ្សាយជាបន្តបន្ទាប់ នូវរូបភាពពី​ហេតុការណ៍​ដ៏អកុសលនេះដែរ។

កំទេចកំទីរបស់យន្ដហោះ MH17 បន្ទាប់ពីបានត្រូវបានបាញ់ទម្លាក់។ (រូបថតទ្វីសធើរ)

ធ្លាក់យន្ដហោះ - យន្ដហោះប៊ូអីង ៧៧៧ របស់ក្រុមហ៊ុន ម៉ាឡេស៊ីអ៊ែរឡាញ ដែលភ្ជាប់ជើងហោះហើរ MH17 ពី​រាជធានី អាមស្ទែដាម ប្រទេសហូឡង់ មកកាន់រដ្ឋធានី កូឡាឡំពួរ ប្រទេសម៉ាឡេស៊ី បានបាត់ការទាក់ទងមកផែនដី នៅកំពស់១០គីឡូម៉ែត្រពីដី ហើយបានធ្លាក់នៅលើភូមិមួយ ឈ្មោះ ចាខតាស (Chakhtarsk) ក្នុងតំបន់ ដូនិក ភាគ​ខាងកើតនៃប្រទេសអ៊ុយក្រែន នៅក្បែរព្រំដែនជាមួយប្រទេស រ៉ូស្ស៊ី។

ទីភ្នាក់ងារសារព័ត៌មាននៅក្នុងតំបន់ បានរាយការណ៍ថា យន្ដហោះត្រូវបានបាញ់ទម្លាក់ ដោយកាំជ្រួចប្រដេញ បាញ់​ចេញពីដី។ នៅវេលានេះ អាជ្ញាធររបស់ប្រទេសអ៊ុយក្រែន និងប្រទេសរ៉ូស្ស៊ី បានចោទគ្នាទៅវិញទៅមក ពីការធ្លាក់​យន្ដហោះនេះ ខណៈពេលដែលក្រុមអ្នកផ្ដាច់ទឹកដី និយមប្រទេសរ៉ូស្ស៊ី បានប្រកែកថា ខ្លួនគ្មានសមត្ថភាព​ក្នុងការ​បំពាក់ប្រព័ន្ធការពារអាកាសទំនើបបែបនេះទេ។

មនុស្សទាំង២៩៥នាក់ ក្នុងនោះ២៨០នាក់ ជាអ្នកដំណើរ បានស្លាប់ទាំងអស់។ សាកសពមួយចំនួន ត្រូវបានគេ​រក​ឃើញនៅឆ្ងាយ ពីកន្លែងធ្លាក់យន្ដហោះ ប្រមាណជា១៥គីឡូម៉ែត្រ។ ទស្សនាវដ្ដីមនោរម្យ.អាំងហ្វូ នឹងវិលត្រឡប់​លំអិត​លើបញ្ហាធ្លាក់យន្ដហោះនេះ នៅក្នុងអត្ថបទក្រោយរបស់ខ្លួន៕

ខាងក្រោមនេះ ជារូបភាព និងវីដេអូដំបូងគេ ពីហេតុការណនេះ៖