ទឹកប្រាក់ចំនួន ៥លានរៀល និងគ្រឿងបរិភោគផ្សេងទៀត ត្រូវបានកាកបាទក្រហម ផ្តល់ជូនទៅក្រុម​សន្តិសុខដែល​រងរបួស កាលពីម្សិលម៉ិញ ក្នុងពេលប៉ះទង្គិចជាមួយប្រជាពលរដ្ឋ។ ដោយឡែកសកម្មជន និងអ្នកគាំទ្រ​គណបក្ស​សង្គ្រោះជាតិ ដែលបានរងរបួសក្នុងការប៉ះទង្គិចដែរនោះ ពុំត្រូវទទួលបានជំនួយពីកាកបាទក្រហមឡើយ។ ចំពោះ​ការសម្រេចចិត្តរបស់កាកបាទក្រហមនេះ ត្រូវបានមជ្ឈដ្ឋានទូទៅលើកឡើងថា តើដើម្បីឱ្យក្រុមសន្តិសុខ​កាន់តែមាន​កម្លាំង​ចិត្ត ធ្វើការបង្រ្កាបអ្នកតវ៉ាឬយ៉ាងណា?

លោកស្រី ប៊ុន រ៉ានី ហ៊ុន សែន ប្រធានកាកបាទក្រហម។

តួនាទី - ក្រោយពីក្រុមសន្តិសុខ ត្រូវបានប្រជាពលរដ្ឋធ្វើការតដៃវិញ បណ្តាលឱ្យមានរបួសធ្ងន់ និងស្រាល​ជាច្រើន​នាក់ កាលពីសៀលថ្ងៃទី ១៥ ខែកក្កដា ឆ្នាំ២០១៤ ម្សិលមិញនេះមក តំណាងកាកបាទក្រហមកម្ពុជា បានចុះជួប​សួរ​សុខទុក្ខ និងប្រគល់អំណោយ ដល់ក្រុមសន្តិសុខខណ្ឌដូនពេញចំនួន២៣នាក់ទាំងនោះ ដែលកំពុងសម្រាក​ព្យាបាល​នៅមន្ទីរពេទ្យកាល់ម៉ែត ។ សន្តិសុខម្នាក់ ត្រូវបានតំណាងកាកបាទក្រហមផ្តល់ថវិកា ចំនួន ៥លានរៀល ទឹកសុទ្ធ ទឹកក្រូច ទឹកដោះគោ និងគ្រឿងបរិភោគផ្សេងៗជាច្រើនទៀត។

ចំពោះសកម្មភាពសម្បុរសធម៌ ដែលផ្តល់តែទៅឱ្យក្រុមសន្តិសុខនេះ ត្រូវបានអង្គការសង្គមស៊ីវិល ប្រជាពលរដ្ឋ និង​មជ្ឈដ្ឋាននានា រិះគន់ចំពោះសកម្មភាពនេះ មានភាពលំអៀង ព្រោះជាគោលការណ៍របស់កាកបាទក្រហម ជា​ស្ថាប័ន​សម្បុធម៌មួយមិនលំអៀងលើម្ខាងៗ ហើយស្ថាប័នជាតិមួយនេះ ក៏ត្រូវបានគេចាត់ទុកថាជាម៉ែឪ ឬ​អាណាព្យាបាល​របស់ប្រជាជន ដូច្នេះប្រសិនបើស្ថាប័ននេះជួយក្រុមសន្តិសុខ ក៏ត្រូវតែជួយដល់ក្រុមបាតុករ​ដែលបានរងរបួសនៅ​ពេល​នោះដែរ។

ក្រុមប្រជាពលរដ្ឋបានលើកឡើងថា អ្នករងរបួសមានទាំងសងខាង ប៉ុន្តែផ្តល់ឱ្យតែម្ខាង រីឯក្រុមប្រជាពលរដ្ឋវិញ គឺ​មិនទទួលបានអ្វីទាំងអស់។ កុំថាឡើយ ក្រុមប្រជាពលរដ្ឋដែលញឹកញយ តែងតែបែកក្បាលដោយសារ​កងកម្លាំង​សមត្ថកិច្ចចម្រុះ សូម្បីតែបាតុករដែលបាត់បង់ជីវិត ក្នុងអំឡុងពេលទាមទារប្រាក់ខែ១៦០ដុល្លា កាលពីដើមខែមករា ក៏មិនត្រូវបានស្ថាប័នសម្បុរសធម៌មួយនេះអើពើដែរ។

អ្នកប្រើប្រាស់បណ្តាញសង្គមហ្វេសប៊ុក បានយកបញ្ហានេះ មកជជែកដេញដោលគ្នា យ៉ាងព្រោងព្រាត​នៅលើប្រព័ន្ធ​អ៊ីនធើណេត។ អ្នកប្រើប្រាស់បណ្តាញសង្គមហ្វេសប៊ុកម្នាក់ ឈ្មោះ Kano Kulab បានរិះគន់ចំៗថា៖ «ម្នាក់បាន ៥ លាន ជាការ​លើក​ទឹកចិត្តឲ្យកាន់តែហ៑ានវ៉ៃបាតុករឲ្យខ្លាំងថែមទៀត»។ ឯកភាពនឹងការលើកឡើងនេះ Khunny V Ana បានបញ្ចេញ​យោបល់ប្រហាក់ប្រហែលដែរថា ការណ៍ដែលកាកបាទក្រហមធ្វើបែបនេះ មានន័យថា​កំពុង​តែ​គាំទ្រឱ្យមាន​ការប្រព្រឹត្តិអាក្រក់ និងការបង្រ្កាបរបស់ក្រុមសន្តិសុខ។

រីឯម្ចាស់គណនីម្នាក់ទៀត Konkart Khmer បានបន្ទរទៅជាមួយថា៖ «អយុត្តិធម៌ពេកហើយ កាកបាទក្រហម​អើយ ... ហេតុអ្វី ខ្មែរអ្នកក្រជាច្រើន អត់បាយក្រហាយទឹករង់ចាំតែថ្ងៃស្លាប់ មិនឃើញកាកបាទ យកជំនួយ​ទៅជួយ​សោះ​អីចឹង?» Sreymom San ដែលឈឺឆ្អាលនឹងគេដែរនោះ បានចោតសួរសំណួរយ៉ាងខ្លីថា «តើនេះទង្វើរអ្វី?»។ ម្ចាស់​គណនីដដែលនេះបន្ថែមថា ហេតុអីក៏ឈឺឆ្អាលខ្លាំងម្លេះចំពោះក្រុមសន្តិសុខទាំងនោះ ចុះត្រង់កម្មករមាន​របួសនៅ​កាណាឌីយ៉ាវិញ ដូចជាមិនឃើញគិតគូរអញ្ចឹងសោះ។

សម្រាប់ម្ចាស់គណនីដែលមានឈ្មោះថា Prakseut Ratanak បានធ្វើការវែកញ៉ែកបញ្ហានេះ ដោយ​លើកពីគោល​ការណ៍​គ្រឹះទាំង៧ចំណុច របស់កាកបាទក្រហមកម្ពុជា ដែលជាគោលការណ៍ កំពូលរបស់​កាក​បាទ​ក្រហមអន្តរជាតិ និងអឌ្ឍចន្ទក្រហមផងដែរ មករៀបរាប់ថា៖ «១.មនុស្សធម៌ ២.ភាពមិនលំអៀង ៣.​អព្យាក្រិតភាព ៤.ឯករាជ្យភាព ៥.ការផ្តល់សេវាដោយស្ម័គ្រចិត្ត ៦.ឯកភាព និងទី៧.សកលភាព»។

ម្ចាស់គណនីខាងនេះបានធ្វើការថ្លឹងថ្លែងថា «តើកាកបាទក្រហមកម្ពុជា អនុវត្តបានប៉ុន្មានចំណុច? មូលហេតុអ្វីបាន​ជាចំណុចមួយចំនួន អនុវត្តមិនបាន ឬមិនចង់អនុវត្ត? កាកបាទក្រហមកម្ពុជាពិតជាមិនលំអៀង មានឯករាជ្យភាព និងមានអព្យាក្រិតភាពពិតប្រាកដមែនទេ?»៕