តារាចម្រៀងល្បីរបស់ផលិតកម្មហង្សមាស កញ្ញា ពេជ្រ សោភា ពេលនេះកំពុងមានទុក្ខធំជាទីបំផុត ព្រោះតែ​ឪពុក​ជាទីស្រលាញ់របស់កញ្ញា បានទទួលមរណៈភាព កាលពីយប់មិញនេះ ដោយសាររោគាពាធ។

កញ្ញា ពេជ្រ សោភា និងឪពុករបស់នាង ពេលនៅមានជីវិតនៅឡើយ។ (រូបថត ហ្វេសប៊ុក)

តារា ​- តារាចម្រៀង ពេជ្រ សោភា ពេលនេះកំពុងមានទុក្ខជាទម្ងន់ដោយ ឪពុករបស់នាង បានទទួលមរណភាព​ហើយ កាលពីម៉ោងប្រមាណជា ជាង ៧ យប់ ថ្ងៃទី១៥ ខែកក្កដា ឆ្នាំ២០១៤ ដោយរោគាព្យាធិ ក្នុងជន្មាយុ ៧១ ឆ្នាំ បន្ទាប់ពីគេងសម្រកព្យាបាលក្នុងមន្ទីពេទ្យ អស់រយៈពេលជាច្រើនខែមក។

តាមរយៈបណ្តាញទំនាក់ទំនងសង្គមហ្វេសប៊ុក របស់តារាចម្រៀងដែលពោរពេញ​ ទៅដោយក្បាច់រាំញាក់​កន្រ្តាក់​អារម្មណ៍រូបនេះ បានបង្ហាញពីទុក្ខក្រៀមក្រំ មិនអាចកាត់ថ្លៃបាន ដែលខ្លួនបានបាត់បង់អ្នកមានគុណ ជាទីគោរព និង​ស្រលាញ់របស់នាង។ ពេជ្រ សោភា បានសរសេរនៅលើជញ្ជាំងហ្វេសប៊ុករបស់នាងថា៖ «ខ្ញុំស្រលាញ់ពុកណាស់ ពុកជាបុរសម្នាក់ដ៏អស្ចារ្យណាស់សំរាប់កូន ជាតិក្រោយកូនចង់កើតជាកូនពុកទៀត សូមអោយវិញ្ញាណក្ខន្ធពុក​ទៅ​កាន់ទីមួយអស្ចារ្យ អស់កលជានិច្ច។ ពុកនៅក្នុងចិត្តកូនជារៀងរហូត ...កូនចង់និយាយជាមួយពុក ចង់ប្រាប់ថា កូន​ស្រលាញ់ពុកណាស់។»

កន្លង មក កញ្ញា ពេជ្រ សោភា បានធ្លាប់បញ្ជាក់ថា ឪពុករបស់នាងមានជំងឺនៅក្នុងខ្លួនប៉ុន្មានប្រភេទឯណោះ ដែល​បណ្ដាលមកពីការជក់ថ្នាំខ្លាំង ស្លឹកសង្កែ និងរួមផ្សំជាមួយជរាភាព ជំងឺរបស់គាត់ មិនអាចធ្វើការវះកាត់បានទេ បាន​ត្រឹមតែប្រើថ្នាំលេប ឬថ្នាំចាក់ប៉ុណ្ណោះ៕